ކުއަޑްރަންގިއުލާ ޓީ20 ސީރީސްގައި މިއަދު މުބާރާތް ބާއްވާ މެލޭޝިއާ އަތުން 94 ލަނޑުން ބަލިވެ ރާއްޖެ މުބާރާތުން ކަޓައިފިއެވެ.
މެލޭޝިއާ އަތުން ބަލިވިއިރު މި މެޗާއި ކުރިމަތިލިއިރު ވެސް ރާއްޖެއަށް ފައިނަލުގެ ދޮރު ވަނީ ބަންދުވެފައެވެ. މުބާރާތުގެ ފައިނަލުގައި ބައްދަލުކުރާ ދެ ޓީމަކީ ބޫޓާނާއި މެލޭޝިއާ އެވެ.
ރާއްޖެ އަތުން ހޯދި މޮޅާއެކު މެލޭޝިއާ ފައިނަލަށް ދަތުރުކޮށްފައިވަނީ މޮޅުވުމުގެ ރެކޯޑަކާއެކު އެވެ. އެއީ މި ސީރީސްގައި ކުޅުނު ހަ މެޗުންވެސް މޮޅުވެ 18 ޕޮއިންޓާއެކު އެވެ. ރާއްޖެ ލިބެނީ ތިންވަނަ އެވެ. އެއީ ހަ މެޗުން ހަތަރު ޕޮއިންޓާއެކު އެވެ. ފުލުގައި އޮތީ ޕޮއިންޓެއް ނުލިބި ތައިލޭންޑެވެ.
މެޗުގެ ޓޮސް ދިމާވުމުން ރާއްޖެ ގަސްތުކުރީ ހޮވުމަށެވެ. އެހެންކަމުން މެލޭޝިއާ އިން ކުޅެންއަރާ ވިހި އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 230 ލަނޑު ހެދިއެވެ. އެންމެ ރަނގަޅަށް ކުޅުނީ ނުބައިނުވެ 57 ލަނޑު ހެދި އަހުމަދު ފާއިޒް މުހައްމަދު ނޫރެވެ.
ޖަވާބުގައި ރާއްޖެއިން ކުޅެންއަރާ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ހެދުނީ 136 ލަނޑެވެ. ރާއްޖޭން އެންމެ ރަނގަޅު ކުޅުމެއް ދެއްކީ ހާފް ސެންޗަރީއެއް ހެދި ވައިސް ކެޕްޓަން އާދަމް ނާސިފް އުމަރު (އާދަޅޭ) އެވެ.
ރާއްޖެއަށް މި މުބާރާތް ނިމުނީ ދެ މެޗުން މޮޅުވެގެންނެވެ. މި މުބާރާތް ކުރިއަށްދަނީ ކޮންމެ ގައުމެއް ކޮންމެ ގައުމަކާ ދެ ފަހަރު ބައްދަލުކޮށް، އެންމެ ރަނގަޅު ނަތީޖާ ނެރޭ ދެ ޓީމު ފައިނަލުގައި ވާދަކުރާ ގޮތަށެވެ.
މެލޭޝިއާ މުބާރާތަށް ތައްޔާރުވުމުގެ ގޮތުން، ރާއްޖޭގެ ގައުމީ ކްރިކެޓް ޓީމުން ވަނީ ސްރީ ލަންކާގައި ތަމްރީނު ޓުއާއެއް ފުރިހަމަކޮށްފައެވެ. އެ ޓުއާގައި ޖުމްލަ ހަތް މެޗެއް ކުޅުނުއިރު، ފަސް މެޗުން ރާއްޖެ ވަނީ މޮޅުވެފައެވެ