ތަމްރީން ޕްރޮގްރާމެއްގައި މޯލްޑިވްސް ކަސްޓަމްސް ސަރވިސްގެ 30 އޮފިސަރުން އިންޑިޔާގެ ފަރިދަބާދުގައި ހުންނަ ނެޝަނަލް އެކެޑެމީ އޮފް ކަސްޓަމްސް، އިންޑައިރެކްޓް ޓެކްސް އަދި ނަރކޮޓިކްސް (އެން.އޭ.ސީ.އައި.އެން) އަށް ޒިިޔާރާތްކުރަން ކަމަޖެހިފައިވާ ކަމަށް ކަސްޓަމްސްއިން ހާމަކޮށްފިއެވެ.
ކަސްޓަމްސް އޮފިސަރުން އެން.އޭ.ސީ.އައި.އެންއަށް ޒިޔާރަތްކުރުމަށް ހަމަޖެހިފައިވަނީ މިމަހުގެ 11 ވަނަ ދުވަހުން ފެށިގެން 15 ވަނަ ދުވަހާއި ހަމައަށެވެ.
ކަސްޓަމްސްއިން ބުނީ މި ދަތުރުގައި ބައިވެރިވާ އޮފިސަރުން، ޕޯސްޓް ކަސްޓަމްސް އޯޑިޓް ހިމެނިގެންވާ ކާގޯ ޕްރޮފައިލިންގް އެންޑް ރިސްކް މެނޭޖްމަންޓް މަޢުޟޫއަށް ބިނާކޮށް ހިންގޭ ތަމްރީނެއްގައި ބައިވެރިވުމަށް ހަމަޖެހިފައިވާކަމަށެވެ. މިޕްރޮގްރާމްގައި އިންޓަރެކްޓިވް ސެޝަންތަކާއި ވަޔާއި ކަނޑުގެ ކާގޯގެ ރިސްކް ބޭސްޑް ސިލެކްޓިވިޓީ އަދި ރިސްކް ބޭސްްޑް ކޮމްޕްލައަންސް މެނޭޖްމެންޓްފަދަ ކަން ކަމާއިގުޅޭ މަޢުޟޫތަކުގެ ކޭސް ސްޓަޑީސްގެ އިތުރުން ވޯލްޑް ޓްރޭޑް އޯގަނައިޒޭޝަން ޓްރޭޑް ފެސިލިޓޭޝަން އެގްރިމެންޓާއި ގުޅުންހުރި ވޯލްޑް ކަސްޓަމްސް އޯގަނައިޒޭޝަން އިންސްޓްރުމެންޓް ފަދަ ބައިތަކުން ތަމްރީން ދެވޭނެއެވެ.
މިތަމްރީން ޕްރޮގްރާމުގެ ބައިވެރިންނަށް ބޭއްވި ރަސްމިއްޔާތެއްގައި އިންޑިއާއިން ރާއްޖެއަށް ކަނޑައަޅާފައި ހުންނަވާ ހައިކޮމިޝަނަރ މުނު މަހާވަރުއާއި މޯލްޑިވްސް ކަސްޓަމްސްގެ ކޮމިޝަނަރ ޖެނެރަލް އަބްދުالله ޝަރީފް ބައިވެރިވެ ވަޑައިގެންނެވިއެވެ.
މިރަސްމިއްޔާތުގައި ވާހަކަދައްކަވަމުން ހައިކޮމިޝަނަރ މުނު މަހާވަރުވަނީ ކަސްޓަމްސް އޮފިސަރުންނަށް ބޭނުންވާ މިފަދަ އިތުރު ތަމްރީންތައް މިއަހަރުތެރޭ ބޭއްވުމަށް އިންތިޒާމްކުރެވެމުންދާ ކަމަށް ވިދާޅުވެފައެވެ.
އިންޑިޔާއާއި ދިވެހިރާއްޖޭގެ ދެމެދުގައި ކަސްޓަމްސް ދާއިރާގެ ގުޅުންވަނީ ފާއިތުވި އަހަރުތަކުގައި ވަރުގަދަވެފައިއެވެ. އެގޮތުން މިތަމްރީން ޕްރޮގްރާމުގައި ހިމެނޭ މީހުންނާއެކު މިހާތަނަށް 130 ކަސްޓަމްސް އޮފިޝަލުންވަނީ ކަސްޓަމްގެ އެކި ދާއިރާތަކުން އިންޑިޔާއިން ތަމްރީން ހޯދާފައެވެ. އަދި އިތުރު 90 އޮފިޝަލުންވަނީ އޮންލައިން ޕްރޮގްރާމްތައް މެދުވެރިކޮށް ތަމްރީންކޮށްފައެވެ.
ދިވެހިރާއްޖޭގެ ކަސްޓަމްސްއާއި އިންޑިޔާއާ ދެމެދު ކަސްޓަމްސް ކޯޕަރޭޝަން އެމް.އޯ.ޔޫގައި ސޮއިކޮށްފައިވަނީ ޖޫން 2019ގައި އިންޑިއާގެ ބޮޑުވަޒީރު ނަރެންދްރަ މޯދީ ރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައެވެ.