ވިލާތުގެ ޤައުމުތަކަށް ޤަވާޢިދާ ޚިލާފަށް އެތެރެވާ މީހުން ހުއްޓުވުމަށް ހިންގާ އޮޕަރޭޝަނެއްގައި 39 މީހަކު ހައްޔަރު ކޮށްފިއެވެ. މިއީ، މިހާތަނަށް ހިންގާ މި ފަދަ އެންމެ ބޮޑު އޮޕަރޭޝަނެވެ. މި އޮޕަރޭޝަނުގައި ވިލާތުގެ ފަސް ޤައުމެއްގެ ކަމާގުޅޭ އިދާރާތަކުން ބައިވެރިވެއެވެ.
ވިލާތުގެ އިއްތިހާދު (އީ.ޔޫ)ގެ ޤާނޫނު ތަންފީޒުކުރާ އިދާރާ ކަމުގައިވާ ޔޫރޯޕޮލްއިން ބުނީ، މި އޮޕަރޭޝަނުގައި ހައްޔަރުކޮށްފައިވާ މީހުންނަކީ އިރާޤުގެ ކުރުދީންނަށް ނިސްބަތްވާ ގުރޫޕެއްގެ ބަޔެއް ކަމުގައެވެ. އެ ގުރޫޕަކީ، ޗެނަލް ކަނޑު ހުރަސްކޮށް އެކި ޤައުމުތަކުގެ ރެފިޔުޖީން އިނގިރޭސި ވިލާތަށް ވަގަށް އެތެރެ ކޮށްދިނުމުގައި ހަރަކާތްތެރިވާ ބަޔެއް ކަމަށް ވެސް ޔޫރޯޕޮލްއިން ބުނެއެވެ. އެ މީހުން މި ކަން ކޮށްދެނީ ބޮޑެތި އަގުތައް ނަގައިގެންނެވެ. މި ގޮތުން، ވިލާތުގެ ޤައުމުތަކަށް ވަގަށް އެތެރެވުމަށް 2,500 އާއި 10,000 ޑޮލަރާ ދެމެދުގެ ފީއެއް އެ ގުރޫޕުތަކުން ނަގައެވެ.
ފާއިތުވި ދޮޅު އަހަރެއްހާ ދުވަހުގެ ތެރޭގައި އެ ގުރޫޕުން އިނގިރޭސި ވިލާތަށް ވަގަށް އެތެރެކޮށްފައިވާ މީހުންގެ އަދަދު 10,000 އަށްވުރެ އިތުރު ވާނެ ކަމަށް ލަފާ ކުރެވެއެވެ. އަދި، 15 މިލިޔަން ޑޮލަރަށް ވުރެ ގިނަ އަދަދެއްގެ ފައިސާ އެ ގުރޫޕުން ހޯދާފައިވާ ކަމަށް ޔޫރޯޕޮލްއިން ބުނެއެވެ. އެ ގުރޫޕުން އިނގިރޭސި ވިލާތަށް މީހުން ގެންދަނީ ފަރަންސޭސި ވިލާތް މެދުވެރިކޮށެވެ.
މި އޮޕަރޭޝަންގައި ހައްޔަރު ކޮށްފައިވާ މީހުންގެ ތެރެއިން ހަ މީހަކު ހައްޔަރުކޮށްފައި ވަނީ އިނގިރޭސި ވިލާތުންނެވެ. އަދި، ޖަރުމަނު ވިލާތުން 18 މީހަކު ހައްޔަރު ކޮށްފައި ވާއިރު، ފަރަންސޭސި ވިލާތުން އިތުރު ނުވަ މީހަކާއި، ނެދަރލެންޑްސުން އިތުރު ހަ މީހަކު ހައްޔަރު ކޮށްފައިވެއެވެ.
ހައްޔަރު ކޮށްފައިވާ މީހުންނާ އެކު 1,200 އަށްވުރެ ގިނަ ލައިފްޖެކެޓާއި 150 އަށްވުރެ ގިނަ ޑިންގީ ވެސް ފުލުހުންގެ ބެލުމުގެ ދަށަށް ގެންގޮސްފައިވެއެވެ. މީގެ އިތުރުން ގިނަ އަދަދެއްގެ ފައިސާއާއި ހަތިޔާރު ވެސް ފެނިފައިވާ ކަމަށް ޔޫރޯޕޮލްއިން ބުނެއެވެ. މި އޮޕަރޭޝަނާ ގުޅިގެން އިނގިރޭސި ވިލާތަށް ވަގަށް އެތެރެވާ މީހުންގެ އަދަދު މަދުވެގެން ދާނެ ކަމަށް އެ ޤައުމުގެ ނޭޝަނަލް ކްރައިމް އޭޖެންސީއިން ލަފާ ކުރެއެވެ.
ރަސްމީ ލިޔެކިޔުންތަކުން ފެންނަ ގޮތުގައި، ފާއިތުވި އަހަރެއްހާ ދުވަހުގެ ތެރޭގައި 28,500 އަށްވުރެ ގިނަ މީހުން އިނގިރޭސި ވިލާތަށް ވަގަށް އެތެރެވިއެވެ. މި ކަމާ ގުޅިގެން އިނގިރޭސި ވިލާތުގެ ސަރުކާރަށް ވަނީ ފާޑުކިޔުންތައް އަމާޒު ވެފައެވެ. އެ ޤައުމަށް ވަގަށް އެތެރެވެފައިވާ ރުވާންޑާގެ ރައްޔިތުންތަކެއް އަނބުރާ ފޮނުވައިލާން އެ ޤައުމުން މިހާރު ވެސް ދަނީ މަސައްކަތް ކުރަމުންނެވެ.
ފާއިތުވި ދޮޅު އަހަރެއްހާ ދުވަހުގެ ތެރޭގައި އިނގިރޭސި ވިލާތަށް ވަގަށް އެތެރެވި މީހުންގެ ތެރޭގައި ގިނައީ އަފްޣާނިސްތާނާއި، ސޫދާނާއި، ސޮމާލިޔާ އަދި އިރާޤު ފަދަ ޤައުމުތަކުގެ ރެފިޔުޖީންނެވެ. ކަނޑު ހުރަސްކޮށް މި ގޮތަށް ކުރާ ދަތުރުތަކުގައި އެތައް ސަތޭކަ ބަޔެއްގެ ފުރާނަ ވެސް ވަނީ ގެއްލިފައެވެ. މި ގޮތުން، މިދިޔަ އަހަރުގެ ނޮވެންބަރު މަހު ހިނގި ހާދިސާއެއްގައި 27 މީހުން މަރުވިއެވެ.