ރާއްޖޭގައި މި މަހު ބޭއްވުމަށް ތައްޔާރުވަމުން އަންނަ 54 ވަނަ އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ ލޯގޯ ރަސްމީކޮށް ލޯންޗުކޮށްފިއެވެ.
ބުދަ ދުވަހު ޓީވީއެމް ބިލްޑިންގައި ބޭއްވި ޚާއްސަ ހަފުލާއެއްގައި މުބާރާތުގެ ރަސްމީ ލޯގޯ ލޯންޗުކޮށްދެއްވީ ކުޅިވަރާ ބެހޭ ވަޒީރު އަޙްމަދު މަޚްލޫފާއި ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) ގެ ރައީސް އިބްރާހީމް ހަމީދެވެ.
މުބާރާތުގެ ލޯގޯ ރަސްމީކޮށް ލޯންޗުކޮށްދެއްވުމަށްފަހު ވާހަކަދައްކަވަމުން މަޚްލޫފް ވިދާޅުވީ މިއީ ތާރީހީޚީ މުބާރާތެއް ކަމަށާއި މި މުބާރާތް ވެގެންދާނީ ރާއްޖޭގެ ތާރީޚުގައިވެސް އެންމެ ގިނަ ގައުމު އަދި އެތުލީޓުން ބައިވެރިވާ މުބާރާތަށް ކަމަށެވެ.
"ރާއްޖޭގައި މުބާރާތް ބޭއްވޭތީ އެއީ ލިބޭ ބޮޑު ހިތްހަމަޖެހުމެއް، ބޮޑު އުފަލެއް. މުބާރާތް ވެގެންދާނީ އެންމެ ގިނަ ގައުމުތައް ވާދަކުރާ، އަދި އެންމެ ގިނަ އެތްލީތުން ބައިވެރިވާ މުބާރާތަށް، ސަރުކާރުން މިތިބީ މި މުބާރާތް ކާމިޔާބު މުބާރާތަކަށް ހަދައިދިނުމުގެ އަޒުމުގައި" މަޚްލޫފް ވިދާޅުވިއެވެ.
ބޮޑީބިލްޑިން އެސޯސިއޭޝަން އޮފް މޯލްޑިވްސްގެ ރައީސް އިބްރާހިމް ހަމީދު ވިދާޅުވީ މިއީ ބޮޑީބިލްޑިންގެ ހަޔާތުގައި ފާހަގަކޮށްލެވޭ މުބާރާތެއް ކަމަށެވެ.
"މިއީ ބޮޑީބިލްޑިންގެ 15 އަހަރުގެ ކެރިއަރުގެ ތެރޭގައި ހުވަފެނުންވެސް ނުދެކޭވަރުގެ މުބާރާތެއް، ރާއްޖޭގެ އެތުލީޓުން 2000 ވަނަ އަހަރު އޭރު ސައުތު އޭޝިއަން މުބާރާތުގައި ވާދަކުރި އެތުލީޓުންނާއި މިހާރު ތިބި އެތުލީޓުންނާއި އަޅާބަލާއިރު ތަފާތުތަަކެއް ފެންނާނެ. އެއީ ފާއިތުވި ދުވަސްތަކުގައި ކުރި މަސަައްކަތްތަކުގެ ނަތީޖާ" ހަމީދު ވިދާޅުވިއެވެ.
މުބާރާތް ބޭއްވުމަށް ހަމަޖެހިފައިވަނީ 15-21 އަށް ކ. މާފުށީގައެވެ. އޭޝިއާ ބައްރުގެ 26 ގަައުމަކުން 500 އަށްވުރެ ގިނަ ބައިވެރިން މި މުބާރާތުގައި ވާދަަކުރާނެއެވެ. މިއީ ރާއްޖޭގެ ތާރީޚުގައި މިހާތަނަށް ބާއްވާ އެންމެ ފުރަތަމަ ބޮޑީބިލްޑިން މުބާރާތެވެ. މި މުބާރާތް ރާއްޖޭގައި ބާއްވާއިރު، އެ މުއްދަތުގެ ތެރޭގައި އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ފެޑަރޭޝަނުގެ ކޮންގްރެސްވެސް ރާއްޖޭގައި ބާއްވާނެ ކަމަށް ބޮޑީބިލްޑިން އެސޯސިއޭޝަނުން މައުލޫމާތުދެއެވެ.
ރާއްޖެއިން މި މުބާރާތުގައި 20 އެތުލީޓުން ވާދަކުރާއިރު، އޭގެ ތެރޭގައި ރާއްޖެއަށް މީގެކުރިން މެޑެލް ހާސިލުކޮށްދިން އެތުލީޓުންނާއި އަލަށް ބައިނަލްއަގުވާމީ މުބާރާތެއްގައި ވާދަކުރާ އެތުލީޓުން ހިމެނެއެވެ.
މި ފަހަރުގެ އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ ބްރޯޑްކާސްޓިން މީޑިއާ ޕާޓްނަރަކީ ޕަބްލިކް ސާވިސް މީޑިއާ (ޕީއެސްއެމް) އެވެ.