ޖަނަވާރަށް ޖެހޭ ނުރައްކާތެރި ބައްޔެއް ކަމުގައިވާ ފުޓް އެންޑް މައުތް ބަލި އިންޑޮނޭޝިޔާގެ ބައެއް ސަރަޙައްދުތަކުގައި ފެތުރެމުންދާތީ އެ ކަމާ ސަމާލުވުމަށް އެ ޤައުމުގެ ޞިއްޙަތާ ބެހޭ އިދާރާތަކުން އިންޒާރު ކޮށްފިއެވެ. މި ބަލި ފެތުރެން ފަށާފައި މި ވަނީ މުސްލިމުންގެ އެންމެ ބޮޑު ޢީދު ކަމުގައިވާ އަޟްހާ ޢީދު ފާހަގަ ކުރުމަށް ތައްޔާރުވަމުންދާ ދަނޑިވަޅެއްގައެވެ.
ފުޓް އެންޑް މައުޓް ބައްޔަކީ ނައަމްސޫފީގެ ތެރެއިން ގެރި، ބަކަރި، އަދި ކަންބަޅި ފަދަ ޖަނަވާރަށް ޖެހޭ ނުރައްކާތެރި ބައްޔެކެވެ. މި ބަލި ޖެހިފައިވާ 317,000 އަށްވުރެ ގިނަ ޖަނަވާރު އެ ޤައުމުން މިހާތަނަށް ފެނިފައިވާ އިރު، އޭގެ ތެރެއިން 3,400 ޖަނަވާރު މިހާރު ވަނީ މަރައިލާފައެވެ.
މި ބަލި ހަލުވި ކަމާއެކު ފެތުރެމުން ދާތީ، އިންޑޮނޭޝިޔާގެ ޞިއްޙަތާ ބެހޭ ވުޒާރާއިން ވަނީ ޖަނަވާރުތަކަށް ވެކްސިން ދިނުމަށް ޚާއްޞަ ކެމްޕޭނެއް ފަށާފައެވެ. މިއީ، ޖަނަވާރުތަކަށް ނުރައްކާތެރި ބައްޔެއް ކަމުގައިވީ ނަމަވެސް، މި ބަލީގެ ސަބަބުން އިންސާނުންގެ ޞިއްޙަތަށް އޮންނަ ނުރައްކާތެރި ކަން ކުޑައެވެ.
މިއީ، 1986 ވަނަ އަހަރުގެ ފަހުން މި ބަލި ޖެހިފައިވާ ގިނަ އަދަދެއްގެ ޖަނަވާރުތަކެއް އެ ޤައުމުން ފެނުނު ފުރަތަމަ ފަހަރެވެ. އެ ޤައުމުން އަނެއްކާ ވެސް މި ބަލި ފެނިފައި ވަނީ ހުސްވި މޭ މަހުގެ ތެރޭގައެވެ.