އިނގިރޭސިވިލާތުގެ ބޮޑުވަޒީރު ބޮރިސް ޖޮންސަން އޭނާގެ މާލީ ވަޒީރުކަމުގެ މަޤާމަށް ނަދީމް ޒަހާވީ ޢައްޔަން ކުރައްވައިފިއެވެ. އެ މަޤާމަށް ޒަހާވީ ޢައްޔަން ކުރައްވާފައި މި ވަނީ އެ މަޤާމު ފުރުއްވަމުން ގެންދެވި ރިޝީ ސުނާކު އިސްތިއުފާ ދެއްވުމާ ގުޅިގެންނެވެ. ސުނާކާ އެކު އެ ޤައުމުގެ ޞިއްޙަތާ ބެހޭ ވަޒީރު ސާޖިދު ޖާވިދު ވެސް ވަނީ އިސްތިއުފާ ދެއްވާފައެވެ.
55 އަހަރުގެ ޒަހާވީ އިނގިރޭސިވިލާތުގެ މާލީ ވަޒީރުގެ މަޤާމާ ހަވާލުވެފައިވަނީ އެ ޤައުމުގެ އިޤްތިޞާދީ ދުވެލި މަޑު ޖެހި، އިންފްލޭޝަން އުފުލި، ތަކެތީގެ އަގުތައް އުފުލެމުންދާ ދަނޑިވަޅެއްގައެވެ. އަދި، ދުނިޔޭގެ އިޤްތިޞާދަށް އަންނަމުންދާ ލޮޅުންތަކުގެ ސަބަބުން އެ ޤައުމުގެ ރައްޔިތުންނަށް ކުރަމުންދާ އަސަރުތަކުން އަރައިގަތުމަށް އެހީތެރިވެ ދިނުމަށް ބާރުއަޅަމުންދާ ވަގުތެއްގައެވެ.
އިނގިރޭސިވިލާތުގެ އިންފްލޭޝަން ރޭޓު ވަނީ މިދިޔަ 40 އަހަރު ނުއުފުލޭ މިންވަރަކަށް އުފުލިފައެވެ. މޭ މަހު އެ ޤައުމުގެ އިންފްލޭޝަން ރޭޓު ހުރީ 9.1 އިންސައްތައިގައެވެ. އަދި، އޮކްޓޯބަރު މަހުގެ ތެރޭގައި 11 އިންސައްތައަށް އަރާނެ ކަމަށް މަރުކަޒީ ބޭންކުން ލަފާ ކުރެއެވެ.
މާލީ ވަޒާރާ ހަވާލުވެ ވަޑައިގަތުމުގެ ކުރިން ޒަހާވީ ހުންނެވީ ޖޮންސަންގެ ތަޢުލީމާ ބެހޭ ވަޒީރުގެ މަޤާމުގައެވެ. އޭގެ ކުރިން އޭނާ ހުންނެވީ ކޮވިޑް-19ގެ ވެކްސިން ޖެހުމުގެ އިންތިޒާމުތައް މަތިކޮށްފައިވާ ވަޒީރުގެ މަޤާމުގައެވެ. ތަޢުލީމީ ވުޒާރާއަށް އޭނާ ޢައްޔަން ކުރައްވާފައި ވަނީ 2021 ވަނަ އަހަރުއެވެ.
ޖޮންސަން ސަރުކާރު ހިންގަވާ ގޮތާމެދު ހިތްހަމަނުޖެހުން ފާޅުކޮށް އެ ޤައުމުގެ މާލީ ވަޒީރާއި ޞިއްޙަތާ ބެހޭ ވަޒީރު އިސްތިއުފާ ދެއްވާފައިވާ މި ދަނޑިވަޅުގައި އިންގްލެންޑާއި ވޭލްސްގެ ސޮލިސިޓަރ ޖެނެރަލް އެލެކްސް ޗޯކް ވެސްވަނީ އިސްތިއުފާ ހުށަހަޅުއްވާފައެވެ. އަދި، ޖޮންސަންގެ ކޮންޒަވެޓިވް ޕާޓީ ތަމްސީލު ކުރައްވާ ދެ ޕާލިމެންޓަރީ ޕްރައިވެޓް ސެކްރެޓަރީން ކަމުގައިވާ ޖޮނެތަން ގޫލީސްއާއި ސަޤީބު ބައްޓީ ވެސް ވަނީ އިސްތިއުފާ ދެއްވާފައެވެ.