ބިދޭސީން ގެނައުމަށް ސަރުކާރުން އުފެއްދި ޕޯޓަލްގެ ނަކަލުތަކެއް، ސަމާލްވޭ!

ބިދޭސީން ގެނައުމުގެ މަސައްކަތް ކުރުމަށް އިކޮނޮމިކް މިނިސްޓްރީން އުފައްދާފައިވާ ފޯޓަލް ނަކަލުކޮށް، ނަހަމަގޮތުގައި ބޭނުންކުރަމުންދާކަން ފާހަގަކުރެވިފައިވާތީ އެކަމަށް ސަމާލްވުމަށް މިނިސްޓްރީން އެދިއްޖެއެވެ.

މިނިސްޓްރީން މިވަނީ މިގޮތަށް މިހާތަނަށް ފާހަގަކުރެވުނު ވެބްސައިޓްތަކުގެ މަޢުލޫމާތު އާއްމުކޮށްފައެއެވެ. އެގޮތުން 6 ވެބްސައިޓެއްގެ އެޑްރެސް އާއްމުކޮށް، މި ވެބްސައިޓްތައް ބޭނުން ނުކުރުމަށް ވަނީ އިލްތިމާސްކޮށްފައެވެ.

އޮޅުވާލައިގެން މަޢުލޫމާތު ހޯދަމުންދާ ވެބްސައިޓްތައް:

http://immigrationgovnv.org
http://xpat-egomv.com
https://xpategov.com
https://www.xpat-gov.com
https://www.xpat-egov.online
http://xpategovmv.org

މިނިސްޓްރީން ވިދާޅުވީ އޮޅުވާލައިގެން މިފަދަ ޕޯޓަލްތަކާއި ވެބްސައިޓްތައް ހަދަމުންދަނީ މީހުންގެ ޒާތީ މަޢުލޫމާތު ހޯދާ އޭގެ ބޭނުން ނަހަމަގޮތުގައި ހިފުމަށްކަމަށެވެ.

މިނިސްޓްރީންވަނީ ބިދޭސީން ގެނައުމުގެ ކަންކަމުގައި ޕޯޓަލް ބޭނުންކުރާ ފަރާތްތަކުން، ޕޯޓަލްގެ ސައްޙަކަން ކަށަވަރުކުރުމަށް އެދިފައެވެ. މި މަސައްކަތަށް މިިނިސްޓްރީން ޚިދުމަތްދޭ ޕޯޓަލްއަކީ https://xpat.egov.mv އެވެ. މިނިސްޓްރީންވަނީ ބިދޭންސީން ގެނައުމާއި ގުޅޭ އެއްވެސް ރަސްމީ މަޢުލޫމާތެއް އެހެން ވެބްސައިޓްތަކާއި ހިއްސާ ނުކުރުމަށް އެދިފައެވެ. އަދި މިފަދަ ޕޯޓަލްއެއް ނުވަތަ ވެބްސައިޓެއް ފާހަގަކުރެއްވިޖެނަމަ އެކަން މިނިސްޓްރީއަށް އެންގުމަށް އެދިފައެވެ. މިފަދަ ވެބްސައިޓަކަށް ލޮގިން ކުރެވިފައިވާނަމަ، ނުވަތަ ޝައްކު ކުރެވޭނަމަ ޕާސްވޯޑް ރިސެޓް ކުރުމަށް ވަނީ އެދިފައެވެ.

އޮންލައިންކޮށް ކުރިއަށްގެންދާ ކަންކަމުގައި، އޮޅުވާލައިގެން މަޢުލޫމާތު ހޯދުމާއި ފައިސާ ހޯދުންފަދަ ކަންކަން ދަނީ އިތުރުވަމުންނެވެ. މިއާއި ގުޅިގެން، މިފަދަ މަޢުލޫމާތު ޙިއްސާ ކުރުމުގައާއި، ޚާއްސަކޮށް ފައިސާގެ މުއާމަލާތްތައް ހިންގުމުގައި ޚާއްސަ އިސްކަމެއް ދިނުމަށް ފުލުހުންވެސް އަންނަނީ އިލްތިމާސްކުރަމުންނެވެ. އޮޅުވާލައިގެން ބޮޑެތި އަދަދުތަކުން ފައިސާ ހޯދުންފަދަ ކަންކަން ފުލުހަށް ރިޕޯޓްކުރާ މިންވަރުވެސް ދަނީ އިތުރުވަމުންނެވެ.