މިއަހަރުގެ އަޟްޙާ ޢީދުގައި ހަވާއެރުވުމަށް މިހާތަނަށް 18 ރަށަކުން އެދިފައިވާ ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީ އެފުން ވިދާޅުވީ 18 ރަށެއްގެ ކައުންސިލުން ވިޔަފާރި އުސޫލުން، ހަވާއަރުވައިދިނުމަށް އެމްއެންޑީއެފްގެ ސިފްކޯގައި އެދިފައިވާ ކަމަށެވެ. ވިޔަފާރި އުސޫލުން ހަވާ އެރުވުމަށް އެދިފައިވާ ރަށްތަކަކީ ހއ.ބާރަށް، ހއ.ދިއްދޫ، ހއ.ވަށަފަރު، ނ.ވެލިދޫ، ނ.ހޮޅުދޫ، ނ.ފޮއްދޫ، ރ.މާކުރަތު، ބ.ފުޅަދޫ، ބ.ދަރަވަންދޫ، ބ.އޭދަފުށި، ކ.ދިއްފުށި، ކ.ގުރައިދޫ، ކ.ހިންމަފުށި، ކ.ގާފަރު، އއ.ތޮއްޑޫ، އއ.އުކުޅަސް، ގދ.ފިޔޯރީ، އަދި ސ.ހިތަދޫއެވެ.
އެމްއެންޑީއެފުން ވިދާޅުވީ އެ މުއައްސާއިން ރާވައިގެން، މިއަހަރުގެ އަޟްޙާ ޢީދުގައި ހަވާ ނާރުވާނެކަމަށެވެ.
މިއަހަރު މާލެ ސަރަޙައްދުގައި ކުރިއަށްގެންދިއުމަށް ނިންމި ހަވާއެރުވުމުގެ ހަރަކާތްވެސް ވަނީ ކެންސަލްކޮށްފައެވެ. އެގޮތުން އެޗްޑީސީން ހުޅުމާލޭގައި ބޭއްވުމަށް ނިންމި ހަވާ އެރުވުމުގެ ހަރަކާތް ނުބޭއްވުމަށް ނިންމީ، ކޯވިޑްގެ ޙާލަތާއި ގުޅިގެން އަޅާ ރައްކާތެރިކަމުގެ ފިޔަވަޅެއްގެ ގޮތުން ކަމަށް އެޗްޑީސީންވަނީ ހާމަކޮށްފައެވެ.