"މޯލްޑިވިއަން ފްލައިން އެކަޑަމީ" ހިންގުމުގެ ހުއްދަ މޯލްޑިވްސް ސިވިލް އޭވިއޭޝަން އޮތޯރިޓީން އެއެކަޑަމީއަށް ދޫކޮށްފިއެވެ. ހުއްދަ ދޫކުރީ އެކަޑަމީ ގާއިމްކޮށް ހިންގުމަށް ބޭނުންވާ ހުރިހާ މަސައްކަތް ފުރިހަމަކޮށް މޯލްޑިވްސް ސިވިލް އޭވިއޭޝަން އޮތޯރިޓީން ހަދަންޖެހޭ އިންސްޕެކްޝަންތައް ހަދާ ނިމުމުންނެވެ.
އައިލެންޑް އޭވިއޭޝަނުން ވިދާޅުވީ މިމަހުގެ 10ވަނަ ދުވަހުން ފެށިގެން، ބޯޓު ދުއްވުމުގެ ޕްރެކްޓިކަލް ގަޑިތައް ފަށާނެކަމަށެވެ. އެގޮތުން ފްލައިން ގަޑިތައް އެންމެ ފުރަތަމަ ފަށާނީ އައްޑޫ ފްލައިން އެކެޑަމީން ޕައިލެޓް ޓްރެއިނިން ހަދަމުން ދިޔަ ދަރިވަރުންގެ ތެރެއިން، ފުރަތަމަ ބެޗްގައި ރިފްރެޝަރ ޕްރޮގްރާމް ނިންމާފައިވާ 35 ދަރިވަރުންނާއެކުއެވެ. ދެވަނަ ބެޗްގައި 39 ދަރިވަރުންނާއެކު ރިފްރެޝަރ ޕްރޮގްރާމްވަނީ ފަށާފައެވެ. ފުރަތަމަ ބެޗްގެ ފްލައިން ނިމެމުންދާވަރަކުން ދެވަނަ ބެޗްގެ ދަރިވަރުންނަށް ފްލައިން ފުރިހަމަކުރުމުގެ ފުރުޞަތު ލިބޭނެއެވެ.
އައިލެންޑް އޭވިއޭޝަނުން ވިދާޅުވީ އުއްމީދު ކުރަނީ މިއަހަރު ނިމުމުގެ ކުރިން މި 74 ދަރިިވަރުންގެ ފްލައިން ގަޑިތައް ފުރިހަމަކުރެވޭނެކަމަށް ކަމަށެވެ. މީގެ އިތުރުން، އިތުރު ބެޗެއްގެ ރިފްރެޝަރ ޕްރޮގްރާމްވެސް މިއަހަރު ފަށާނެއެވެ.
މޯލްޑިވިއަން އޭވިއޭޝަން އެކަޑަމީއަކީ ޗެކް ރިޕަބްލިކްގެ ފްލައިން އެކަޑަމީއާއި ގުޅިގެން ގާއިމްކުރާ ސްކޫލެކެވެ. އެހެންކަމުން މޯލްޑިވިއަން އޭވިއޭޝަން އެކަޑަމީ ހިންގަމުންދާނީ މޯލްޑިވްސް ސިވިލް އޭވިއޭޝަނާއި ޔޫރަޕިއަން އޭވިއޭޝަން ސޭފްޓީ އެޖެންސީގެ ސްޓޭންޑަޑްތަކާ އެއްގޮތަށެވެ.
މިއީ ދިވެހި ފުރަތަމަ ފްލައިން ސްކޫލެވެ. މި ސްކޫލް އުފެއްދީ އައްޑޫގައި ހިންގަމުން އައި، ފްލައިން ސްކޫލްގެ ކިޔެވުން ހުއްޓި އޭގެ ޝަކުވާ ބޮޑުވުމާއި ގުޅިގެންނެވެ. ސްކޫލްގެ ތިއަރީ ގަޑިތައް މިއަހަރުގެ ޖެނުއަރީ މަހުވަނީ ފަށާފައެވެ.