އޮސްޓްރޭލިޔާގެ އިރުދެކުނުގެ ސަރަޙައްދުތަކަށް ހުއްޓުމެއްނެތި ބޯކޮށް ވާރޭ ވެހުމުގެ ސަބަބުން ގިނަ ހިސާބުތަކެއްގައި ފެންބޮޑުވެއްޖެއެވެ. އޮސްޓްރޭލިޔާގެ އެންމެ ބޮޑު އެއް ރަށް ކަމުގައިވާ ސިޑްނީގެ ހުޅަނގު ދެކުނުގެ ސަރަޙައްދުތަކުގައި ފެންބޮޑުވުމާ ގުޅިގެން ގިނަ އަދަދެއްގެ ބަޔަކުވަނީ ރައްކާތެރި ހިސާބުތަކަށް ބަދަލުކޮށްފައެވެ. އަދި، އެ ޤައުމުގެ އިރުމަތީގެ އައްސޭރިފަށުގެ ގިނަ ސަރަޙައްދުތަކަށް ވެސް ވިއްސާރައިގެ އަސަރު ވަނީ ކޮށްފައެވެ.
ނިއު ސައުތް ވޭލްސްއަށް ހުއްޓުމެއްނެތި ވާރޭ ވެހެމުންދާތީ އެ ސްޓޭޓްގެ ނިއުކާސްލްއިން ފެށިގެން ބޭޓްސްމަން ބޭއާ ދޭތެރޭގެ ސަރަޙައްދުގައި ބިންގަނޑު ކަނޑައިގެން ދިޔުމާއި ކިސަޑު ފޭބުމުގެ ހާދިސާތައް ހިނގައިފާނެ ކަމުގެ އިންޒާރު ވަނީ ކޮށްފައެވެ. އޮސްޓްރޭލިޔާގެ ގިނަ ސަރަޙައްދުތަކަށް 200 މިލިމީޓަރާއި 350 މިލިމީޓަރާ ދެމެދުގެ އަދަދަކަށް ވާރޭ ވެހިފައިވާ ކަމަށް އެ ޤައުމުގެ މޫސުމާ ބެހޭ އިދާރާއިން ބުނެއެވެ.
ވިއްސާރައިގައި މިހާތަނަށް އެންމެ ބޮޑަށް އަސަރުކޮށްފައި ވަނީ ސިޑްނީއަށެވެ. އެ ސްޓޭޓްގެ ގިނަ ސަރަޙައްދުތަކެއްގައި ފެންބޮޑުވާން މެދުވެރިވީ، މައި އެއް ކޯރު ފުރިގެން ބަންޑުންވުމުންނެވެ. ފެންބޮޑުވުމާ ގުޅިގެން ގެދޮރުގައި ބަންދުވެފައިވާ 29 މީހަކު މިހާރު ވެސް ސަލާމަތްކޮށްފައި ވާ ކަމަށާއި، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް އަސްކަރިއްޔާއިން ހަރަކާތްތެރިވަމުންދާ ކަމަށް އޮފިޝަލުން ބުނެއެވެ.
އޮސްޓްރޭލިޔާގެ ދިފާޢީ ވަޒީރު ރިޗަރޑް ޗާލްސް ވިދާޅުވީ، ގެތަކުގެ ދޮރުމަތީގައި ވެލިބަސްތާ ޖެހުމުގައި ސިފައިން ހަރަކާތްތެރިވަމުން ދާއިރު، ގެދޮރުގައި ބަންދުވެފައިވާ މީހުން ސަލާމަތް ކުރުމަށް ދެ ހެލިކޮޕްޓަރު ބޭނުން ކުރަމުންދާ ކަމުގައެވެ.