ރަޝިޔާ ސިފައިން ޔޫކްރެއިނަށް އަރައި ކުރަމުންދާ ހަނގުރާމައިގައި އެ ޤައުމަށް ލިބެމުންދާ ބޮޑެތި ގެއްލުންތަކުން އަރައިގަތުމަށް އެހީތެރިވުމުގެ ގޮތުން 1 ބިލިޔަން ޑޮލަރު އެހީގެ ގޮތުގައި ދޭން ނޯވޭއިން ނިންމައިފިއެވެ. މި ހަނގުރާމައަށް ހަތަރު މަހަށްވުރެ ގިނަ ދުވަސް ވެފައި ވާއިރު، އިންޑިޔާގެ ބޮޑުވަޒީރު ނަރެންދުރަ މޯދީ ވެސް މި ވަނީ، ހަނގުރާމަ ހުއްޓައިލުމަށް ބާރުއަޅަމުންދާ އިސްވެރިންގެ ލިސްޓަށް އަރާފައެވެ.
ޔޫކްރެއިނަށް ތާޢީދު އޮތް މިންވަރު ހާމަކޮށްދިނުމަށް އެކި ޤައުމުތަކުގެ އިސްވެރިން ދަނީ އެ ޤައުމަށް ޒިޔާރަތް ކުރަމުންނެވެ. އެންމެ ފަހުން އެ ޤައުމަށް ވަޑައިގަންނަވާފައި މި ވަނީ ނޯވޭގެ ބޮޑުވަޒީރު ޔޯނަސް ގާރް ސްޓޯރާއެވެ. އަދި، ވެރިރަށް ކީވަށް ވަޑައިގަންނަވާ އެ ޤައުމުގެ ރައީސް ވޮލޮޑޮމީރް ޒެލެންސްކީއާ ބައްދަލުކުރެއްވިއެވެ.
މި ބައްދަލު ކުރެއްވުމަށް ފަހު ނޫސްވެރިންނާ ވާހަކަފުޅު ދައްކަވަމުން ސްޓޯރާ ވިދާޅުވީ ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްދިނުމަށާއި، އެ ޤައުމުގެ ރައްޔިތުންނަށް އިންސާނީ އެހީ ފޯރުކޮށްދިނުމަށް ނޯވޭއިން 1 ބިލިޔަން ޑޮލަރު އެހީގެ ގޮތުގައި ދޭނެ ކަމުގައެވެ. ރަޝިޔާގެ ހަމަލާތަކާ ދެކޮޅަށް ޔޫކްރެއިންގެ ސިފައިން ދައްކަމުންދާ ހިތްވަރާ މެދު އޭނާ ވިދާޅުވީ، އެ ސިފައިން ހަނގުރާމަ ކުރަމުން ދަނީ ހަމައެކަނި އެ ޤައުމުގެ ރައްޔިތުންގެ ދިފާޢުގައި ނޫން ކަމަށާއި، އެއީ ދުނިޔޭގެ ހުރިހާ ރައްޔިތުންގެ ދިފާޢުގައި ކުރަމުންދާ ހަނގުރާމައެއް ކަމުގައެވެ. އަދި، މިއީ ވިލާތުގެ ޤައުމުތަކުގެ ސަލާމަތާއި ރައްކާތެރިކަމާ ގުޅިފައިވާ ހަނގުރަމައެއްގެ ގޮތުގައި އޭނާ ސިފަ ކުރެއްވިއެވެ. މި ބައްދަލުވުމުގައި ވާހަކަފުޅު ދައްކަވަމުން ޒެލެންސްކީ ވަނީ، ރަޝިޔާގެ ހަނގުރާމަ ހުއްޓައިލާ އެ ޤައުމުން ފައިބަން ބާރު އަޅައިދިނުމަށް ބައިނަލްއަޤްވާމީ މުޖުތަމަޢަށް ގޮވައިލައްވާފައެވެ. އަދި، ޢާންމުން ދިއިރުޅޭ ޢިމާރާތްތަކަށް ވެސް ރަޝިޔާއިން ހަމަލާދެމުން ދާކަން އޭނާ ފާހަގަކުރެއްވިއެވެ.
މިދިޔަ ހަފުތާގައި ރަޝިޔާއިން ވަނީ ޔޫކްރެއިނުގެ ޢާންމުން ދިރިއުޅޭ ނުވަ ބުރީގެ ޢިމާރާތަކާއި ޝޮޕިންގ މޯލަކަށް މިސައިލް ހަމަލާތަކެއް ދީ ޢާންމުންގެ ގިނަ އަދަދެއްގެ ބަޔަކު މަރައިލާފައެވެ. އެޕާޓްމަންޓަށް ދިން ހަމަލާގައި 16 މީހުން މަރުވިއެވެ. ނަމަވެސް، ޢާންމުން ދިރިއުޅޭ ތަންތަނަށް ހަމަލާތައް އަމާޒު ކުރަމުން ނުދާ ކަމަށް ރަޝިޔާއިން ބުނެއެވެ.
ރަޝިޔާއިން ފަށާފައިވާ ހަނގުރާމަ ހުއްޓައިލުމަށް އެންމެ ފަހުން ގޮވައިލައްވާފައިވާ ލީޑަރަކީ އިންޑިޔާގެ ރައީސް ނަރެންދުރަ މޯދީއެވެ. ރަޝިޔާގެ ރައީސް ވްލަޑިމިއަރ ޕުޓިންއާ ފޯނުން ވާހަކަފުޅު ދައްކަވަމުން މޯދީ ވަނީ، ޔޫކްރެއިނާ ދެމެދު ޖެހިފައިވާ މައްސަލަ ޞުލްޙަވެރިކަމާ އެކު ހައްލު ކުރުމަށް ޕުޓިންއަށް ގޮވައިލައްވާ، ހަނގުރާމަ ހުއްޓައިލުމަށް ހިތްވަރު ދެއްވާފައެވެ. އަދި، މި ކަމުގައި މަޝްވަރާ އިސްކުރުމަށް ވެސް މޯދީ ގޮވައިލެއްވިއެވެ.
ރަޝިޔާގެ އަތްދަށުން ޔޫކްރެއިން މިނިވަން ކުރުމަށް ހަނގުރާމަ ކުރަމުންދާ ސިފައިންނަށް އަސްކަރީ ގޮތުން އެހީތެރިކަން ފޯރުކޮށްދޭން ހުޅަނގުގެ ބާރުތަކުން ދަނީ މަސައްކަތް ކުރަމުންނެވެ. އެމެރިކާގެ ރައީސް ޖޯ ބައިޑަން މިދިޔަ ހަފުތާގައި ވަނީ ޔޫކްރެއިނަށް 820 މިލިޔަން ޑޮލަރުގެ އަސްކަރީ ސާމާނު ފޯރުކޮށްދޭނެ ކަމަށް ވިދާޅުވެފައެވެ.
މި އެހީގެ ޕެކޭޖުގައި ވައިގެ އަމާޒުތަކަށް ހަމަލާދޭން ބޭނުންކުރާ “ނަސަމްސް” މަރުކާގެ ދެ މިސައިލް ސިސްޓަމާއި، އާޓިލަރީ ބަޑީގެ ރާޑަރު ސިސްޓަމާއި، އާޓިލަރީ ބޮން ހިމެނެއެވެ. މީގެ އިތުރުން، “ހައިމާސް” މަރުކާގެ މިސައިލް ސިސްޓަމްތަކެއް ވެސް ހިމެނޭނެއެވެ. ޔޫކްރެއިނުގެ ޢާންމު ރައްޔިތުން ޤަތުލު ކުރަމުންދާ މަންޒަރު ބަލަން އެމެރިކާއަށް ހަމަޖެހިގެން ނޯވެވޭނެ ކަމުގައި އެ ޤައުމުގެ ޚާރިޖީ ވަޒީރު އެންތަނީ ބްލިންކެން ވިދާޅުވިއެވެ.
އެންމެ ފަހުގެ އެހީއާއެކު މި ހަނގުރާމައާ ގުޅިގެން އެމެރިކާއިން ޔޫކްރެއިނަށް ފޯރުކޮށްދީފައިވާ އަސްކަރީ އެހީގެ އަދަދު މި ވަނީ 6.9 ބިލިޔަނަށް އަރާފައެވެ. ޕުޓިން އޭނާގެ ސިފައިން ޔޫކްރެއިނަށް ފޮނުވައި ހަނގުރާމަ ފަށާފައި ވަނީ “ނާޒީން”ގެ އަތް ދަށުން އެ ޤައުމު މިނިވަން ކުރުމުގެ ނަމުގައި ފެބުރުއަރީ މަހުގެ 24 ވަނަ ދުވަހުއެވެ.