އެމެރިކާގެ ޓެކްސަސްއަށް ހޫނުގެ ތޫފާނެއް ކުރިމަތިވެ، ކަރަންޓު ބޭނުންކުރާ މިންވަރު އިންތިހާއަށް މައްޗަށް އަރައިފިއެވެ.
ޓެކްސަސްގެ ބޮޑު ސަރަޙައްދަކަށް ކަރަންޓުގެ ޚިދުމަތް ފޯރުކޮށްދޭ އިލެކްޓްރިކް ރިލަޔަބިލިޓީ ކައުންސިލް އޮފް ޓެކްސަސްއިން ބުނީ، އެ ސްޓޭޓްގައި ކަރަންޓު ބޭނުން ކުރާ މިންވަރު ރެކޯޑް މިންވަރަކަށް މައްޗަށް ގޮސްފައިވާ ކަމުގައެވެ. އެ ކުންފުންޏަކީ ޓެކްސަސްގެ 26 މިލިޔަން ރައްޔިތުންނަށް ޚިދުމަތް ފޯރުކޮށްދޭ ކުންފުންޏެކެވެ. އެއީ، މުޅި ޓެކްސަސްގެ އާބާދީގެ ގާތްގަނޑަކަށް 90 އިންސައްތައެވެ. ކަރަންޓު ބޭނުން ކުރާ މިންވަރު އިތުރުވި ނަމަވެސް، މެދުކެނޑުމެއް ނެތި ޚިދުމަތް ފޯރުކޮށްދެވޭނެ ކަމުގެ ޔަގީންކަން އޮތް ކަމުގައި އެ ކުންފުނިން ބުނެއެވެ.
ޓެކްސަސްގައި ދުވާލެއްގެ މައްޗަށް ބޭނުން ކުރާ ކަރަންޓުގެ މިންވަރު ޖުލައި 7 ގައި 78,000 މެގަވޮޓަށް ވުރެ މައްޗަށް އަރާނެ ކަމަށް އަންދާޒާ ކުރެވެއެވެ. ހަކަތަ އުފައްދާ މިންވަރު އިތުރު ކުރުމަށް އެ ކުންފުނިން މިހާރު ވެސް ދަނީ މަސައްކަތް ކުރަމުންނެވެ.
މި ގޮތުން އަލަށް ބަހައްޓާފައިވާ އަވިންނާއި ވައިން ހަކަތަ އުފައްދާ ނިޒާމުތައް މި އަހަރުގެ ފަހުކޮޅު ބޭނުން ކުރަން ފަށާނެ ކަމަށާއި، އޭރުން ދުވާލެއްގެ މައްޗަށް އުފައްދާ ހަކަތައިގެ މިންވަރު 91,000 މެގަވޮޓަށް އިތުރު ކުރެވޭނެ ކަމަށް އެ ކުންފުނިން ބުނެއެވެ. ޢާންމު ދުވަހެއްގައި ޓެކްސަސްގެ 1,000 ގޭބީސީއިން ދުވާލަކު ބޭނުން ކުރަނީ 1 މެގަވޮޓުގެ ކަރަންޓެވެ. ނަމަވެސް، ހޫނު މޫސުމުގައި 1 މެގަވޮޓުން ޚިދުމަތް ދެވެނީ އެންމެ 200 ވަރަކަށް ގޭބީސީއަށެވެ.
ޓެކްސަސްގައި ފިނިހޫނުމިން މިހާރު ހުރީ 32 ޑިގްރީ ސެލްސިއެސްއަށް ވުރެ މަތީގައެވެ. ހޫނު ގަދަވުމާ އެކު، އެ ސްޓޭޓްގެ ރައްޔިތުންގެ ހަނދާނަށް އަންނަނީ މިދިޔަ އަހަރުގެ ފެބުރުއަރީ މަހު އެ ސްޓޭޓަށް ކުރިމަތިވި ފިނީގެ ތޫފާނުގައި ކަރަންޓުގެ ޚިދުމަތް ކެނޑުމާ ގުޅިގެން ކުރިމަތިވި ދަތި ހާލެވެ.