ތައިލެންޑާއި މިޔަންމާ ގުޅޭ ސަރަޙައްދީ އިން ހުރަސްކޮށް، މިޔަންމާގެ އަސްކަރީ މަތިންދާބޯޓުތަކެއް ތައިލެންޑުގެ ވައިގެ ސަރަޙައްދަށް ވަދެއްޖެއެވެ. މިކަމާ ގުޅިގެން، ތައިލެންޑުގެ އަސްކަރިއްޔާއިން ވަނީ މިޔަންމާގެ ބޯޓުތަކާ ކުރިމަތިލާން އެ ޤައުމުގެ އަސްކަރީ މަތިންދާބޯޓުތައް އުދުއްސާލާފައެވެ.
ތައިލެންޑުން ބުނީ މިޔަންމާގެ އަސްކަރީ މަތިންދާބޯޓުތައް ވަދެވަފައި ވަނީ އެ ޤައުމުގެ ތާކް ޕުރޮވިންސުގެ ވައިގެ ސަރަޙައްދަށް ކަމުގައެވެ. މިޔަންމާގެ އުޅަނދުތައް ތައިލެންޑުގެ ސަރަޙައްދަށް ވަދެފައިވަނީ، ދެ ޤައުމު ގުޅޭ ހިސާބުގައި މިޔަންމާގެ ފަޅީގައި ދިރިއުޅޭ ބަޔަކަށް ހަމަލާ ދިނުމަށް މިޔަންމާގެ އަސްކަރިއްޔާއިން ހިންގަމުންދިޔަ އޮޕަރޭޝަނެއްގެ ތެރެއިން ކަމުގައި ތައިލެންޑުން ތުހުމަތު ކުރެއެވެ. އަދި، މި ކަމާ ގުޅިގެން މިޔަންމާގެ އަސްކަރީ ސަރުކާރަށް އިންޒާރުގެ މެސެޖެއް ފޮނުވާފައިވާނެ ކަމުގައި ތައިލެންޑުން ބުނެއެވެ.
ނަމަވެސް، ތައިލެންޑުގެ ބޮޑުވަޒީރު ޕްރަޔުތް ޗަން-އޮޗާ ވިދާޅުވީ މިއީ އެހާ ބޮޑު މައްސަލައެއްގެ ގޮތުގައި ނުދެކޭ ކަމުގައެވެ. އަދި، މިޔަންމާއިން މަޢާފަށް އެދިފައިވާ ކަމުގައި ވެސް އޭނާ ވިދާޅުވިއެވެ. މުހިންމު ކަމަކީ، ތައިލެންޑުގެ ވައިގެ ސަރަޙައްދު ދިފާޢު ކުރުމުގެ ޤާބިލިއްޔަތުކަން އެ ޤައުމުގެ އަސްކަރިއްޔާއަށް އޮތުން ކަމުގައި އޭނާ ދެކިވަޑައިގަންނަވައެވެ.
މި ކަމާ ގުޅޭ ގޮތުން މިޔަންމާގެ އަސްކަރީ ސަރުކާރުން ވަކި އެއްޗެއް ހާމަކޮށްފައެއް ނުވެއެވެ. އެ ޤައުމުގައި މިދިޔަ އަހަރު ހިންގި ބަޣާވާތަށްފަހު، ރަށްފުށުގެ ސަރަޙައްދުގައި ދިރިއުޅޭ ސަރުކާރާ ދެކޮޅު ފަރާތްތަކަށް އެ ޤައުމުގެ އަސްކަރިއްޔާއިން ދަނީ ހަމަލާ ދެމުންނެވެ. އަދި، ޢާންމުންނަށް އަމާޒުކޮށް ދޭ ހަމަލާތައް ވެސް ވަނީ އިތުރުކޮށްފައެވެ. ބަޣާވާތަށް ފަހު އެ ޤައުމުގެ 760,000 އަށްވުރެ ގިނަ މީހުން ރެފިޔުޖީންނަށް ވެފައިވާ ކަމުގައި އ.ދ.ގެ އިންސާނީ އެހީއާ ބެހޭ އިދާރާއިން ބުނެއެވެ.