ފިލިޕީންސްގެ ރައީސް މަޤާމާ ފަރޑިނާންޑް މާކޯސް ޖޫނިއަރ ހަވާލުވެ ވަޑައިގަންނަވައިފިއެވެ. އޭނާއަކީ، 1965 އަހަރުން ފެށިގެން ދެ ޤަރުނު ވަންދެން އެ ޤައުމުގައި ވެރިކަން ކުރެއްވި ފަރޑިނާންޑް މާކޯސްގެ ދަރިކަލުންނެވެ. “ބޮންގްބޮންގް”ގެ ނަމުން މަޝްހޫރުވެފައިވާ މާކޯސް ޖޫނިއަރ ފިލިޕީންސްގެ ވެރިކަމުގެ ހުވާ ކުރައްވާފައި މި ވަނީ އޭނާގެ ބައްޕާފުޅުގެ ވެރިކަން ވައްޓައިލިތާ 36 އަހަރު ފަހުންނެވެ.
ރައީސްކަމުގެ ހުވައި ކުރައްވާ ވާހަކަފުޅު ދައްކަވަމުން މާކޯސް ޖޫނިއަރ ވިދާޅުވީ، އޭނާގެ ބައްޕާފުޅުގެ ވެރިކަމަށް ފަހު ޤައުމުގެ ހާލަތު ގޯހުންގޯހަށް ގޮސްފައިވާ ކަމުގައެވެ. އަދި، އޭނާ އިސްކަން ދެއްވާނީ ޤައުމުގައި އެއްބައިވަންތަ ކަން ޤާއިމުކޮށް، ހުރިހާ ރައްޔިތުން އެއްހަމައެއްގައި ބަލައިގެން ޚިދުމަތް ދިނުމަށް ކަމުގައެވެ.
ވެރިކަމާ ހަވާލުވެ ވަޑައިގަތުމަށް ފަހު، އޭނާ އެންމެ ފުރަތަމަ ވެސް ކުރައްވާފައިވާ ކަމަކީ، ބައިނަލްއަޤްވާމީ މުޖުތަމަޢާ މެދު އޮތް ގުޅުން ބަދަހި ކުރުމުގެ މަސައްކަތް ފެއްޓެވުމެވެ. މި ގޮތުން، އޭނާގެ ޚާރިޖީ ވަޒީރުގެ މަޤާމަށް ޢައްޔަން ކުރައްވާފައި މިވަނީ، ޚާރިޖީ ދާއިރާގައި ތަޖުރިބާކާރު ބޭފުޅެއް ކަމުގައިވާ އެންރީކޭ މަނާލޯއެވެ. މަނާލޯ ކުރިން ހުންނެވީ އ.ދ.އަށް ފިލިޕީންސުން ކަނޑައަޅާފައި ހުންނަވާ ދާއިމީ މަންދޫބުގެ މަޤާމުގައެވެ.
ކުރީގެ ސަރުކާރުތަކާ ޚިލާފަށް ރައްޔިތުންނަށް ހެޔޮ ވެރިކަމެއް ކޮށްދެއްވާނެ ކަމަށް މާކޯސް ޖޫނިއަރ ވިދާޅުވި ނަމަވެސް، މިއީ އޭނާގެ ބައްޕާފުޅުގެ ވެރިކަން އަލުން އިޔާދަވުމަށް ލިބުނު ފުރުޞަތެއްގެ ގޮތުގައި ދެކޭ މީހުން މަދެއް ނޫނެވެ. މާކޯސްގެ ބައްޕާފުޅު ވެރިކަން ކުރައްވާފައި ވަނީ ގޮށްމުށުގެ ބާރުންނެވެ. އަދި، ސަރުކާރާ ދެކޮޅު އެތައް ހާސް ބަޔަކު ޖަލަށްލައިފައިވާއިރު، ގިނަ އަދަދެއްގެ ބަޔަކު ވީނުވީއެއް ނޭނގި ގެއްލުވައިލާފައިވެއެވެ. އަދި، ދައުލަތުގެ މާލިއްޔަތުން ވައްކަން ކޮށްފައިވާ ކަމުގައި ވެސް ތުހުމަތުކުރެވެއެވެ.