ބޮޑެތި ގެސްޓް ހައުސްތަކުގައި ތިބޭ ފަތުރުވެރިންގެ އަތުން ނަގާ ގްރީން ޓެކްސް ބޮޑުކުރަން ރައްޔިތުންގެ މަޖިލީހުން ފާސްކޮށްފިއެވެ.
ގްރީން ޓެކްސް ބޮޑުކުރަން ނިންމާފައިވަނީ ޓޫރިޒަމްގެ ޤާނޫނަށް އިސްލާހް ގެނައުމުގެ ބިލުގައެވެ. މިބިލް ފާސްކުރީ ރައްޔިތުންގެ މަޖިލީހުގެ މިދިޔަ ބުރާސްފަތި ދުވަހުގެ ޖަލްސާގައި 50 މެންބަރުންގެ ވޯޓާއެކުއެވެ.
ޓޫރިޒަމްގެ ގާނޫނަށް ގެނެސްފައިވާ އިސްލާޙުގައިވަނީ އަންނަ އަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން، މީހުން ދިރިއުޅޭ ރަށްތަކުގައި ހިންގާ ހޮޓެލްތަކާއި ޓޫރިސްޓް ގެސްޓު ހައުސްތަކުގެ ތެރެއިން 50 ކޮޓަރިއަށްވުރެ މަދުން ކޮޓަރި ރަޖިސްޓްރީކޮށްފައިވާ ތަންތަނަށް އަންނަ ޓޫރިސްޓުންގެ އަތުން، އެތަނުގައި ހޭދަކުރާ ކޮންމެ ދުވަހަކަށް، މީހަކަށް 3 ޑޮލަރުގެ ރޭޓުން، ގްރީން ޓެކްސްގެ ގޮތުގައި ދައުލަތަށް ޓެކްސް ނެގޭނެ ކަމަށެވެ.
އެހެންކަމުން ގެންނަން ފާސްކޮށްފައިވާ މިބަދަލާއެކު އަންނަ އަހަރުގެ އެއްވަނަ ދުވަހުން ފެށިގެން 50 ކޮޓަރިއަށްވުރެ ގިނައިން ކޮޓަރި ރަޖިސްޓްރީކޮށްފައިވާ ގެސްޓުހައުސްތަކުގައި، ތިބޭ ޓޫރިސްޓުންގެ އަތުން ގްރީން ޓެކްސްގެ ގޮތުގައި އެތަނެއްގައި ހޭދަކުރާ ކޮންމެ ދުވަހަކަށް، 6 ޑޮލަރު ނެގޭނެއެވެ.
މިހާރު އަމަލުކުރަމުން އަންނަ ޤާނޫނުގައިވާ ގޮތުން ރާއްޖޭގައި ގެސްޓު ހައުސްގެ ގޮތުގައި ރަޖިސްޓްރީކޮށްފައިވާ ހުރިހާ ތަނަކުންވެސް ގްރީން ޓެކްސްގެ ގޮތުގައި ނަގަނީ އެތަނުގައި ހޭދަކުރާ ކޮންމެ ދުވަހަކަށް، 3 ޑޮލަރުގެ ރޭޓުންނެވެ.
ޓޫރިޒަމްގެ ޤާނޫނަށް އަލަށް ގެނައި އިސްލާހްގައި، މިހާރު ނަގަމުން އަންނަ ގެސްޓު ހައުސް އަދި ހޮޓެލްގެ ރަޖިސްޓަރީ ފީއާއި ޑައިވް ސެންޓަރުގެ ރަޖިސްޓަރީ ފީ އުވާލުމަށްވެސް ވަނީ ނިންމާފައެވެ. އެގޮތުން ހޮޓަލެއް ރަޖިސްޓްރީކުރަން މިހާރު ނަގާ 10000 ރުފިޔާގެ ފީއާއި ގެސްޓްހައުސް އަދި ފީނުމުގެ ޚިދުމަތް ދޭ ތަނެއް ރަޖިސްޓްރީކުރަން ނަގާ 5000 ރުފިޔާގެ ފީ އެއް ދެން ނުނަގާނެއެވެ.
މިބަދަލުތަކުގެ އިތުރަށްވެސް ކައުންސިލްތަކަށް އެކަށީގެންވާ އާމްދަނީއެއް ލިބޭފަދަ ގޮތަކަށް މާކެޓު ވެލިއުއަށް ބިންތައް ކުއްޔަށް ދޫކުރުމަށް ފުރުސަތު ފަހިކޮށްދިނުމާއި، މީހުން ދިރިއުޅޭ ރަށްތަކުން ކުއްޔައް ދޫކޮށްފައިވާ ބިންތަކުގެ ޙައްޤުތައް ބަދަލުކުރުމުގެ ހުއްދަދޭނެ ފަރާތްތަކަކީ ކައުންސިލްތައް ކަމުގައިވެސް ވަނީ ކަނޑައަޅާފައެވެ.