މިމަހުގެ 21 ވަނަ ދުވަހު ގަލޮޅު ދަނޑުގައި ހިނގި ހަމަނުޖެހުންތަކާއި ގުޅިގެން ހައްޔަރުކޮށްފައިވާ އައްޝައިޚް ފަޟްލޫން މުޙައްމަދާއި، އައްޝައިޚު އާދަމް ނިޝާންގެ ބަންދުގެ މުއްދަތު އިތުރުކޮށްފިއެވެ.
ޔޯގާ ދުވަސް ފާހަގަކުރުމަށް ދަނޑުގައި ބޭއްވި ހަރަކާތްތަކަށް ހުރަސް އަޅައި، ހަމަނުޖެހުން ހިންގިކަމުގެ ތުހުމަތުގައި އައްޝައިޚް ފަޟްލޫން މުޙައްމަދާއި، އައްޝައިޚު އާދަމް ނިޝާން ހައްޔަރުކުރީ މިމަހުގެ 22 ވަނަ ދުވަހުއެވެ. އެ ދުވަހު އެ ދެމީހުން ހައްޔަރުކުރުމަށްފަހު 7 ދުވަހުގެ ބަންދުގެ މުއްދަތެއް ވަނީ ދީފައެވެ.
ބަންދުގެ މުއްދަތު މިއަދު ހަމަވާތީ ކޯޓަށް ހާޒިރުކުރުމުން ދައުލަތުން ވަނީ ދެ ޝައިހުން ބަންދުގައި ބެހެއްޓުމަށް އެދިފައެވެ. އެކަމާއި ގުޅިގެން ކޯޓުން ވަނީ އައްޝައިޚް ފަޟްލޫން މުޙައްމަދުގެ ބަންދަށް 7 ދުވަސް އަދި އައްޝައިޚު އާދަމް ނިޝާންގެ ބަންދަށް 3 ދުވަހުގެ މުއްދަތެއް ދީފައެވެ.
އައްޝައިޚް ފަޟްލޫން މުޙައްމަދާއި، އައްޝައިޚު އާދަމް ނިޝާން ހައްޔަރުކޮށްފައިވާއިރު، އެ ދެ ޝައިހުންނަށް ދެއްވާފައިވާ ދީނީ ތަޤުރީރުކުރުމާއި ވަޢުޡު ބުނުމާއި ދީނީ އިރުޝާދު ދިނުމުގެ ހުއްދަ އިސްލާމިކް މިނިސްޓްރީއިން ވަނީ ހިފަހައްޓާފައެވެ.
އައްޝައިޚް ފަޟްލޫން މުޙައްމަދުއާއި، އައްޝައިޚު އާދަމް ނިޝާންގެ ހުއްދަ ހިފަހައްޓާފައިވަނީ އަންގާރަދުވަހު ގަލޮޅު ދަނޑުގައި ބޭއްވި ހަރަކާތަށް ޢަމާޒުކޮށް ފުލުހުންގެ ސަފުތައް ފޫއަޅުވާލައި ބަންދުކޮށްފައިވާ ސަރަޙައްދަކަށް ވަދެ ދަޢުލަތުގެ މުދަލަށް ގެއްލުންދިނުމުގެ މައްސަލައިގައި އެ ދެ ޝައިޚުންގެ މައްޗަށް ޖިނާޢީ ތަޙްޤީޤެއް ކުރަމުންދާކަން ފުލުހުން އަންގާފައިވާތީކަމަށް މިނިސްޓްރީން ވިދާޅުވެއެވެ.