ޗުއްޓީ ހޭދަކުރާ މީހުންގެ މެދުގައި މަޤުބޫލު ޗައިނާގެ ސިޓީއެއް ކަމުގައިވާ މަކާއޫގައި ހަލުވިކަމާ އެކު ކޮވިޑް-19 ފެތުރި، ޞިއްޙީ ޚިދުމަތްތެރިންގެ ތެރެއިން ވެސް ގިނަ އަދަދެއްގެ ބަޔަކަށް މި ބަލި ޖެހިއްޖެއެވެ. މަކާއޫގެ ރައްޔިތުން ދުވާލަކު އެއް ފަހަރު ކޮވިޑް ޓެސްޓު ހަދަން މަޖުބޫރުކޮށްފައި ވާއިރު، ޞިއްޙީ ޚިދުމަތްތެރިންގެ ތެރެއިން 533 މީހަކަށް ވަނީ މި ބަލި ޖެހިފައެވެ. މަކާއޫއަކީ 600,000 މީހުންގެ އާބާދީއެއް އޮންނަ ސިޓީއެކެވެ.
ފާއިތުވި ހަފުތާއެއްހާ ދުވަހުގެ ތެރޭގައި ތިން ފަހަރެއްގެ މަތިން އެ ރަށުގެ ހުރިހާ ރައްޔިތުން ކޮވިޑްގެ ޓެސްޓު ހަދާފައިވެއެވެ. އަދި، ބަލިޖެހިފައިވާ ކަމަށް ޝައްކު ކުރެވޭ 7,000 މީހަކު މިހާރު ވެސް ތިބީ ކަރަންޓީނު ކޮށްފައެވެ. ބަލި ޖެހިފައިވާ ކަމަށް ޝައްކު ކުރެވޭ މީހުން ކަރަންޓީނު ކުރުމަށް އެ ސިޓީގެ އޮފިޝަލުން ވަނީ ޓޫރިސްޓު ހޮޓާތަކުން 2,000 އަށްވުރެ ގިނަ ކޮޓަރި ހިފާފައެވެ.
ހަލުވިކަމާ އެކު ކޮވިޑް ފެތުރެމުންދާތީ ޢާންމުން އެއްވެ އުޅޭ ގިނަ ތަންތަން މިހާރު ވަނީ ބަންދުކޮށްފައެވެ. މީގެ ތެރޭގައި ކާބޯތަކެތީގެ ޚިދުމަތްދޭ ތަންތަނާއި، ސިނަމާތަކާއި، ޕާކުތައް ވެސް ހިމެނެއެވެ. އަދި، ޒަރޫރީ ހާލަތެއް މެދުވެރިވެގެން މެނުވީ ގެއިން ބޭރަށް ނުނިކުތުމަށް އެ ސިޓީގެ އޮފިޝަލުން ވަނީ ރައްޔިތުންނަށް އަންގާފައެވެ.
މަކާއޫގައި ވެސް ޗައިނާގެ ރައީސް ޝީ ޖިންޕިންގްގެ “ޒީރޯ ކޮވިޑް” ސިޔާސަތު ތަންފީޒު ކުރެއެވެ. މާނައަކީ، ކޮވިޑް ކޭސްތަކެއް ފެންނަ ހުރިހާ ސަރަޙައްދެއް ފުރަބަންދުކޮށް، ހުރިހާ ރައްޔިތުން ޓެސްޓު ހަދަން މަޖުބޫރު ކުރުވުމެވެ. މަކާއޫގައި ހުންނަނީ ސަރުކާރުން ހިންގާ އެންމެ ހޮސްޕިޓަލެކެވެ. މިކަމާ ގުޅިގެން، އެޑްމިޓްކޮށްގެން ފަރުވާ ދޭން ޖެހޭ މީހުންނަށް އެންމެ އެކަށީގެންވާ ފެންވަރެއްގައި ޞިއްޙީ ޚިދުމަތްތައް ފޯރުކޮށްދިނުމަށް ވަނީ ދަތިތަކާ ކުރިމަތިވެފައެވެ.
މަކާއޫގެ އިތުރުން ހޮންގްކޮންގްގައި ވެސް ކޮވިޑް ދަނީ ހަލުވިކަމާ އެކު ފެތުރެމުންނެވެ. ހޮންގްކޮންގްގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު ވަނީ 2,000 އަށްވުރެ މައްޗަށް އަރާފައެވެ.