ހުޅަނގުގެ ޤައުމުތަކުގެ އަސްކަރީ ގުޅުން ކަމުގައިވާ ނޭޓޯގެ މެންބަރުކަމުގެ މަޤާމު ދިނުމަށް ނިންމާފައިވާ ދެ ޤައުމު ކަމުގައިވާ ފިންލެންޑާއި ސްވިޑުންއަށް ނޭޓޯގެ ސިފައިންނާއި ހަތިޔާރު ފޮނުވައި، އަސްކަރީ ވަސީލަތްތައް ޤާއިމުކޮށްފި ނަމަ، އެ ކަމާ ދެކޮޅަށް ހަރުކަށި ފިޔަވަޅުތަކެއް އަޅާނެ ކަމުގެ އިންޒާރު ރަޝިޔާގެ ރައީސް ވްލަޑިމިއަރ ޕުޓިން ދެއްވައިފިއެވެ. ޕުޓިން ވިދާޅުވީ، އެ ދެ ޤައުމުން ނޭޓޯއާ ގުޅުމާ މެދު ރަޝިޔާގެ އެއްވެސް ކަންބޮޑުވުމެއް ނެތް ކަމުގައެވެ.
ނަމަވެސް، އެ ދެ ޤައުމަށް ނޭޓޯގެ ސިފައިންނާއި ހަތިޔާރު ފޮނުވުމަކީ ރަޝިޔާއަށް އޮތް ނުރައްކަލެއްގެ ގޮތުގައި އެ ޤައުމުން ސިފަކުރާ ކަމުގައެވެ. އަދި، އެ ފަދަ އަމަލެއް ހިންގައިފި ނަމަ، އެ ކަމާ ބައްދަލު ރައްދެއް ރަޝިޔާއިން ވެސް ދޭނެ ކަމުގައި އޭނާ ވިދާޅުވިއެވެ. ޕުޓިންގެ މި އިންޒާރުގެ މާނައަކީ، ނޭޓޯގެ ޤައުމުތަކާ އިންވެގެން އޮތް ރަޝިޔާގެ ބާރު ހިނގާ ޤައުމުތަކަށް އެ ޤައުމުގެ ސިފައިންނާއި ހަތިޔާރު ފޮނުވުން ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.
މީގެ ހަތަރު މަހެއްހާ ދުވަސް ކުރިން ރަޝިޔާގެ ފައުޖުތަކުން އަރައި ހަނގުރާމަ ކުރަން ފަށާފައިވާ ޔޫކްރެއިނުން ވެސް ދަނީ ނޭޓޯއާ ގުޅުމަށް މަސައްކަތް ކުރަމުންނެވެ. އަދި، ވިލާތުގެ އިއްތިހާދު (އީ.ޔޫ)ގެ މެންބަރަކަށް ވުމަށް ޔޫކްރެއިނުން ކުރަމުންދިޔަ މަސައްކަތްތަކަށް އެ އިއްތިހާދުން ވަނީ ފެހި ސިގުނަލެއް ދީފައެވެ. ޔޫކްރެއިނުން އީ.ޔޫ.އާ ގުޅުމަކީ މައްސަލައެއް ނޫން ކަމުގައި ޕުޓިން ދެކެވަޑައިގެންނެވި ނަމަވެސް، ނޭޓޯގެ މެންބަރުކަން އެ ޤައުމަށް ދިނުމާ މެދު ޕުޓިން ދެކޮޅެވެ. ނޭޓޯއަކީ އަސްކަރީ ގުޅުމަކަށް ވާއިރު، އީ.ޔޫ.އަކީ މާލީ އަދި އިޤުތިޞާދީ ގޮތުން ޤައުމުތަކުގެ މެދުގައި ގުޅުން ބަދަހިކުރުމަށް މަސައްކަތް ކުރާ އިއްތިހާދެކެވެ.
ޔޫކްރެއިނަށް އަރައި ރަޝިޔާއިން ފަށާފައިވާ ހަނގުރާމައިގައި އެ ޤައުމުގެ ޑޮންބެސްގެ ގިނަ ސަރަޙައްދުތަކެއް މިހާރު ވަނީ ރަޝިޔާ ސިފައިންގެ އަތްދަށަށް ގެންގޮސްފައެވެ. ބޭނުމަކީ، ޔޫކްރެއިންގެ އަތްދަށުން އެ ސަރަޙައްދުތައް މިނިވަން ކުރުން ކަމުގައި ވިދާޅުވެ، ޕުޓިން ވަނީ އެ ޤައުމުގެ "އަސްކަރީ އޮޕަރޭޝަން" ނިމުމަކަށް ގެންނާނެ ތާރީޚަކާ މެދު ވިސްނުން އަދި މާ އަވަސް ކަމުގައެވެ.