ސްރީލަންކާގައި ޢާންމު ރައްޔިތުންނަށް ތެޔޮ ވިއްކުން ހުއްޓައިލުމާ އެކު، އެތައް ސަތޭކަ ބަޔަކު މަގުތަކަށް ނިކުމެ ސަރުކާރާ ދެކޮޅަށް އަޑުއުފުލަން ފަށައިފިއެވެ. ސްރީލަންކާއަށް ކުރިމަތިވެފައިވާ އިޤުތިޞާދީ ކާރިސާގައި އެ ޤައުމުން ތެޔޮ ހުސްވުމާ ގުޅިގެން ޢާންމު ރައްޔިތުންނަށް ތެޔޮ ވިއްކުން މަނާކުރުމާ އެކު، މި ކަމާ ދެކޮޅަށް އަޑު އުފުލަމުންދާ މީހުންގެ ތެރޭގައި ޑޮކްޓަރުންނާއި ނަރުހުންނާއި ބޭންކިންގ ދާއިރާގެ މުވައްޒަފުން ހިމެނެއެވެ.
ސްރީލަންކާގެ ބޭރު ފައިސާގެ ރިޒާވް ހުސްވެފައިވާ މި ދަނޑިވަޅުގައި، ޢާންމުންނަށް ތެޔޮ ވިއްކުން ހުއްޓައިލީ އެ ޤައުމުގައި ރައްކާކޮށްފައި ހުރި ތެލުގެ ސްޓޮކްތައް ހުސްވުމާ ގާތް ވުމުންނެވެ. އެ ޤައުމުގައި މިހާރު ރައްކާކޮށްފައި ހުރީ އެންމެ ހަފުތާއަކަށް ބޭނުންކުރެވޭ މިންވަރުގެ ތެލެވެ. އަދި، ޢާންމު ޚިދުމަތްތައް ކަމުގައިވާ ރޭލާއި ބަސް ދަތުރުފަތުރާއި ޞިއްޙީ ޚިދުމަތްތައް ނޫން އެހެން ކަންކަމަށް ތެޔޮ ބޭނުން ކުރުމާއި ވިއްކުން ސްރީލަންކާގެ ސަރުކާރުން ވަނީ ހުއްޓައިލާފައެވެ. އެ ޤައުމަށް ދެން އެންމެ އަވަހަށް ވެސް ތެލުގެ އައު ޝިޕްމަންޓެއް ލިބޭނީ ދެ ހަފުތާ ފަހުންނެވެ.
ސްރީލަންކާގެ ބޮޑުވަޒީރުގެ އޮފީހުން ބުނީ ތެލުގެ އައު ޝިޕްމަންޓްތައް ހޯދުމަށް ހުއްޓުމެއް ނެތި މަސައްކަތް ކުރަމުންދާ ކަމުގައެވެ. އަދި، ސަރުކާރުން މިހާރު އޯޑަރުކޮށްފައިވާ ޝިޕްމަންޓް އެންމެ އަވަހަށް ވެސް ލިބޭނީ އަންނަ މަހުގެ 22 ވަނަ ދުވަހު ކަމަށާއި، އިންޑިޔަން އޮއިލް ކޯޕަރޭޝަންގެ ސްރީލަންކާގެ ގޮފިން ގަނެފައިވާ ތެލުގެ ޝިޕްމަންޓެއް އަންނަ މަހުގެ 13 ވަނަ ދުވަހު ލިބޭނެ ކަމަށް ބެލެވޭ ކަމުގައެވެ.
ޢާންމުންނަށް ތެޔޮ ވިއްކުން ހުއްޓައިލުމާ ގުޅިގެން މުޒާހަރާ ކުރަމުންދާ ޑޮކްޓަރުންނާއި ނަރުހުންނާއި ބޭންކުތަކުގައި މަސައްކަތް ކުރާ މުވައްޒަފުން ބުނީ، މި ކަމާ ގުޅިގެން ވަޒީފާއަށް ނިކުތުމަށް ހުރަސް އެޅިފައިވާ ކަމުގައެވެ. އަދި، މި ކަމަށް އަވަސް ހައްލެއް ހޯދައިދިނުމަކީ ސަރުކާރުގެ ޒިންމާއެއް ކަމަށް އެ މީހުން ބުނެއެވެ.
ސްރީލަންކާގެ އިޤުތިޞާދީ ހާލަތު ގޯސްވެ، ކާބޯތަކެއްޗާއި ތެލާއި ބޭސްފަރުވާއަށް ބޭނުންވާ ސާމާނު ހުސްވުމާއި، ކަރަންޓާއި މުވާސަލާތީ ޚިދުމަތްތައް ބުރޫއަރަން ފެށުމުން މިދިޔަ މަހުގެ ތެރޭގައި ވެސް ބޮޑެތި މުޒާހަރާތަކެއް ކުރިއެވެ. އަދި، ފުލުހުންނާއި ޢާންމުންނާ މެދުގައި ހިނގި ކުރިމަތިލުންތަކުގައި ނުވަ މީހުން މަރުވެ، 300 އަށްވުރެ ގިނަ މީހުން ޒަޚަމްވިއެވެ.