ޅ. އަތޮޅު ހޮސްޕިޓަލް ޓާޝަރީ ފެންވަރަށް ތަރައްޤީކުރުމުގެ މަސައްކަތް މިއަހަރު ފަހުކޮޅު ނިމޭނެ: ނަސީމް
ޅ. އަތޮޅު ހޮސްޕިޓަލް ޓާޝަރީ ފެންވަރަށް ތަރައްޤީކުރުމުގެ މަސައްކަތް މިއަހަރު ފަހުކޮޅު ނިމިގެންދާނެކަމަށް މިނިސްޓަރ އޮފް ހެލްތު އަހްމަދު ނަސީމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ނައިފަރު ދާއިރާގެ މެންބަރު އަހްމަދު ޝިޔާމް ކުރެއްވި ސުވާލަށް ޖަވާބުދެއްވަމުންނެވެ.
ނައިފަރު ދާއިރާގެ މެންބަރު އަހްމަދް ޝިޔާމް ވަނީ ޅ. އަތޮޅު ހޮސްޕިޓަލް ޓާޝަރީ ފެންވަރަށް ތަރައްޤީކުރުމަށް ކުރައްވާ މަސައްކަތްތަކަކީ ކޮބައިކަމާއި ހޮސްޕިޓަލް ޓާޝަރީ ފެންވަރަށް ތަރައްޤީކޮށް ނިމޭނީ ކޮންދުވަހަކުންތޯ ސުވާލުކޮށްފައެވެ.
މި ސުވާލަށް ޖަވާބުދެއްވާ މިނިސްޓަރ ނަސީމް ވިދާޅުވީ ޅ. އަތޮޅު ހޮސްޕިޓަލް ޓާޝަރީ ފެންވަރަށް ތަރައްޤީ ކުރުމުގެ މަސައްކަތް މިހާރުވެސް ކުރިއަށް ދާކަމަށެވެ. އެހެންނަމަވެސް 2020، 2021 އަދި 2022 ވަނަ އަހަރުގެ ބަޖެޓުގައި ފައިސާ ހިމެނިފައިވީ ނަމަވެސް އެ ފައިސާ ލިބިފައި ނުވާކަމަށް މިނިސްޓަރ ވިދާޅުވިއެވެ. މިކަމުގެ ސަބަބުން މަސައްކަތް ކުރިއަށް ގެންދަން ބޭނުންވާ ސްޕީޑުގައި މަސައްކަތް ކުރިއަށް ގެންދެވިފައިނުވާކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިހާރު ކުރިއަށްގެންދާ މަސައްކަތްތަކަކީ ހޮސްޕިޓަލްގެ ޚިދުމަތް ޓާޝަރީ ފެންވަރަށް ގެންދިޔުމަށް ކުރައްވާ މަސައްކަތްތައްކަމަށެވެ. އެގޮތުން މި މަސައްކަތް މިއަހަރުގެ ނިމޭ ހިސާބަށް ނިމިގެންދާނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ނައިފަރު ހޮސްޕިޓަލްގައި މިވަގުތު ޑައިލަސިސް ސެންޓަރެއް ޤާއިމްކުރުމުގެ މަސައްކަތް މިހާރު ކުރަމުންދާކަމަށެވެ. އަދި މި ސެންޓަރުގެ ޚިދުމަތް އޯގަސްޓް މަހުގެ ތެރޭގައި ފެށޭނެކަމަށް މިނިސްޓަރ ވިދާޅުވިއެވެ.
މީގެ އިތުރުން ނައިފަރު ހޮސްޕިޓަލް ޓާޝަރީ ހޮސްޕިޓަލަކަށް ބަދަލުކުރުމުގެ މަސައްކަތުގެ ދަށުން ޚިދުމަތް ފުޅާ ކުރުމަށް ބޭނުންވާ ޑޮކްޓަރުން އެ ހޮސްޕިޓަލަށް ފޮނުވާފައިވާކަމަށް މިނިސްޓަރ ވިދާޅުވިއެވެ. އަދި އެ ޚިދުމަތްތަކުގެ ތެރޭގައި ލޮލުގެ ޚިދުމަތާއި ސްކޭންކުރުމުގެ ޚިދުމަތާއި ކަށީގެ ޚިދުމަތްވެސް މިހާރު ދޭން ފަށާފައިވާކަމަށް މިނިސްޓަރ ވިދާޅުވިއެވެ.
ޅ. އަތޮޅު ހޮސްޕިޓަލް ޓާޝަރީ ފެންވަރަށް ތަރައްޤީކުރުމަކީ ރައީސުލް ޖުމްހޫރިއްޔާ އިބްރާހީމް މުހައްމަދު ޞާލިހްގެ ވައުދުފުޅުތަކުގެ ތެރޭގައި ހިމެނިވަޑައިގަންނަވާ މަސައްކަތްޕުޅެކެވެ.