ރާއްޖޭގެ ޔޫޒަބަލް ރިޒަރވްގައި 5 މަސް ދުވަހަށް ފުދޭ މިންވަރަކަށް ބޭރު ފައިސާ އެބަހުރިކަމަށް ފިނޭންސް މިނިސްޓަރ އިބްރާޙިމް އަމީރު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ކުރެއްވި ސުވާލަކަށް ލިޔުމުން ފޮނުއްވި ޖަވާބުގައެވެ.
ގަލޮޅު އުތުރު ދާއިރާގެ މެމްބަރު އީވާ އަބްދުﷲ ކުރެއްވި ސުވާލުގައި ވިދާޅުވީ ޖޫން މަސް ފެށުނުއިރު ރާއްޖޭގެ ބޭރުގެ ފައިސާގެ ރިޒާވްގެ ތެރެއިން ސަރުކާރަށް ބޭނުންކުރެވޭ ފައިސާގެ ގޮތުގައި ހުރީ 317 މިލިއަން ޑޮލަރު ކަމަށާއި، މި ހިނގާ ޖޫންމަހާއި ކުރިއަށް އޮތް ޖުލައިމަހު 130 މިލިއަން ޑޮލަރަށްވުރެ ގިނައިން ދަރަނި އަނބުރާ ދެއްކުމަށް ހޭދަކުރަންޖެހޭ ކަމަށެވެ. މި 130 މިލިއަން ޑޮލަރުގެ އިތުރުން، މި ދެ މަހުގެ ބަޖެޓުކޮށްފައިވާ ޑެފިސިޓަކީ 150 މިލިއަން ޑޮލަރަށްވުރެ އިތުރު އަދަދެެއް ކަމަށާއި، ޖުލައި މަސް ނިމޭއިރު، ސަރުކާރަށް ބޭނުންކުރެވޭ ދައުލަތުގެ ރިޒާވްގައި ކިހާ ދުވަހަކަށް ފުދޭނެ މިންވަރަކަށް ކާޑާއި، ތެލާއި ބޭހުގެ ފައިސާ ހުންނާތޯ އީވާގެ ސުވާލުގައިވެއެވެ.
އެ ސުވާލަށް މިނިސްޓަރ އަމީރު ލިޔުމުން ދެއްވި ޖަވާބުގައި ވިދާޅުވީ ބޭރު ފައިސާގެ ރިޒާރވްގެ ތެރެއިން ސަރުކާރަށް ބޭނުން ކުރެވޭ ފައިސާ ނުވަތަ ޔޫސަބަލް ރިޒާރވަކީ މިވަގުތު އެމްއެމްއޭއިން ޝާޢިއުކުރާ ޢަދަދުތަކެއް ނޫންކަމަށެވެ. އެހެންނަމަވެސް ލިބެން ހުރި މައުލޫމާތައް ބަލާއިރު ފިނޭންސް މިނިސްޓްރީއަށް އަންދާޒާކުރެވޭ ގޮތުގައި މިއަހަރުގެ ޖުލައިމަހުގެ ނިޔަލަށް ރާއްޖެއަށް ބޭނުންވާ ކާޑާއި، ތެލާއި، ބޭހުގެ އިމްޕޯޓުގެ ގާތްގަނޑަކަށް 5 މަސް ދުވަހަށް ފުދޭ މިންވަރުގެ ޔޫޒަބަލް ރިޒަރވް ހުންނާނެކަމަށް ފިނޭންސް މިނިސްޓަރ ވިދާޅުވިއެވެ.
ދިވެހިރާއްޖޭގެ ބޭރު ފައިސާގެ ރިޒާރވް މެނޭޖްކުރުން ޤާނޫނީގޮތުން ހަވާލުކުރެވިފައިވަނީ އެމްއެމްއޭއަށްކަމަށް މިނިސްޓަރ ފާހަގަކުރެއްވިއެވެ. އަދި ރިޒާރވްގެ ތަފާސް ހިސާބުތައް ބަލަހައްޓައި އަންދާޒާތައް ތައްޔާރުކުރުމަކީވެސް އެ އޮތޯރިޓީގެ ޒިންމާއެއްކަމަށް މިނިސްޓަރ އަމީރު ވިދާޅުވިއެވެ. އެހެންކަމުން މިކަމާއި ގުޅޭގޮތުން އިތުރު މަޢުލޫމާތު އެމްއެމްއޭއިން ހޯދުމަށްވެސް ފިނޭންސް މިނިސްޓަރ ވަނީ އެދިވަޑައިގެންފައެވެ.
ރާއްޖޭގެ އިޤްތިސާދީ ހާލަތާއި ގުޅޭގޮތުން މީގެކުރިން މިނިސްޓަރ އަމީރު ވިދާޅުވެފައިވަނީ އިތުރުވަމުން އަންނަ ޑޮލަރުގެ އާމްދަނީއާއެކު ރަސްމީ ރިޒާވް މި އަހަރު ނިމޭއިރު ކުރިން ކޯވިޑް ހުރި ހިސާބަަށް ދާނެކަމަށެވެ. އަދި ރާއްޖެއަށް ދަރަނި އަނބުރާ ދެއްކުމުގައި ކުރު މުއްދަތުގެ ގޮންޖެހުންތަކެއް ނެތްކަމަށާއި، ދަރަނި ދެއްކުމުގެ ޤާބިލުކަން އެބަހުރިކަމަށާއި މި އަހަރު ރިޒާވް ހުންނާނީ ރަނގަޅު މިންވަރެއްގައިކަމަށްވެސް މިނިސްޓަރ އަމީރު ވަނީ ވިދާޅުވެފައިވެއެވެ.