އެންމެ މުއްސަނދި ހަތް ޤައުމު (ޖީ7) ގެ އިސްވެރިން ޖަރުމަނު ވިލާތުގެ މިހާރު ބައްދަލު ކުރަމުން ދާއިރު، މި ބައްދަލުވުމުގެ މަޝްވަރާތައް އަމާޒުކޮށްފައި ވަނީ ރަޝިޔާއިން ޔޫކްރެއިނަށް އަރައި ކުރަމުންދާ ހަނގުރާމައަށެވެ. މި އިއްތިހާދުގައި ކުރިން އަށް މެންބަރުން ހިމެނެއެވެ. އެއީ، ރަޝިޔާ ވެސް ހިމެނޭ ގޮތަށެވެ. ނަމަވެސް، ރަޝިޔާއިން 2014 ވަނަ އަހަރު ޔޫކްރެއިންގެ ބޮޑު ސަރަޙައްދެއް ކަމުގައިވާ ކްރައިމިޔާ ހިފުމާ ގުޅިގެން، ރަޝިޔާ ވަނީ ޖީ7ގެ މެންބަރު ކަމުން ސަސްޕެންޑްކޮށްފައެވެ.
މިހާރު ކުރިއަށްދާ ޖީ7ގެ މަޝްވަރާ ބައްދަލުވުމުގެ މިފަހަރުގެވެސް އަމާޒު ހުއްޓިފައިވަނީ ރަޝިޔާއިން ޔުކްރޭނަށް އަރާ ދެމުން ގެންދާ ހަމަލާތަކަށެވެ. ޖީ7ގެ ބައްދަލުވުމާއި ދިމާކޮށް ރަޝިޔާގެ ފައުޖުތަކުން މި ވަނީ ޔޫކްރެއިންގެ ސަރަޙައްދުތަކަށް ދެމުންދާ ހަމަލާތައް އިތުރަށް ވަރުގަދަ ކޮށްފައެވެ. މި ގޮތުން، އެންމެ ނުރައްކާތެރި ހަމަލާތައް އަމާޒުކޮށްފައި ވަނީ ޔޫކްރެއިންގެ ވެރިރަށް ކީވަށެވެ.
ރަޝިޔާގެ އެންމެ ފަހުގެ ހަމަލާތައް އަމާޒުކޮށްފައި ވަނީ ކީވުގެ ޢާންމުން ދިރިއުޅޭ ޢިމާރާތްތަކަށް ކަމުގައި ޔޫކްރެއިނުން ބުނެއެވެ. ޔޫކްރެއިނުގެ ރައީސް ވޮލޮޑޮމީރް ޒެލެންސްކީގެ އިސް މުޝީރެއް ކަމުގައި އަންދްރީ ޔަރްމެކް ވިދާޅުވީ، ރަޝިޔާއިން އެންމެ ފަހުން ދިން މިސައިލް ހަމަލާތަކުގައި ކީވުގެ ޢާންމުންގެ ގެދޮރާއި އެޕާޓްމަންޓް ޢިމާރާތެއްގެ އިތުރުން ނަރސަރީ ސްކޫލެއް ސުންނާފަތިވެފައިވާ ކަމުގައެވެ. މި ހަމަލާތަކުގައި އެކަކު މަރުވެ، ހަ މީހަކަށް އެކިވަރުގެ އަނިޔާތައް ލިބުނެވެ. ފާއިތުވި 24 ގަޑިއިރުގެ ތެރޭގައި ރަޝިޔާއިން 62 މިސައިލް ހަމަލާ ކީވަށް އަމާޒުކޮށް ފޮނުވައިލިއެވެ.
ވީޑިއޯ މެދުވެރިކޮށް ކޮންމެ ރެޔަކު ދެއްވާ މެސެޖުގައި ޒެލެންސްކީ ވިދާޅުވީ، ރަޝިޔާގެ ނުރައްކާތެރި ހަމަލާތަކުގައި ހަތް އަހަރުގެ ކުއްޖަކު ޒަޚަމްވި ކަމުގައެވެ. އަދި، ޔޫކްރެއިންގެ އަންހެނުންނާއި ކުޑަކުދިންނާއި، ނަރސަރީ ސްކޫލުތަކާއި ހޮސްޕިޓަލުތަކަށް ރަޝިޔާގެ ސިފައިން ދެމުންދާ ހަމަލާތައް އަމާޒު ކުރަމުންދާ ކަމަށް އޭނާ ތުހުމަތު ކުރެއްވިއެވެ. މި ހާދިސާ ޒަޚަމްވި ކުއްޖާގެ ހަށިގަނޑު ފެނުނީ ސުންނާފަތި ކޮށްލާފައިވާ ޢިމާރާތުގެ ދަށުންނެވެ. މި ހަމަލާގައި އެ ކުއްޖާގެ ބައްޕަ ވަނީ މަރުވެފައެވެ.
ރަޝިޔާގެ މި ހަމަލާތަކާ ގުޅޭ ގޮތުން ޖީ7ގެ ބައްދަލުވުމެއްގައި ވާހަކަފުޅު ދައްކަވަމުން އެމެރިކާގެ ރައީސް ޖޯ ބައިޑަން ވަނީ، ރަޝިޔާގެ އަމަލުތަކުގައި އެއްވެސް އިންސާނިއްޔަތު ކަމެއް ނެތް ކަމަށް ސިފަ ކުރައްވާފައެވެ. އޭނާ ވަނީ، ޢާންމުންގެ ގެދޮރާއި ކުޑަކުދިން ކިޔަވާ ސްކޫލުތަކަށް ރަޝިޔާއިން ދެމުންދާ މި ފަދަ ހަމަލާތައް ކުށްވެރި ކުރައްވާފައެވެ.
މި ހަމަލާތަކާ ގުޅިގެން ޔޫކްރެއިނުގެ ޚާރިޖީ ވަޒީރު ދިމިތްރޯ ކުލޭބާ ވަނީ، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އިތުރަށް ހަރުދަނާ ކުރަން ޖީ7ގެ މެންބަރު ޤައުމުތަކަށް ގޮވައިލައްވާފައެވެ. އަދި، ރަޝިޔާއިން އަތްގަދަކޮށްފައިވާ އެ ޤައުމުގެ ސަރަޙައްދުތައް މިނިވަން ކުރެވޭނީ، ޔޫކްރެއިން ސިފައިންގެ އަސްކަރީ ޤާބިލިއްޔަތުކަން އިތުރުކޮށް، ފަހުގެ ޒަމާނީ ހަތިޔާރު ފޯރުކޮށްދީގެން ކަމުގައި އޭނާ ވިދާޅުވިއެވެ.
ރަޝިޔާގެ ހަނގުރާމައާ ގުޅޭ ގޮތުން އިނގިރޭސި ވިލާތުގެ ބޮޑުވަޒީރު ބޮރިސް ޖޯންސަން ވިދާޅުވީ، ރަޝިޔާގެ އަމަލުތައް ކުރިއަށް ގެންދިޔުމަށް ފުރުޞަތު ދީފި ނަމަ، މުޅި ދުނިޔެއަށް އެކަމުގެ ނޭދެވޭ އަސަރު ކުރާނެ ކަމުގައެވެ. ބޮރިސް އިޝާރާތްކުރައްވާފައި މި ވަނީ، ރަޝިޔާ-ޔޫކްރެއިން ހަނގުރާމައާ ގުޅިގެން ދުނިޔޭގެ އިޤްތިޞާދަށް އަންނަމުންދާ ލޮޅުންތަކާއި، އުފުލެމުންދާ ތަކެތީގެ އަގުތަކެވެ.
ރަޝިޔާގެ ހަމަލާތައް އިތުރު ކޮށްފައިވާ މި ދަނޑިވަޅުގައި ޔޫކްރެއިންގެ ދިފާޢުގައި ހަނގުރާމަ ކުރަމުންދާ ސިފައިން ވެސް މި ވަނީ ހަމަލާތައް އިތުރުކޮށްފައެވެ. މި ގޮތުން، ބްލެކް ސީގައި ރަޝިޔާއިން ހިންގާ ތެލާއި ގޭސް އުފައްދާ ޕްލެޓްފޯމަކަށް އަމާޒުކޮށް ޔޫކްރެއިން ސިފައިން ވަނީ ހަމަލާ ދީފައެވެ. މީގެ އިތުރުން، ޔޫކްރެއިން ސިފައިން މިދިޔަ ހަފުތާގައި ދިން އެހެން ހަމަލާއަކާ ގުޅިގެން ޕުލެޓްފޯމުގެ މަސައްކަތްތައް މެދުކަނޑައިލަން ޖެހުނެވެ.