ބޮޑެތި ބައެއް ބަލިތައް އިތުރުވުމުގައި ޕްލާސްޓިކްފަދަ ތިމާވެށީގެ މައްސަލަތަކުގެ ދައުރު ބޮޑު: މިނިސްޓަރ
ކެންސަރު ފަދަ ބޮޑެތި ބައެއް ބަލިތައް އިތުރުވުމުގައި ޕްލާސްޓިކް ފަދަ ތިމާވެށީގެ މައްސަލަތަކުގެ ދައުރު ބޮޑުކަމަށް މިނިސްޓަރ އޮފް ހެލްތު އަޙްމަދު ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ދުނިޔޭގެ ސިއްޙަތު ޖަމިއްޔާއާއި މިނިސްޓްރީ އޮފް ހެލްތާއި މިނިސްޓްރީ އޮފް އެޑިއުކޭޝަން ގުޅިގެން ޤައުމީ ފެންވަރުގައި ބޭއްވި "ރީސައިކަލްޑް އާޓް އެގްޒިބިޝަން" އިފްތިތާޙްކޮށްދެއްވާ ވާހަކަފުޅުދައްކަވަމުންނެވެ.
ދުނިޔޭގެ ސިއްޙަތު ޖަމިއްޔާއާއި މިނިސްޓްރީ އޮފް ހެލްތާއި މިނިސްޓްރީ އޮފް އެޑިއުކޭޝަން ގުޅިގެން ޤައުމީ ފެންވަރުގައި ބޭއްވި "ރީސައިކަލްޑް އާޓް އެގްޒިބިޝަން" އިފްތިތާޙްކޮށްދެއްވާ ވާހަކަފުޅުދައްކަވަމުން މިނިސްޓަރ އޮފް ހެލްތު އަޙްމަދު ނަސީމް ވަނީ ތިމާވެއްޓާއި ސިއްޙަތު ގުޅިލާމެހިފައިވާ މިންވަރުގެ މައްޗަށް އަލިއަޅުއްވާލައްވާފައެވެ. އަދި ސިއްޙަތާއި ތިމާވެއްޓަށް ކުރިމަތިވެފައިވާ ނުރައްކަލާއި ގުޅޭގޮތުން މުޖުތަމަޢު ހޭލުންތެރިކުރުވުމުގައި އާޓް ނުވަތަ ފަންނުވެރިކަމުގެ ބޭނުންކުރެވޭނެ ގޮތްތަކާއި ގުޅޭގޮތުން މިނިސްޓަރ ވަނީ ވާހަކަފުޅުދައްކަވާފައެވެ.
މިނިސްޓަރ ވިދާޅުވީ މިއަދުގެ ޒަމާނީ ވަޞީލަތްތަކާއެކުވެސް ބޮޑެތި ބަލިތަކަށް ފަރުވާ ނުހޯދިގެން އުޅެނީ ތިމާވެށީގެ މިފަދަ މައްސަލަތަކަށް ޙައްލު ނުގެނެވޭތީކަމަށް ދިރާސާތަކުން ދައްކާކަމަށެވެ. އެގޮތުން ކެންސަރަށް މަގުފަހިކުރާ މާއްދާތައް ހިމެނޭ މައިކްރޯ ޕްލާސްޓިކް ތުއްތު ކުދިން ވިހާއިރު އެކުދިންގެ ހަށިގަނޑުން ފެނުމުން، ބަލިތައް އިތުރުވުމާއި ގުޅޭގޮތުން އުފެދޭ ގިނަ ސުވާލުތަކަކަށް ޖަވާބު ލިބޭކަން މިނިސްޓަރ ވަނީ ފާހަގަކުރައްވާފައެވެ.
މިނިސްޓަރ ނަސީމް ވިދާޅުވީ ޕްލާސްޓިކާއި ތިމާވެއްޓަށް ކުރިމަތިވެފައިވާ އެހެން ނުރައްކާތަކުން ސަލާމަތްވެގެން ނޫނީ ދުޅަހެޔޮ ސިއްޙަތެއް ކަށަވަރު ނުކުރެވޭނެކަމަށެވެ. އަދި މިކަން ކާމިޔާބުކުރުމަށް މުޖުތަމަޢުގެ އަރަމުން އަންނަ ޒުވާނުން ހޭލުންތެރިވެ ޕްލާސްޓިކަށް ބަރޯސާނުވާ ޖީލެއް ބިނާކުރެވިއްޖެނަމަ މުސްތަޤުބަލުގައި ބަދަލެއް އަންނާނެކަމަށް މިނިސްޓަރ ވިދާޅުވިއެވެ. އެގޮތުން މިހާރުވެސް ތިމާވެއްޓާއިމެދު ޒުވާނުން އަހުލުވެރިކަން މިނިސްޓަރ ފާހަގަކުރެއްވިއެވެ.
ޢިއްޒުއްދީން ސްކޫލްގައި ކުރިއަށްގެންދާ "ރީސައިކަލްޑް އާޓް އެގްޒިބިޝަން"ގެ ތީމަކީ "އަވަރ ޕްލެނެޓް، އަވަރ ހެލްތު"އެވެ. މިއެގްޒިބިޝަންގައި ރާއްޖޭގެ އެކި ސްކޫލްތަކުގެ ގްރޭޑް 1 އިން 9 އަކާއި ދެމެދުގެ ދަރިވަރުން ހުށައަޅާފައިވާ 300 އަށްވުރެ ގިނަ ފަންނުވެރި އުފެއްދުންތައް ހިމެނެއެވެ. މީގެ ތެރެއިން 3 ކެޓަގަރަކީއަކުން ވަނީ 1ވަނަ، 2ވަނަ އަދި 3ވަނަ ހޮވާފައެވެ. އާދިއްތަ އަދި ހޯމަ ދުވަހުގެ މެންދުރުކުރި 11:00 އިން ފެށިގެން ރޭގަނޑު 10:00 ޖެހުމާއި ހަމައަށް މިއެގްޒިބިޝަނަށް ޒިޔާރަތްކުރުމުގެ ފުރުސަތު ވަނީ ހުޅުވާލާފައެވެ.