އެންމެ ކުރިއަރާފައިވާ މުއްސަނދި ހަތް ޤައުމު (ޖީ7)ގެ ބައްދަލުވުމެއް ޖަރުމަނުވިލާތުގައި ފެށިގެން ކުރިއަށްދާ އިރު، މި ސަމިޓުގެ ނަޒަރުވެސް ހުއްޓިފައި އޮތީ ރަޝިޔާއިން ޔޫކްރެއިނަށް އަރައިގެން ކުރަމުންދާ ހަނގުރާމައަށެވެ. ތިން ދުވަހުގެ މި ސަމިޓުގައި ޖީ7ގެ މެންބަރު ޤައުމުތައް ކަމުގައިވާ އިނގިރޭސި ވިލާތް، ކެނެޑާ، ފަރަންސޭސި ވިލާތް، ޖަރުމަނު ވިލާތް، އިޓަލީ ވިލާތް، އަދި ޖަޕާނާއި އެމެރިކާގެ ލީޑަރުން ބައިވެރިވެ ވަޑައިގަންނަވައެވެ.
މި ސަމިޓުގައި މަޝްވަރާ ކުރާނެ އެންމެ މުހިންމު ދާއިރާތަކުގެ ތެރޭގައި ރަޝިޔާ-ޔޫކްރެއިން ހަނގުރާމައާ ގުޅިގެން ދުނިޔޭގެ އިޤްތިޞާދަށް ކުރަމުންދާ ނޭދެވޭ އަސަރުތައް ހިމެނެއެވެ. މި ގޮތުން، ތެލާއި ހަކަތައިގެ އަގު އުފުލުމާއި، ކާބޯތަކެއްޗާއި އެހެނިހެން މުދަލުގެ އަގުތައް އުފުލެމުންދާ މައްސަލަ ހައްލު ކުރެވޭނެ ގޮތްތަކާ ގުޅޭ ގޮތުން އެ ބޭފުޅުން މަޝްވަރާ ކުރައްވާނެއެވެ.
މީގެ އިތުރުން، ތިމާވެއްޓަށް ކުރަމުންދާ ނޭދެވޭ އަސަރުތައް ކުޑަ ކުރުމަށް އެ ޤައުމުތަކުން ކުރަމުންދާ މަސައްކަތްތައް ހަރުދަނާ ކުރުމާ ގުޅޭގޮތުން ވެސް އެ ބޭފުޅުން ޚިޔާލު ބަދަލު ކުރައްވާނެއެވެ. ރަޝިޔާ-ޔޫކްރެއިން ހަނގުރާމައާ ގުޅޭ ގޮތުން، މި ބައްދަލުވުމުގެ ބައިވެރިން ދޭނެ އެންމެ މުހިއްމު އެއް މެސެޖަކީ، ޔޫކްރެއިނަށް އޮތް ތާޢީދާއި، އެ ޤައުމަށް މާލީ ގޮތުންނާއި އަސްކަރީ ދާއިރާއިން ދެމުންގެންދާ އެއްބާރުލުން ހުއްޓައިނުލާނެކަމެވެ.އަދި، ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތައް އިތުރަށް ވަރުގަދަ ކުރުމަށް ވެސް ނިންމާނެ ކަމަށް ބެލެވެއެވެ. މި ގޮތުން، ރަޝިޔާގެ ރަން އެކްސްޕޯޓް ކުރާ މާކެޓަށް ހުރަސް އެޅުމާއި، ރަޝިޔާއިން ވިއްކާ ތެލާއި ގޭހުގެ އަގު ކޮންޓްރޯލް ކުރުން ހިމެނެއެވެ.
ކުރިން ރަޝިޔާއަކީ ވެސް ޖީ7ގެ މެންބަރު ޤައުމެކެވެ. ނަމަވެސް، އެ ޤައުމުގެ ފައުޖުތަކުން ޔޫކްރެއިނުގެ ކްރައިމިޔާއަށް އަރައި، އެ ޕުރޮވިންސްގެ ހިފުމާ ގުޅިގެން، ރަޝިޔާ ވަނީ އެ ގުޅުމުން ސަސްޕެންޑު ކޮށްފައެވެ. 1975 ވަނަ އަހަރު އެކުލަވައިލާފައިވާ ޖީ7ގެ މެންބަރު ޤައުމުތަކުގެ އިތުރުން ޖަރުމަނު ވިލާތުގައި ކުރިއަށްދާ ސަމިޓުގައި ސެނެގާލް، އާޖެންޓީނާ، އިންޑޮނީޝިޔާ އަދި އިންޑިޔާގެ އިސްވެރިން ވެސް ބައިވެރިވެ ވަޑައިގަންނަވައެވެ.