ޔޫކްރެއިނުގެ ލުހާންސްކް ޕުރޮވިންސުގެ ރަށެއް ކަމުގައިވާ ސިއެވޮރޮދޮނެޓްސްކް ރަޝިޔާ ސިފައިންގެ އަތްދަށުވިޔަ ނުދިނުމަށް ހަނގުރާމަ ކުރަމުންދިޔަ ޔޫކްރެއިން ސިފައިން އަމާންދީ، އެ ރަށުން ފައިބަން ނިންމައިފިއެވެ. ރަޝިޔާ ސިފައިން ޔޫކްރެއިނަށް އަރައި ހަނގުރާމަ ފެށި ފަހުން މިއަދަށް ހަތަރު މަސް ފުރޭއިރު، ލުހާންސްގައި ރަޝިޔާގެ ފައުޖުތަކުން މިހާތަނަށް އަތްގަދަ ނުކޮށް އޮތް ދެ ރަށުގެ ތެރޭގައި ސިއެވޮރޮދޮނެޓްސްކް ހިމެނެއެވެ.
އެ ރަށް ހިފުމަށް ރަޝިޔާ ސިފައިން ވަރުގަދަ ހަމަލާތަކެއް އަމާޒު ކުރަމުންދާތާ ހަފުތާތަކެއް ފާއިތުވެއްޖެއެވެ. ލުހާންސްކް ސަރަޙައްދުގެ ގަވަރުނަރު ވިދާޅުވީ، އެ ރަށް ދިފާޢު ކުރުމަށް ޔޫކްރެއިނުގެ ސިފައިން ކުރަމުންދިޔަ މަސައްކަތްތައް ނާކާމިޔާބުވެފައި ވާ ކަމުގައެވެ. ރަޝިޔާ ސިފައިންގެ ވަރުގަދަ ހަމަލާތަކުގައި އެ ރަށުގެ ގިނަ ސަރަޙައްދުތައް ސުންނާފަތި ކޮށްލާފައިވާ ކަމުގައި އޭނާ ވިދާޅުވިއެވެ. އަދި، އެ ރަށުން ފޭބުމަށް ސިފައިންނަށް އަމުރު ލިބިފައިވާ ކަމުގައި އޭނާ ވިދާޅުވިއެވެ.
ސިއެވޮރޮދޮނެޓްސްކް ވެއްޓުމާ އެކު، ރަޝިޔާ ސިފައިން ދެން މަސައްކަތް ފަށާނީ ލުހާންސްގައި އަތްގަދަ ނުކުރެވި ބާކީ އޮތް ލިސިޝެންސްކް ހިފުމަށެވެ. އަދި، އެ ރަށް ވަށައިލުމަށް ރަޝިޔާ ސިފައިން މިހާރުވެސް މަސައްކަތް ފަށާފައިވާ ކަމުގައި ޔޫކްރެއިންގެ ދިފާޢީ ވުޒާރާއިން ބުނެއެވެ.
އިނގިރޭސި ވިލާތުގައި ކުރިއަށްދާ ދުނިޔޭގެ އެންމެ ބޮޑު އެއް މިޔުޒިކް ފެސްޓިވަލް ކަމުގައިވާ "ގްލެސްޓަންބިޔުރީ"ގައި ވީޑިއޯ މެދުވެރިކޮށް މި ހަނގުރާމައާ ގުޅޭ ގޮތުން ތަޤުރީރު ކުރައްވަމުން ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވިދާޅުވީ، ރަޝިޔާއިން ޔޫކްރެއިނުގެ ރައްޔިތުންގެ ސުލްޙަމަސަލަސް ކަން ނަގައިލާފައިވާ ކަމުގައެވެ.