ބޯކޮށް ވާރޭ ވެހުމުގެ ސަބަބުން ބަންގްލަދޭޝްގެ އިރުއުތުރުގެ ސަރަޙައްދުތަކުގައި ފެންބޮޑުވެފައިވާއިރު، އެ ސަރަޙައްދުތަކުގައި ސާފު ބޯފެނަށް ޖެހިފައިވާ ކުޑަކުދިންގެ އަދަދު 3.5 މިލިޔަނަށް އަރާފައިވާ ކަމުގައި ޔުނިސެފުން ބުނެފިއެވެ. ފެން ބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ފަރުބަދަމަތީ ސަރަޙައްދެއް ކަމުގައިވާ ސިލްހެތަށެވެ. ފެންބޮޑުވުމާ ގުޅިގެން އެ ސަރަޙައްދުގައި ގެނބިގެން މަރުވި ކުޑަކުދިންގެ އަދަދު ވަނީ 15 އަށް އަރާފައެވެ.
ބަންގްލަދޭޝްގައި ހުންނަ ޔުނިސެފުގެ އޮފީހުގެ އޮފިޝަލެއް ކަމުގައިވާ ޝެލްޑަން ޔެޓް ވިދާޅުވީ، ގިނަ ސަރަޙައްދުތަކަކުން ސާފު ބޯފެނާއި ކާބޯތަކެތި ހުސްވެފައިވާ ކަމުގައެވެ. އެ ސަރަޙައްދަށް ކާބޯތަކެއްޗާއި ސާފު ބޯފެން ފޯރުކޮށްދިނުމަށް އެ ޤައުމުގެ ސަރުކާރާއި އެހީދޭ ޖަމުޢިއްޔާތަކުން ގުޅިގެން ދަނީ މަސައްކަތް ކުރަމުންނެވެ.
ފެންބޮޑުވުމާ ގުޅިގެން އެ ސަރަޙައްދުގެ ޞިއްޙީ ޚިދުމަތްދޭ މަރުކަޒުތަކާއި ސްކޫލުތައް ވެސް ވަނީ ބަންދުކޮށްފައެވެ. މި ކަމާ ގުޅިގެން، ހައިހޫނުކަމާ ކުރިމަތިލާން ޖެހިފައިވާ ކުދިންނަށް އެހީތެރިވުމަށް ހިންގަމުން ދިޔަ ޕުރޮގުރާމުތައް ވެސް ހުއްޓުމަކަށް އައިސްފައިވާ ކަމުގައި ޔެޓް ވިދާޅުވިއެވެ. މީގެ އިތުރުން، އެ ސަރަޙައްދުތަކުގައި ބޭރަށް ހިންގުން ފަދަ ފެނުގެ ޒަރީޢާއިން ފެތުރޭ ބަލިތައް ވަނީ ޢާންމުވާން ފަށާފައެވެ. ބޭރަށް ހިންގާތީ މިހާރު ވެސް 2,700 އަށްވުރެ ގިނަ މީހުން ރިޕޯޓު ކޮށްފައިވާ ކަމަށް އެ ޤައުމުން ބުނެއެވެ.