ކާބޯތަކެތީގެ ރައްކާތެރިކަން ކަށަވަރު ކުރުމަށް އޮތް ހުރަސްތަކާ އެކު މި އަހަރުގެ ތެރޭގައި ދުނިޔޭގެ އެކި ކަންކޮޅުތަކުގައި އެތައް މިލިޔަން ބަޔަކު ކާބޯތަކެއްޗަށް ޖެހި، ބަނޑުހައި ހޫނުކަމާ ކުރިމަތިލާން ޖެހިދާނެ ކަމުގެ އިންޒާރު އ.ދ.ގެ ސެކްރެޓަރީ ޖެނެރަލް އެންޓޯނިއޯ ގުތެރޭޝް ދެއްވައިފިއެވެ. ކާބޯތަކެތީގެ ރައްކާތެރިކަން ކަށަވަރު ކުރުމާ ގުޅޭ ގޮތުން މަޝްވަރާ ކުރުމަށް ޤައުމުތަކުގެ މިނިސްޓަރުންގެ ފެންވަރުގެ ބައްދަލުވުމެއް ޖަރުމަނުވިލާތުގެ ބަރލިންގައި މިހާރު ދަނީ ފެށިގެން ކުރިއަށެވެ.
މި ބައްދަލުވުމުގައި ވީޑިއޯ ލިންކް މެދުވެރިކޮށް ވާހަކަފުޅު ދައްކަވަމުން ގުތެރޭޝް ވިދާޅުވީ، ކާބޯތަކެތީގެ ރައްކާތެރިކަމުގެ ހާލަތު ދުވަހަކު ވެސް ދުނިޔެ ނުދެކޭ ފަދަ ހާލަތަކަށް ވެއްޓިދާނެ ކަމުގެ ބިރު އެބައޮތް ކަމަށާއި، އެތައް މިލިޔަނަށް ބަޔަކު ބަނޑަށް ޖެހުމުގެ ކޮޅުމަތި މިހާރު ފެންނަމުންދާ ކަމުގައެވެ. އަދި، ޔޫކްރެއިނުގައި ރަޝިޔާއިން ކުރަމުންދާ ހަނގުރާމައާއި، މޫސުމަށް ކުރަމުންދާ ނޭދެވޭ އަސަރުތަކާއި، ކޮވިޑާއި ގުޅިގެން ކާބޯތަކެތީގެ ރައްކާތެރިކަން ކަށަވަރު ކުރުމަށް ގިނަ ގޮންޖެހުންތަކަކާ ކުރިމަތިވެފައިވާ ކަމުގައެވެ. އަދި، ބާޒާރުގައި ކާބޯތަކެތީގެ އަގުތައް ކޮންޓްރޯލްކޮށް، ކާބޯތަކެތީގެ ރައްކާތެރިކަން ކަށަވަރު ކުރެވެން އޮތް ހުރިހާ ކަމެއް ކުރުމަށް ވެސް އޭނާ ގޮވައިލެއްވިއެވެ.
ސޮމާލިޔާ، ޔަމަން، އަދި ދެކުނު ސޫދާނުގައި މިހާރުވެސް 460,000 އަށްވުރެ ގިނަ މީހުން ކާބޯތަކެއްޗަށް ޖެހިފައިވާ ކަމަށް އ.ދ.އިން ބުނެއެވެ. ކާބޯތަކެތީގެ ރައްކާތެރިކަން ކަށަވަރު ކުރުމުގައި އ.ދ.އިން ގެންގުޅޭ މިންގަނޑު ކަމުގައިވާ "އިންޓެގްރޭޓެޑް ފުޑް ސެކިޔުރިޓީ ފޭސް ކްލެސިފިކޭޝަން (އައި.ޕީ.ސީ)" އިން ދައްކާ ގޮތުގައި، 34 ޤައުމެއްގައި އެތައް މިލިޔަން ބަޔަކަށް މިހާރުވެސް ވަނީ ބަނޑުހައިހޫނު ކަމާ ކުރިމަތިލާން ޖެހިފައެވެ.
ގުތެރޭޝް ވިދާޅުވީ، މި އަހަރުގެ ފަހުކޮޅު ބައެއް ޤައުމުތަކުން ކާބޯތަކެއްޗަށް ޖެހޭނެ ކަމަށް ބެލެވޭ އިރު، އަންނަ އަހަރުގެ ހާލަތު އިތުރަށް ގޯސްވާނެ ކަމަށް ޤަބޫލު ކުރެވޭކަމަށެވެ. އޭނާ ވިދާޅުވީ، 21 ވަނަ ޤަރުނުގައި ޤައުމުތަކުގެ ރައްޔިތުން ކާބޯތަކެއްޗަށް ޖެހި، ބަނޑުހައިހޫނުކަމާ ކުރިމަތިލާން ޖެހުމަކީ، އެއްވެސް ހާލެއްގައި ބަލައިގަނެވޭނެ ކަމެއް ނޫން ކަމުގައެވެ. އަދި، ގޮވާން އެކްސްޕޯޓު ކުރުމުގެ ބާޒާރުގައި 29 އިންސައްތަ ހިއްސާ ކުރާ ޔޫކްރެއިނާއި ރަޝިޔާއާ ދެމެދު ހިނގަމުންދާ ހަނގުރާމައަށް އަވަސް، އަދި ސުލްހަވެރި ނިމުމެއް އައިސްގެން ނޫނީ، ކާބޯތަކެތީގެ ރައްކާތެރިކަން ކަށަވަރު ކުރެވެން ނެތް ކަމަށްވެސް ގުތެރޭޝް ވިދާޅުވިއެވެ.
ޔޫކްރެއިންގައި އުފައްދާ ގޮވާމުގެ ބާވަތްތަކާއި ގަސްކާނާ އެކްސްޕޯޓު ކުރުން، މި އަހަރުގެ ފެބުރުއަރީ މަހުގެ 24 ވަނަ ދުވަހުން ފެށިގެން ވަނީ މެދުކެނޑިފައެވެ. ރަޝިޔާއިން ބުނަނީ، ޔޫކްރެއިނުގައި އެ ޤައުމުގެ ސިފައިން ކުރަމުންދާ ހަނގުރާމަ ހުއްޓާލާނީ، އެ ހަނގުރާމައާ ގުޅިގެން ހުޅަނގުން ރަޝިޔާއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅުތަކަށް ލުއި ދިނުމުން ކަމުގައެވެ.
ހަނގުރާމައިގައި ރަޝިޔާއިން އަތްގަދަކޮށްފައިވާ ޔޫކްރެއިނުގެ ސަރަޙައްދުތަކުގައި ހައްދާ ގޮވާމުގެ ޝިޕްމަންޓުތައް ރަޝިޔާއިން ވަގަށް ގެންގޮސް، އެހެން ޤައުމުތަކަށް ވިއްކަމުންދާ ކަމަށް ޔޫކްރެއިނުން ތުހުމަތު ކުރެއެވެ. އަދި، މި ތުހުމަތުތައް ސާބިތު ކޮށްދިނުމުގެ ގޮތުން އެމެރިކާގެ ކުންފުންޏެއް ކަމަށްވާ "މަކްސާ"އިން ވަނީ ރަޝިޔާގެ ބޯޓުތަކެއް ޔޫކްރެއިންގެ ބަނދަރަކުން ގޮވާން ބަރުކޮށްގެން ސޫރިޔާއަށް ދަތުރު ކުރާ މަންޒަރު ފެންނަ ސެޓެލައިޓް ފޮޓޯތަކެއް ޢާންމު ކޮށްފައެވެ. ނަމަވެސް، ރަޝިޔާއިން މި ތުހުމަތުތައް ދޮގު ކުރެއެވެ.
ތުރުކީ ވިލާތުން މިހާރު ދަނީ، ޔޫކްރެއިނުގައި އުފައްދާ ގޮވާމުގެ ބާވަތްތައް އެކްސްޕޯޓު ކުރުމަށް ފުރުޞަތު ދިނުމަށް ރަޝިޔާއަށް ބާރު އެޅުމުގެ ގޮތުން މެދުވެރިއެއްގެ ދައުރު އަދާކޮށް، މަޝްވަރާތައް ބާއްވަމުންނެވެ. ނަމަވެސް، މި މައްސަލައަށް އަވަސް ހައްލެއް ލިބުމުގެ ކޮޅުމަތި އަދި ފެންނާކަށް ނެތެވެ.