މޫސުމީ ވިއްސާރައިގައި ބޯކޮށް ވާރޭ ވެހުމުގެ ސަބަބުން ބަންގްލަދޭޝްގެ އިރުއުތުރުގެ ސަރަޙައްދުތަކުގައި ފެންބޮޑުވެފައިވާއިރު، ފެނުގެ ޒަރީޢާއިން ފެތުރޭ ބަލިތައް ޢާންމުވެދާނެ ކަމުގެ އިންޒާރު ޞިއްޙަތާ ބެހޭ މާހިރުން ދީފިއެވެ.
ފެން ބޮޑުވުމުގެ އަސަރު އެންމެ ބޮޑަށް ކޮށްފައި ވަނީ ފަރުބަދަމަތީ ސަރަޙައްދެއް ކަމުގައިވާ ސިލްހެތަށެވެ. އެ ރަށުގެ ގިނަ ހިސާބުތައް މިހާރު އޮތީ ފެނު އަޑީގައެވެ. އަދި، 4.6 މިލިޔަނަށް ވުރެ ގިނަ މީހުން ވަނީ އެ މީހުންގެ ގެދޮރުގައި ބަންދުވެފައެވެ.
އެ މީހުންނަށް ސާފު ބޯފެނާއި އެހެނިހެން ޒަރޫރީ ތަކެތި ފޯރުކޮށްދިނުމަށް އަސްކަރިއްޔާއިން ދަނީ މަސައްކަތް ކުރަމުންނެވެ. ބަންގްލަދޭޝްގެ 64 ޑިސްޓްރިކްޓުގެ ތެރެއިން 17 ޑިސްޓްރިކްޓަކަށް ފެނުގެ އަސަރުވަނީ ކޮށްފައެވެ. އަދި އެ ރަށްރަށުގެ މީހުންނަށް އެހީތެރިކަން ފޯރުކޮށްދިނުމަށް އަސްކަރިއްޔާގެ 20 އަށްވުރެ ގިނަ ޓީމުން ދަނީ ހަރަކާތްތެރިވަމުންނެވެ.
ބަންގްލަދޭޝްގެ ޑިޕާޓްމަންޓް އޮފް ޑިޒާސްޓަރ މެނޭޖްމަންޓުގެ އިސްވެރިޔާ އަތީޤުލް ޙައްޤު ވިދާޅުވީ، ފެންގަނޑުތައް ހިނދެން ފަށާފައި ވީ ނަމަވެސް، ފެނުގެ ޒަރީޢާއިން ފެތުރޭ ބަލިތައް ޢާންމުވުމުގެ ބިރު ބޮޑުވެފައިވާ ކަމުގައެވެ. ފެނުގެ ޒަރީޢާއިން ފެތުރޭ ބަލިތައް ޖެހިގެން ރިޕޯޓުކޮށްފައިވާ މީހުންގެ އަދަދު މިހާރު ވެސް 4,000 އަށް އަރައެވެ. އަދި، ސިލްހެތުގައި މިހާރު ވެސް ބޭރަށް ހިންގުމާއި، ހުމާއި، ހަމުގެ ބަލިތައް ވެސް ޢާންމުވެފައިވާ ކަމަށް އެ ރަށުގެ ޞިއްޙަތާ ބެހޭ އޮފިޝަލުން ބުނެއެވެ.
މިއީ، ފާއިތުވި 100 އަހަރުގެ ތެރޭގައި ސިލްހެތަށް ކުރިމަތިވި މި ފަދަ އެންމެ ނުރައްކާތެރި ހާދިސާއެވެ. ފެންބޮޑުވުމާ ގުޅިގެން ކުރިމަތިވި އެކި ހާދިސާތަކުގައި މަރުވި މީހުންގެ އަދަދު 68 އަށް އަރާފައިވާއިރު، މީގެ ތެރެއިން 46 މީހުންނަކީ ސިލްހެތުން މަރުވި މީހުންނެވެ.
ފެންބޮޑުވުމާ ގުޅިގެން އެ ސަރަޙައްދުގެ ދަނޑުވެރިކަމަށް ވެސް ވަނީ ވަރަށް ބޮޑަށް އަސަރު ކޮށްފައެވެ. މި ގޮތުން، 75,000 ހެކްޓަރުގެ ހަނޑޫ ދަނޑުގައި ފެން ބޮޑުވެފައިވާއިރު، އެހެން ބާވަތްތައް ހައްދާ 300,000 ހެކްޓަރުގެ ދަނޑުބިން ވެސް ވަނީ ފެންބޮޑުވުމުގެ ސަބަބުން ހަލާކުވެފައެވެ.
ދެކުނު އޭޝިޔާގެ ޤައުމުތަކަށް ޢާންމު ގޮތެއްގައި ހުޅަނގު މޫސުމުގެ ވިއްސާރަ ކުރަނީ ޖޫން މަހާއި އޮކްޓޫބަރު މަހާއި ދެމެދުގައެވެ. އަދި، މި ދުވަސްވަރު ބަންގްލަދޭޝްގެ އައްސޭރި ފަށުގައިވާ ބިންތިރި ސަރަޙައްދުތަކުގައި ފެންބޮޑުވުމަކީ ޢާންމު ކަމެކެވެ. ނަމަވެސް، ފަހަކަށް އައިސް ފެންބޮޑުވުމުގެ ހާދިސާތައް މި ވަނީ އިތުރުވެފައެވެ. މިއީ، މޫސުމަށް އަންނަމުންދާ ނޭދެވޭ ބަދަލުތަކުގެ ސަބަބުން ކުރިމަތިވި ބަދަލެއް ކަމަށް މޫސުމާއި ބެހޭ މާހިރުން ބުނެއެވެ.
މި ވިއްސާރައިގެ އަސަރު އިންޑިޔާގެ ބައެއް ސަރަޙައްދުތަކަށް ވެސް ވަނީ ކޮށްފައެވެ. މި ގޮތުން، އައްސާމް ސްޓޭޓްގެ ބައެއް ހިސާބުތަކުގައި ފެން ބޮޑުވެފައިވާ އިރު، އެ ސަރަޙައްދުތަކުގައި ގިނަ އަދަދެއްގެ ބަޔަކު ވަނީ ހާލުގައި ޖެހިފައެވެ. އައްސާމްގެ ރަށެއް ކަމަށްވާ ސިލްޗާރުގެ 280,000 އަށްވުރެ ގިނަ މީހުން ވަނީ ފެން ބޮޑުވުމާ ގުޅިގެން އެ މީހުންގެ ގެދޮރުގައި ބަންދުވެފައެވެ. އެ މީހުންނަށް ކާބޯތަކެއްޗާއި ސާފު ބޯފެން ފޯރުކޮށްދިނުމަށް އެ ޤައުމުގެ އަސްކަރިއްޔާއިން ވެސް ދަނީ މަސައްކަތް ކުރަމުންނެވެ.