ސޫދާންގެ ޤަބީލާތަކުގެ މެދުގައި ހިނގަމުންދާ ދާޚިލީ ހަމަނުޖެހުންތަކާ ގުޅިގެން މި ޖޫން މަހުގެ ތެރޭގައި އިތުރު 84,000 މީހަކަށް އަމިއްލަ ގެދޮރާއި ވަޒަން ދޫކޮށް ރައްކާތެރި ހިސާބުތަކަށް ހިޖުރަކުރަން ޖެހުނު ކަމުގައި އ.ދ.އިން ބުނެފިއެވެ. މީގެ ތެރޭގައި ގިނައީ، އެ ޤައުމުގެ ހުޅަނގުގައިވާ ދާރްފޫރުގައި ހިނގަމުންދާ ދާޚިލީ ހަމަނުޖެހުންތަކާ ގުޅިގެން ރައްކާތެރިކަން ހޯދަން މަޖުބޫރުވި ޢާއިލާތަކެވެ.
އ.ދ.އިން ބުނީ، މި އަހަރުގެ ޖަނަވަރީ މަހާ އަޅައިބަލާއިރު، އެ ޤައުމުގެ ރެފިއުޖީންގެ ހާލަތު އިތުރަށް ގޯސްވެފައިވާ ކަމުގައެވެ. މިދިޔަ އަހަރު އެކަނިވެސް، 440,500 އަށްވުރެ ގިނަ މީހުން ރެފިއުޖީންނަށް ވިއެވެ. އެއީ، 2020 ވަނަ އަހަރާ އަޅައިބަލާއިއިރު ފަސް ގުނަ އިތުރު އަދަދެކެވެ.
ސޫދާންގައި ރެފިއުޖީންގެ ހާލަތު ގޯސްވާން ފެށީ 2000 ވަނަ އަހަރު ދާރްފޫރުގައި ހިނގަން ފެށި ދާޚިލީ ހަމަނުޖެހުންތަކާ ގުޅިގެންނެވެ. އަދި، 2003 ވަނަ އަހަރު ސަރުކާރުގެ ފައުޖުތަކާއި ހަނގުރާމަވެރި ޖަމާޢަތްތަކާ ދެމެދު ހަމަނުޖެހުންތައް އިތުރުވެ، 2.5 މިލިޔަން މީހުންނަށް އެ މީހުންގެ ގެދޮރާއި ވަޒަން ދޫކޮށް އެހެން ހިސާބުތަކަށް ބަދަލުވާން ޖެހުނެވެ. މި ހަމަނުޖެހުންތަކުގައި 300,000 އަށްވުރެ ގިނަ މީހުން މަރުވިއެވެ.
ދާރްފޫރުގެ ހުޅަނގުގައި މި މަހު ހިނގި ހަމަނުޖެހުންތަކުގައި މިހާތަނަށް 125 މީހުން ވަނީ މަރުވެފައެވެ. އަދި، 50,000 އަށްވުރެ ގިނަ މީހުން ވަނީ ރެފިއުޖީންނަށް ވެފައެވެ. ކޮރްދޮފާން ސްޓޭޓްގެ ދެ ޤަބީލާއެއްގެ މެދުގައި ހިނގަމުންދާ ހަމަނުޖެހުންތަކުގައި މިހާތަނަށް 19 މީހުން މަރުވެފައިވާއިރު، 15,000 އަށްވުރެ ގިނަ މީހުންގެ ގެދޮރު ވަނީ ގެއްލިފައެވެ. އެ ރަށުގައި ހިނގި ހަމަނުޖެހުންތަކުގައި 4,000 އަށްވުރެ ގިނަ ގޭގައި ވަނީ ހުޅުޖަހާފައެވެ.
ސޫދާންގެ ސަރަޙައްދުތަކުގައި ޞުލްޙަ ޤާއިމު ކުރުމަށް 2020 ވަނަ އަހަރު އެއްބަސްވުމެއް އެކުލަވައިލާފައި ވީ ނަމަވެސް، އެ އެއްބަސްވުން ތަންފީޒު ކުރުމަށް ވަނީ ހުރަސްތަކެއް މެދުވެރިވެފައެވެ. ސޫދާންގެ މާލީ ވަޒީރު ޖިބްރީލް އިބްރާހީމް ވިދާޅުވީ، އެއްބަސްވުން ތަންފީޒު ނުކުރެވިފައި ވަނީ ފައިސާ ނެތުމުން ކަމުގައެވެ.