އޭޝިޔާ ބައްރުގެ ގިނަ ޤައުމުތަކެއްގައި ކޮވިޑް19 ހަލިވިކަމާއިއެކު އަނެއްކާވެސް ފެތުރެމުންދާތީ ބައެއް ޤައުމުތަކުގައި ޓެސްޓްތައް ހެދުން އިތުރުކޮށްފިއެވެ. ބައެއް ޤައުމުތަކުން ދަނީ އާބާދީގެ ބޮޑު ބައެއް ހިސާބުތަކުގައި ޓެސްޓު ހެދުން އިތުރުކޮށް އެ މަސައްކަތް ކުރަމުންނެވެ.
ޗައިނާގެ ސަރަޙައްދެއް ކަމުގައިވާ މަކާއޫއިން ހުސްވި ހަފުތާ ބަންދު ތެރޭގައި ކޮވިޑްގެ އިތުރު ކޭސްތަކެއް ފެނުމާ ގުޅިގެން، އެ ތަނުގެ އާބާދީ ޓެސްޓު ކުރުމުގެ މަސައްކަތް ފަށާފައި ވަނީ އާދީއްތަ ދުވަހުއެވެ. ކޮވިޑް ފެތުރެމުން ފެށުމުން މަކާއޫގެ ގިނަ ވިޔަފާރިތައް ވަނީ ބަންދުކޮށްފައެވެ. އަދި ބުދަ ދުވަހުގެ ކުރިން އެ ސިޓީގެ އާބާދީ ކަމުގައިވާ 600,000 އެއްހާ މީހުން ޓެސްޓު ކުރެވޭނެ ކަމަށް ޗައިނާއިން ބުނެއެވެ.
އޭޝިޔާގެ ޤައުމުތަކުގެ ތެރެއިން އެންމެ ހަލުވިކޮށް މި ބަލި މިހާރު ފެތުރެމުން ދަނީ އުތުރު ކޮރެޔާގައެވެ. އެ ޤައުމުގައި މިއަދު އެކަނިވެސް އިތުރު 18,800 އަށްވުރެ ގިނަ މީހުންނަށް ހުން އައިސްގެން ފަރުވާ ދޭން ޖެހުނު ކަމަށް އެ ޤައުމުން ބުނެއެވެ. މިއީ، އެ ޤައުމުގައި ކޮވިޑް ފެތުރެން ފެށި ފުރަތަމަ ރާޅެވެ. މިދިޔަ މޭ މަހުގެ މެދުތެރެއިން ފެށިގެން މި ބަލީގެ އަސަރު ފެނިފައިވާ މީހުންގެ އަދަދު 4.6 މިލިޔަނަށް އަރާ ކަމަށް ކޮރެއާގެ ރަސްމީ ޚަބަރު ފަތުރާ ކޭ.ސީ.އެން.އޭ.އިން ބުނެއެވެ. ނަމަވެސް، ކޮވިޑް ޖެހުނު މީހުންގެ ރަސްމީ ހިސާބު ކިތާބު އެ ޤައުމުން ޢާންމުކޮށްފައެއް ނުވެއެވެ.
ކޮވިޑް ފެތުރުން ކޮންޓްރޯލް ކުރުމާއި ބަލި ޖެހޭ މީހުންނަށް ފަރުވާ ކުރުމަށް ބޭނުންވާ ސާމާނު އުތުރު ކޮރެޔާއިން ވަނީ ހުސްވެފައެވެ. އެ ޤައުމުން މާސްކާއި ވެންޓިލޭޓަރު ފަދަ ސާމާނު އެންމެ ފަހުން ގަނެފައި ވަނީ އޭޕްރިލް މަހުގެ ތެރޭގައެވެ. މީގެ އިތުރުން، ހުންބަލާ ކަށިގަނޑާއި ޞިއްޙީ ޚިދުމަތްތެރިން ބޭނުންކުރާ އަންގިއާއި ކޮވިޑް ވެކްސިން ވެސް އެ ޤައުމަކު ނެތެވެ.
ވިލާތުގެއިއްތިހާދު (އީ.ޔޫ)ގެ ބައެއް ޤައުމުތަކުގައި ކޮވިޑްގެ ވޭރިއަންޓެއް ކަމުގައިވާ "އޮމިކްރޯން"ގެ ސަބް-ވޭރިއަންޓް ތަކެއް ފެތުރެން ފެށުމާ ގުޅިގެން، އެ ޤައުމުން ވަނީ ފިޔަވަޅުތައް ވަރުގަދަ ކުރަން ފަށާފައެވެ. އަދި، އޮމިކްރޯން ވޭރިއަންޓާ ގުޅިގެން އުފެދިފައިވާ ސަބް-ވޭރިއަންޓްތަކަށް ފަރުވާ ކުރުމަށް ޚާއްޞަކޮށް ފަރުމާކޮށްފައިވާ އައު ވެކްސިނެއް ޓެސްޓު ކުރުމުގެ މަސައްކަތް ޔޫރަޕިއަން މެޑިސިން އޭޖެންސީ (އީ.އެމް.އޭ) އިން މި ވަނީ ފަށާފައެވެ.
އެމެރިކާގެ ކުންފުންޏެއް ކަމުގައިވާ މޮޑާނާއިން އުފައްދާފައިވާ މި ވެކްސިނަކީ، ޗައިނާއިން އެންމެ ފުރަތަމަ ފެނުނު ކޮވިޑްގެ ވޭރިއަންޓްގެ އިތުރުން އޮމިކްރޯން ޖެހުމުން ވެސް ރައްކާތެރިކަން ހޯދައިދޭނެ ވެކްސިނެކެވެ. އެ ކުންފުނިން މި ވެކްސިން އުފައްދާފައި ވަނީ ފައިޒަރ އެންޑް ބަޔޯއެންޓެކްއާ ގުޅިގެންނެވެ.
މި ވެކްސިނަށް ހުއްދަ ލިބުމުން، އޮމިކްރޯން ފެތުރުން ކޮންޓްރޯލް ކުރުމުގެ ގޮތުން ބޫސްޓަރ ޑޯޒްއެއްގެ ގޮތުގައި މި ވެކްސިން ބޭނުން ކުރުމަށް ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ) އިން މި ވަނީ ލަފާ ދީފައެވެ. ޑަބްލިޔު.އެޗް.އޯ.ގެ މުޝީރުންގެ ޕެނަލަކުން ބުނީ، އޮމިކްރޯން ޖެހި މިހާރު ފަސޭހަވެފައިވާ މީހުންނާއި ވެކްސިންގެ ޑޯޒްތައް ފުރިހަމަކޮށްފައިވާ މީހުންނަށް ވެސް، ބޫސްޓަރ ޑޯޒެއް ބޭނުން ކުރުމުން، ބަލިން ރައްކާތެރިވެވޭނެ ފުރުޞަތު އިތުރު ވާނެ ކަމުގައެވެ.
އޮމިކްރޯން ވޭރިއަންޓް އެންމެ ފުރަތަމަ ފެނިފައި ވަނީ ދެކުނު އެފްރިކާއިންނެވެ. އަދި، ދުނިޔޭގެ އެކި ކަންކޮޅުތަކަށް ހަލުވިކަމާ އެކު މި ވޭރިއަންޓް ފެތުރިގެން ދިޔައެވެ. ދިރާސާތަކުން ދައްކާ ގޮތުގައި، އޮމިކްރޯން ވޭރިއަންޓް ޖެހި ބަލި ފަސޭހަވެފައިވާ މީހުންނަށް ވެސް މި ބަލި އަލުން ޖެހުމުގެ ފުރުޞަތު އޮވެއެވެ.
ސަޢޫދީ ޢަރަބިއްޔާއިން މި ވަނީ ކޮވިޑާއި ގުޅިގެން އަޅާފައިވާ ބައެއް ފިޔަވަޅުތަކަށް ލުއިދޭން ފަށާފައެވެ. މީގެ ތެރެއިން އެންމެ ފާހަގަކޮށްލެވެނީ، ކޮވިޑް ފެތުރެމުންދާ ޤައުމުތަކަށް ދަތުރު ކުރުން މަނާކޮށް، ނެރެފައިވާ އެޑްވައިޒަރީތަކަށް އަމަލު ކުރުން ހުއްޓައިލުމެވެ. މި ގޮތުން، އެ ޤައުމުގެ ރައްޔިތުންނަށް ދަތުރުކުރުގެ ހުއްދަ ލިބިފައިވާ އިތުރު ޤައުމުތަކުގެ ތެރޭގައި ތުރުކީވިލާތް، އިންޑިޔާ، އިތިއޯޕިޔާ އަދި ވިއެޓްނާމް ހިމެނެއެވެ.