ރަޝިޔާއިން އަތްގަދަކޮށްފައިވާ ޔޫކްރެއިންގެ ސަރަޙައްދުތައް މިނިވަން ކުރުމަށް ކުރަމުންދާ ހަނގުރާމަ އެތައް އަހަރުތަކަކަށް ދެމިގެން ހިނގައިދާނެ ކަމުގައި ނޭޓޯގެ ސެކްރެޓަރީ ޖެނެރަލް ޖެންސް ސްޓޮލްޓެންބަރގ ވިދާޅުވެއްޖެއެވެ. ޖަރުމަނު ވިލާތުގެ ނޫހަކަށް ދެއްވި އިންޓަރވިއުއެއްގައި އޭނާ ވިދާޅުވީ، ޔޫކްރެއިނަށް އަރައި ރަޝިޔާއިން ފަށާފައިވާ ހަނގުރާމައިގައި އަތްގަދަކޮށްފައިވާ ސަރަޙައްދުތައް މިނިވަން ކުރުމަށް ޔޫކްރެއިނަށް އަސްކަރީ ގޮތުން އެހީތެރިކަން ބޭނުންވާ ކަމުގައެވެ.
މި ހަނގުރާމައަކީ ޚަރަދު ބޮޑު ހަނގުރާމައަކަށް ވާނެ ކަމަށާއި، ޔޫކްރެއިނަށް އެއްބާރުލުން ދިނުން ހުއްޓައި ނުލާނެ ކަމުގައި ވެސް އޭނާ ވިދާޅުވިއެވެ. ޔޫކްރެއިނަށް އަސްކަރީ ގޮތުން އިތުރު އެހީތެރިކަން ފޯރުކޮށްދިނުމާ ގުޅޭ ގޮތުން މަޝްވަރާ ކުރުމަށް ނޭޓޯގެ ޤައުމުތަކުން މި މަހުގެ ފަހުކޮޅު ސްޕެއިންގެ ވެރިރަށް މެޑްރިޑުގައި ބައްދަލު ކުރާނެއެވެ.
މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވޭނީ، ޔޫކްރެއިނަށް އަސްކަރީ ގޮތުން އެހީތެރިކަން ފޯރުކޮށްދިނުމުގެ ގޮތުން އެންމެ ފަހުގެ ހަތިޔާރުތައް އެ ޤައުމަށް ފޯރުކޮށްދިނުމާ ގުޅޭ ގޮތުންނެވެ. ޔޫކްރެއިން އަސްކަރިއްޔާއިން މިހާރު ބޭނުން ކުރަމުން ދަނީ، ކުރީގެ ކުރީގެ ރޫސީ ވިލާތުގެ ހަތިޔާރެވެ. އެ ޤައުމުގެ ސިފައިންނަށް އެންމެ ފަހުގެ ހަތިޔާރު ފޯރުކޮށްދޭނެ ކަމުގެ ޔަޤީން ކަން ސްޓޮލްޓެންބަރގ ވަނީ ދެއްވާފައެވެ.
ރަޝިޔާގެ ފައުޖުތަކުން ޔޫކްރެއިނަށް އަރާފައި ވަނީ ފެބުރުއަރީ މަހުގެ 24 ވަނަ ދުވަހުއެވެ. ޔޫކްރެއިންގެ ބައެއް ސަރަޙައްދުތައް ރަޝިޔާގެ ބާރުގެ ދަށަށް ގެންގޮސްފައިވީ ނަމަވެސް، ޔޫކްރެއިން ސިފައިން ވެސް ދަނީ ކުރިއެރުންތަކެއް ހޯދަމުންނެވެ. މި ގޮތުން، ވެރިރަށް ކީވް ހިފުމަށް ރަޝިޔާ ސިފައިން ކުރަމުންދިޔަ މަސައްކަތްތައް ޔޫކްރެއިންގެ ފައުޖުތަކުން ވަނީ ނާކާމިޔާބު ކޮށްލާފައެވެ.