6 މަސް ފުރިފައިވާ ޅަކުދިންނަށް ވެސް ކޮވިޑް-19ގެ ވެކްސިން ދެވޭނެ ކަމަށް އެމެރިކާގެ ސެންޓަރސް ފޮރ ޑިޒީޒް ކޮންޓްރޯލް އެންޑް ޕްރިވެންޝަން (ސީ.ޑީ.ސީ) އިން ނިންމައިފިއެވެ. ސީ.ޑީ.ސީ.ގެ މި ނިންމުމާ އެކު، 6 މަސް ފުރިފައިވާ ޅަކުދިންނަށް ވެކްސިން ޖެހުމުގެ މަސައްކަތް އަންނަ ހަފުތާގައި ފެށުމަށް އެ ޤައުމުން ދަނީ ތައްޔާރު ވަމުންނެވެ.
ސީ.ޑީ.ސީ.ގެ ޑިރެކްޓަރ ރޮޝެލް ވެލެންސްކީ ވިދާޅުވީ، ކޮވިޑް-19 އިން ރައްކާތެރިކަން ހޯދައިދިނުމަށް ޅަކުދިންނަށް ވެސް ވެކްސިން ދިނުމަށް އެ ކުދިންގެ މައިންބަފައިން ބޭނުންވެފައިވާ ކަމުގައެވެ. އަދި، މިއަދުގެ ނިންމުމާ އެކު އެ ކަމުގެ ދޮރު ހުޅުވިފައިވާ ކަމަށާއި، ވީ އެންމެ އަވަހަކަށް އެ ކުދިންގެ ވެކްސިން ޑޯޒުތައް ފުރިހަމަ ކުރުމަށް މައިންބަފައިންނާއި ބެލެނިވެރިންގެ ކިބައިން އެދިވަޑައިގަންނަވާ ކަމުގައެވެ.
6 މަހުން މަތީގެ ޅަކުދިންނަށް ދޭން ނިންމާފައި ވަނީ މޮޑާނާއާއި ފައިޒަރ-ބަޔޯންޓެކް ވެކްސިނެވެ. އަދި، އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފް.ޑީ.އޭ) އިން ވަނީ، މި އުމުރުފުރައިގެ ކުދިންނަށް މޮޑާނާއާއި ފައިޒަރ ވެކްސިން ދިނުމުގެ ހުއްދަ ދީފައެވެ. ފަސް އަހަރުން މަތީގެ ކުދިންނަށް މިހާރު ވެސް ފައިޒަރ ވެކްސިން ދަނީ ޖަހައިދެމުންނެވެ.
ސީ.ޑީ.ސީ.ގެ ލަފާ ދޭ ޕެނަލުގައި ހިމެނިވަޑައިގަންނަވާ ޑޮކްޓަރެއް ކަމުގައިވާ ބެތް ބެލް ވިދާޅުވީ، ކޮވިޑްގައި ގިނަ އަދަދެއްގެ ޅަކުޑަކުދިން މަރުވަމުންދާ އިރު، އެ ކުދިންނަށް ވެކްސިން ދީގެން އެ ކުދިންގެ ފުރާނަ ސަލާމަތް ކުރެވޭނެ ކަމުގައެވެ. އަދި، ހަ މަސް ފުރި ފަސް އަހަރު ނުވާ ޅަކުދިންނަށް ވެކްސިން ދިނުމަށް އޭނާ ވަނީ މައިންބަފައިންނަށް ގޮވައިލައްވާފައެވެ.
އެމެރިކާގެ ރައީސް ޖޯ ބައިޑަން ވަނީ، މިއީ ކޮވިޑް ކޮންޓްރޯލް ކުރުމަށް ކުރަމުންދާ މަސައްކަތަށް ލިބުނު ވަރަށް ބޮޑު ކާމިޔާބީއެއްގެ ގޮތުގައި ސިފަ ކުރައްވާފައެވެ. އޭނާ ވިދާޅުވީ، އަންނަ ހަފުތާއިން ފެށިގެން 6 މަހުން މަތީގެ ޅަކުދިންނަށް ވެކްސިން ދިނުމަށް ހުޅުވައިލާނެ ކަމުގައެވެ. އަދި، އެ ކަމަށް ޚާއްޞަކޮށްގެން ކުޑަކުދިންގެ ބަލިތަކަށް ފަރުވާދޭ މަރުކަޒުތަކާއި، ހޮސްޕިޓަލުތަކުގެ އިތުރުން ބޭސްފިހާރަތަކުން ވެސް ވެކްސިން ލިބޭނެ އިންތިޒާމު ހަމަޖައްސަވާނަކަމަށް ބައިޑަން ވިދާޅުވިއެވެ.
ޅަކުދިންނަށް ވެކްސިން ދިނުމަށް ގިނަ އަދަދެއްގެ މައިންބަފައިން ބޭނުންވި ނަމަވެސް، އެ ފުރުޞަތު ހުޅުވައިލުމުން މި ކަމަށް ލިބޭނީ ކޮން ކަހަލަ ތަރުހީބެއް ކަން އަދި ސާފެއް ނޫނެވެ. ސަބަބަކީ، އުމުރުން 5 އަހަރާއި 11 އަހަރާ ދެމެދު ކުދިންނަށް ފައިޒަރ ވެކްސިން ދިނުމަށް މިދިޔަ އަހަރުގެ އޮކްޓޫބަރު މަހު ހުޅުވައިލުމުން އެ ކަމަށް ލިބުނު ފިނި ތަރުހީބެވެ. އެ އުމުރުފުރައިގެ ކުދިންގެ ތެރެއިން ވެކްސިން ފުރިހަމަކޮށްފައި ވަނީ އެންމެ 29 އިންސައްތަ ކުދިންނެވެ.
މި ޕުރޮގުރާމުގެ ދަށުން 6 މަސް ފުރި 5 އަހަރު ނުވާ ކުޑަކުދިންނަށް ވެސް މޮޑާނާ ވެކްސިންގެ ދެ ޑޯޒު ދެވޭނެއެވެ. އަދި، ފައިޒާގެ ތިން ޑޯޒު އެ ކުދިން ފުރިހަމަ ކުރަން ޖެހޭނެއެވެ. ސީ.ޑީ.ސީ.ގެ މި ނިންމުމާ އެކު، އެމެރިކާގެ އިތުރު 17 މިލިޔަން ކުޑަކުދިންނަށް ވެކްސިން ދިނުމުގެ ފުރުޞަތު މި ވަނީ ހުޅުވިފައެވެ.
އެމެރިކާގައި 2 މިލިޔަނަށް ވުރެ ގިނަ ކުޑަކުދިންނަށް ކޮވިޑް ޖެހިފައިވާ އިރު، މީގެ ތެރެއިން 20,000 ކުއްޖަކު ހޮސްޕިޓަލުގައި އެޑްމިޓުކޮށްގެން ފަރުވާ ދޭން ޖެހުނެއެވެ. އަދި، 200 އަށްވުރެ ގިނަ ކުޑަކުދިން މަރުވެފައިވާ ކަމަށް ރިޕޯޓުކޮށްފައިވެއެވެ.
އެމެރިކާގެ ރައީސް ޖޯ ބައިޑަން ވަނީ، މިއީ ކޮވިޑް ކޮންޓްރޯލް ކުރުމަށް ކުރަމުންދާ މަސައްކަތަށް ލިބުނު ވަރަށް ބޮޑު ކާމިޔާބީއެއްގެ ގޮތުގައި ސިފަ ކުރައްވާފައެވެ. އޭނާ ވިދާޅުވީ، އަންނަ ހަފުތާއިން ފެށިގެން 6 މަހުން މަތީގެ ޅަކުދިންނަށް ވެކްސިން ދިނުމަށް ހުޅުވައިލާނެ ކަމުގައެވެ. އަދި، އެ ކަމަށް ޚާއްޞަކޮށްގެން ކުޑަކުދިންގެ ބަލިތަކަށް ފަރުވާދޭ މަރުކަޒުތަކާއި، ހޮސްޕިޓަލުތަކުގެ އިތުރުން ބޭސްފިހާރަތަކުން ވެސް ވެކްސިން ލިބޭނެ އިންތިޒާމު ހަމަޖައްސަވާނަކަމަށް ބައިޑަން ވިދާޅުވިއެވެ.
ޅަކުދިންނަށް ވެކްސިން ދިނުމަށް ގިނަ އަދަދެއްގެ މައިންބަފައިން ބޭނުންވި ނަމަވެސް، އެ ފުރުޞަތު ހުޅުވައިލުމުން މި ކަމަށް ލިބޭނީ ކޮން ކަހަލަ ތަރުހީބެއް ކަން އަދި ސާފެއް ނޫނެވެ. ސަބަބަކީ، އުމުރުން 5 އަހަރާއި 11 އަހަރާ ދެމެދު ކުދިންނަށް ފައިޒަރ ވެކްސިން ދިނުމަށް މިދިޔަ އަހަރުގެ އޮކްޓޫބަރު މަހު ހުޅުވައިލުމުން އެ ކަމަށް ލިބުނު ފިނި ތަރުހީބެވެ. އެ އުމުރުފުރައިގެ ކުދިންގެ ތެރެއިން ވެކްސިން ފުރިހަމަކޮށްފައި ވަނީ އެންމެ 29 އިންސައްތަ ކުދިންނެވެ.
މި ޕުރޮގުރާމުގެ ދަށުން 6 މަސް ފުރި 5 އަހަރު ނުވާ ކުޑަކުދިންނަށް ވެސް މޮޑާނާ ވެކްސިންގެ ދެ ޑޯޒު ދެވޭނެއެވެ. އަދި، ފައިޒާގެ ތިން ޑޯޒު އެ ކުދިން ފުރިހަމަ ކުރަން ޖެހޭނެއެވެ. ސީ.ޑީ.ސީ.ގެ މި ނިންމުމާ އެކު، އެމެރިކާގެ އިތުރު 17 މިލިޔަން ކުޑަކުދިންނަށް ވެކްސިން ދިނުމުގެ ފުރުޞަތު މި ވަނީ ހުޅުވިފައެވެ.
އެމެރިކާގައި 2 މިލިޔަނަށް ވުރެ ގިނަ ކުޑަކުދިންނަށް ކޮވިޑް ޖެހިފައިވާ އިރު، މީގެ ތެރެއިން 20,000 ކުއްޖަކު ހޮސްޕިޓަލުގައި އެޑްމިޓުކޮށްގެން ފަރުވާ ދޭން ޖެހުނެއެވެ. އަދި، 200 އަށްވުރެ ގިނަ ކުޑަކުދިން މަރުވެފައިވާ ކަމަށް ރިޕޯޓުކޮށްފައިވެއެވެ.