ބައިނަލްއަޤްވާމީ ގޮތުން ފާހަގަކުރާ މަގުމަތީގެ ސަލާމަތާއި ރައްކާތެރިކަމުގެ ހަފްތާ ފާހަގަކުރުމަށް ރާއްޖޭގައި ކުރިއަށްގެންދާ ފެއަރ ރައީސުލްޖުމްހޫރިއްޔާގެ ނައިބު ފައިސަލް ނަސީމް ފަށްޓަވައިދެއްވައިފިއެވެ.
މި ފެއަރއަކީ ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އިސްނަންގަވައިގެން، ކަމާ ގުޅުންހުރި މުވައްސަސާތަކާ ގުޅިގެން ކުރިއަށްގެންދާ ފެއަރއެކެވެ.
މިފެއަރ ފަށްޓަވައިދެއްވައި ވާހަކަފުޅުދައްކަވަމުން ނައިބު ރައީސް ފައިސަލް ނަސީމް ވިދާޅުވީ މި ސަރުކާރު ފެށުމާއެކު އެންމެ އިސްކަމެއް ދެއްވައިގެން ފެށްޓެވި މަސައްކަތްތަކުގެ ތެރޭގައި މަގުމަތީގެ ސަލާމަތާއި ރައްކާތެރިކަން ކަށަވަރުކުރުމާގުޅޭ ކަންކަން ހިމެނުނުކަމަށެވެ. އެގޮތުން 2019ވަނަ އަހަރު މިކަމާގުޅޭ އެކިއެކި ހަރަކާތްތައް ކުރިއަށްގެންދިޔަކަމަށެވެ. އަދި ޓްރެފިކާގުޅޭ މުހިންމު ޤަވާޢިދުތަކަށްވެސް ޢަމަލުކުރަން ފެށިއެވެ.
ނައިބު ރައީސް ވިދާޅުވީ މިގޮތަށް ކިތަންމެ ދުވަހެއް ފާހަގަކުރިނަމަވެސް، ކަމަށްދޭންވާ ސަމާލްކަން ނުދީ މަގުމަތީގެ ސަލާމަތްތެރިކަން ކަށަވަރު ނުކުރެވޭނެކަމަށެވެ. މިއީ އެންމެން އާނ ބަސް ކިޔައި، މަސައްކަތް ކުރަންޖެހޭ ކަމެއްކަމަށް ނައިބު ރައީސް ވިދާޅުވިއެވެ. އަދި މަގުމަތީގެ ޤަވައިދަށް ޢަމަލުކުރުމަށް ތުއްތު ކުދިންނަށް ނަމޫނާ ބަޔަކަށް ބޮޑެތި މީހުން ވާންޖެހޭކަމަށްވެސް އެމަނިކުފާނު ވިދާޅުވިއެވެ.
މިއީ ޢާންމު ބަލިމަޑުކަމެއް ނޫންކަމަށާ، ކުޑަ އަޒުމަކާއެކު ބަދަލުކުރެވޭނެ ޙާލަތެއްކަމަށް ނައިބު ރައީސް ވިދާޅުވިއެވެ. ދުއްވާ އުޅަނދުތައް މަގުމަތީގައި ގިނަވުމަކީ، މިކަމަށް އޮތް އުޒުރެއް ނޫންކަމަށްވެސް އެމަނިކުފާނު ވިދާޅުވިއެވެ.
"ސަރުކާރުން މިހާރު މި ފަށަނީ ބަހުގެ ޚިދުމަތް ފުޅާކުރުމުގެ މަސައްކަތް. މިނީ ބަހުގެ ޚިދުމަތްވެސް އަންނަ މަހު ފެށޭނެ. މިއީވެސް މަގުތަކުގެ ތޮއްޖެހުން ކުޑަކުރުމާއި، މަގުމަތީގެ ރައްކާތެރިކަން ކަށަވަރުވާނެ ކަމެއް." ނައިބު ރައީސް ވިދާޅުވިއެވެ.
Road Safety Fair 2022#HappeningNow @HPA_MV @MoTCAmv @ADKHospital @igmhmv @hdcmaldives @PoliceMv @MaleCitymv #Love30 #streetsforlife pic.twitter.com/8bU3AlJZaW
— My Hulhumalè (@MyHulhumalemv) June 17, 2022
ފެއަރ ފެށުމަށް ބޭއްވި ރަސްމިއްޔާތުގައި އެޗްޕީއޭގެ ޑިރެކްޓަރ ޖެނެރަލް މައިމޫނާ އަބޫބަކުރު ވިދާޅުވީ މިއަހަރުގެ ފުރަތަމަ 4 މަސްދުވަހުވެސް ރާއްޖޭގައި 1154 އެކްސިޑެންޓް ހިނގާފައިވާކަމަށް ފުލުހުންގެ ތަފާސްހިސާބުތަކުން ދައްކާކަމަށެވެ. އަދި މުމުއްދަތުގައި އެކްސިޑެންޓެއްގައި އެކަކު މި ދުނިޔެ ދޫކޮށްފައިވާކަމަށް މައިމޫނާ ފާހަގަކުރެއްވިއެވެ.
"މި ހަރަކާތުގައި، ތިމާވެއްޓަށް ބޭރުކުރާ ވިހަ ގޭސް މަދުކުރުމަށް ބައިސްކަލު ދުއްވުމަށް މީހުން އަހުލުވެރިކުރުމާއި، މަގުމަތީގެ ގަވައިދުތައް ކިޔައިދިނުމާއި، ފަސްޓް އެއިޑް ދޭނެގޮތާއި ނަފްސާނީ ދުޅަހެޔޮކަމާއި ގުޅޭ މަޢުލޫމާތު ދެވޭނެ." މައިމޫނާ ވިދާޅުވިއެވެ.
މިކަމާ ގުޅޭ އެކި ދާއިރާތައް ގުޅިގެން ބާއްވާ ޕެނަލް ޑިސްކަޝަންއެއްވެސް ބޭއްވުމަށް ވަނީ ހަމަޖެހިފައެވެ. އަދި އިވެންޓްގެ ތެރެއިން ބާއްވާ ލަކީޑްރޯއަކުން ހޮވޭ 54 މީހުންނަށް ހެލްމެޓް ހަވާލުކުރުންވެސް އޮންނާނެއެވެ. މިއީ ހަފްތާއަކަށް ކުރިއަށްގެންދާ ޙަރަކާތްތަކެކެވެ.