ކުރީގެ ކުޅިވަރާ ބެހޭ ވަޒީރު އަދި ހެންވޭރު ހުޅަނގު ދާއިރާގެ މަޖިލިސް މެންބަރު ހަސަން ލަތީފް، 2020 ވަނަ އަހަރުގެ އޮކްޓޯބަރު މަހު ހުށަހެޅުއްވި ކުޅިވަރު ގާނޫނުގެ އިސްލާހުގެ ބިލް މަޖިލީހުން ބޭރުކޮށްލައިފިއެވެ.
މެންބަރު ހަސަން، ހުށަހެޅުއްވި އިސްލާހު ރައްޔިތުންގެ މަޖިލީހުގެ އިޖުތިމާއީ ކޮމެޓީގައި ދިރާސާ ކުރުމަށް ފޮނުވިއިރު، އިޖުތިމާއީ ކޮމެޓީން މަޖިލީހުގެ ތަޅަމަށް ބިލު ހުށަހެޅީ އެ ކޮމެޓީގެ އިއްތިފާގުން އެ ބިލު ފާސްކުރަން ނުފެންނަ ކަމަށް ނިންމުމަށްފަހުއެވެ.
ހަސަން ހުށަހެޅުއްވި އިސްލާހުގައި އެންމެ ގިނަ ބަޔެއްގެ ކަޅި އަމާޒުވީ ކުޅިވަރާ ބެހޭ ގައުމީ މަޖިލީހާއި ކުޅިވަރު ޖަމިއްޔާތަކުގެ އިންތިހާބު ބާއްވާނީ އިލެކްޝަން ކޮމިޝަނުގެ ބެލުމުގެ ދަށުން ކަމަށް ހިމަނުންވާފައިވުމެވެ.
އެކަމާ ދެކޮޅަށް ކުޅިވަރާ ބެހޭ ވަޒީރު އަޙްމަދު މަޚްލޫފްގެ އިތުރުން ރާއްޖޭގެ 18 ގައުމީ ކުޅިވަރު އެސޯސިއޭޝަނުން ވަނީ ފާޑުކިޔައިފައެވެ.
ކުޅިވަރު ގާނޫނަށް ހަސަން ހުށަހެޅުއްވި އިސްލާހުގެ ތެރެއިން ރަނގަޅު ކަންތައްތަކެއް ހުރިކަން ވެސް ގިނަ ބަޔަކު ފާހަގަކުރި އެވެ. އޭގެ ތެރެއިން އެއް ކަމަކީ، ކުޅިވަރު ގާނޫނު ތެރެއިން ވުޖޫދުވެ، ކުޅިވަރު ގާނޫނުގައިވާ މަސްއޫލިއްޔަތުތައް އަދާނުކުރެވި އޮތް، ސްޕޯޓްސް ކޯޕަރޭޝަނަށް ދައުރު ފުޅާވުމެވެ.
މި ބިލު ފާސްކުރުމަށް އިއްޔެގެ ޖަލްސާގައި ވޯޓަށް އެހި ވަގުތު މަޖިލީހުގެ ތަޅަމުގައި ތިއްބެވީ 60 މެމްބަރުންނެވެ. އޭގެ ތެރެއިން ބިލު ފާސްކުރަން ވޯޓުދެއްވީ 21 މެމްބަރުންނެވެ. އެކަމާ ދެކޮޅަށް 35 މެމްބަރުން ވަނީ ވޯޓުދެއްވައިފައެވެ.