ށ. ޅައިމަގަކީ 800 އެއްހާ މީހުންގެ އާބާދީއެއް ދިރިއުޅޭ ރަށެކެވެ. ރަށުގައި ދިރިއުޅޭ ރައްޔިތުންނަށް ދިމާވެފައިވާ އެންމެ ބޮޑު އެއް މައްސަލައަކީ ބަނދަރުގެ ދަތިކަމެވެ.
ރާއްޖޭގެ އެކި ރަށްރަށަށް ދިމާވެފައިވާ ބަނދަރުގެ މައްސަލަ ހައްލުކުރުމަށް ސަރުކާރުން އަންނަނީ ބޮޑެތި މަޝްރޫޢުތައް ހިންގަމުންނެވެ. އެގޮތުން ޅައިމަގު ބަނދަރު ތަރައްޤީކުރުމުގެ މަސައްކަތް ސަރުކާރުން ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާއި ހަވާލުކޮށްފައެވެ. މި މަޝްރޫޢުގެ އަމަލީ މަސައްކަތް 2020 ވަނަ އަހަރު ފަށައިގެން މިހާރު ވަނީ ބޮޑުބައި ނިމިފައިއެވެ. މިމަޝްރޫއަކީ ދައުލަތުގެ ބަޖެޓުން 53.1 މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ.
ޅައިމަގު ބަނދަރު ޒަމާނީ ފެންވަރަށް ތަރައްގީ ކުރުމަކީ އެރަށު ރައްޔިތުންގެ އުންމީދެކެވެ. އެރަށުގެ ބަނދަރު ކުޑަވުމުގެ ސަބަބުންނާއި، ބަނދަރު ފަޅު ތިލަވުމުގެ ސަބަބުން ލަފާފުރާ ދޯނިތަކަށް ވެސް ވަރަށް ބޮޑަށް ދަތިވެފައިވާއިރު، ރައްޔިތުން ތިބީ ބަނދަރުގެ މަސައްކަތް ނިމޭނެ ދުވަހެއްގެ އިންތިޒާރު ގައެވެ.
ޕީއެސްއެމް ނިއުސްއާ ވާހަކަދައްކަވަމުން ޅައިމަގު ކައުންސިލްގެ ރައީސް އާދަމް އަޒްމީރް ވިދާޅުވީ މި މަޝްރޫޢުގެ މަސައްކަތް މިއަހަރު ނިމޭ ހިސާބުގައި ނިމޭނެ ކަމަށެވެ. މިމަސައްކަތް މިހާރު ބާރު ދުވެލީގައި ކުރިއަށްދާކަމަށާއި ކުރިއަށް ދެން އޮތީ ރިވެޓްމެންޓް ޖެހުމުގެ މަސައްކަތްކަމަށް ކައުންސިލްގެ ރައީސް ވިދާޅުވިއެވެ.
ޅައިމަގަކީ ގިނައަދަދެއްގެ އޮޑިދޯނި ފަހަރު ގެންގުޅޭ ރަށަކަށް ވުމުން މި ބަނދަރާއިއެކު އޮޑިދޯނިފަހަރު ގެންގުޅޭ ފަރާތްތަކަށް ގިނަ ފަސޭހަތަކެއް ލިބިގެންދާނެކަމަށް ކައުންސިލްގެ ރައީސް ފާހަގަކުރެއްވިއެވެ. އަދި މި ބަނދަރާއިއެކު ރަށުގެ ވިޔަފާރި ފުޅާވެ ރަށަށް ލިބޭ އާމްދަނީއަށްވެސް އިތުރު ކުރިއެރުމެއް ލިބިގެންދާނެކަމަށް ގަބޫލު ކުރެވޭކަމަށްވެސް އާދަމް އަޒްމީރް ފާހަގަކުރިއެވެ.
"މި ބަނދަރަކީ މިރަށުގެ ރައްޔިތުންގެ ވަރަށް ބޮޑު އުންމީދުތަކަކާ ގުޅިފަ އޮތް ކަމެއް. ފާހަގަކޮށްލަން ޖެހޭ އެއްކަމަކީ މި ބަނދަރު ނިމިގެންދާއިރު މި އަތޮޅުގަ އޮންނަ އެންމެ ފަސޭހަ އެއް ބަނދަރަށް ވެގެން ދާނެކަން. އަދި ގިނަ ބަޔަކަށް ބޭނުންކުރެވޭނެ ބަނދަރަކަށް ވެގެންދާނެ" ޅައިމަގު ކައުންސިލްގެ ރައީސް އާދަމް އަޒްމީރް ވިދާޅުވިއެވެ.
އެކި ސަބަބުތަކާހެދި ޅައިމަގު ބަނދަރު މަސައްކަތް ވަނީ ކަނޑައެޅި ތާވަަލަށްވުރެ ލަސްވެފައެވެ.
މަސައްކަތް ކުރުމަށް ސައިޓް މޮބިލައިޒްކޮށް އެމްޓީސީސީގެ މުވައްޒަފުން މަސައްކަތް ފެށިފަހުން މަޝްރޫޢުގެ ޑިޒައިނަށް 10 ވަރަކަށް ބަދަލު ގެނެސްފައިވާކަމަށް މީގެ ކުރިން އެމްޓީސީސީން ވަނީ ބުނެފައެވެ. އެއީ މަސައްކަތް ލަސްވާ އެއް ސަބަބުކަން އެމްޓީސީސީން ވަނީ ފާހަގަކޮށްފައެވެ. އޭގެ އިތުރުން ކޯވިޑްގެ ދަތި ހާލަތުގައި ވެސް މަޝްރޫޢުގެ މަސައްކަތަށް ގޮންޖެހުންތަކާއި ދިމާވެފައިވާކަން އެކުންފުނިން ވަނީ ފާހަގަކޮށްފައެވެ.
އެހެންނަމަވެސް އެމްޓީސީސީން މަސައްކަތް ކުރަނީ ރައްޔިތުން އެދޭގޮތަށް ކަމަށާ އެއީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ވަރަށް ބޮޑު އެދިވަޑައިގަތުމެއްކަމަށް އެކުންފުނިން ބުނެއެވެ. އެހެންކަމުން މަސައްކަތް ލަސްވީނަމަވެސް ނިމިގެންދާނީ ރައްޔިތުން ބޭނުންވާ ބަދަލުތަކާއެކުގައި ކަމަށް އެ ކުންފުނިން ބުނެއެވެ.
ބަނދަރު މަސައްކަތުގެ އިތުރުންވެސް ޅައިމަގުގައި ތަރައްޤީގެ ބޮޑެތި މަޝްރޫޢުތައް އަންނަނީ ކުރަމުންނެވެ. އޭގެ ތެރޭގައި ޅައިމަގު ސްކޫލްގެ 8 ކްލާސްރޫމާއި ހޯލް އިމާރާތް ކުރުމާއި ރާއްޖޭގެ ޤައުމީ ދަތުރުފަތުރުގެ ނިޒާމް ޤާއިމްކުރުން ހިމެނެއެވެ. މީގެ އިތުރުން ގިނަ މަޝްރޫޢުތައް ކޮންޓްރެކްޓަރުންނާ ޙަވާލުކޮށްފައިވާ ކަމަށް ޕްލޭނިންގ މިނިސްޓްރީން ވަނީ ވިދާޅުވެފައެވެ. މީގެ ތެރެއިން ބައެއް މަޝްރޫޢުތަކުގެ މަސައްކަތް ބީލަން މަރުޙަލާގައިވެސް ކުރިއަށްދާކަމަށް އެ މިނިސްޓްރީން ވިދާޅުވެއެވެ. އެގޮތުން 345 މަޝްރުއެއްގެ ޢަމަލީ މަސައްކަތް މިވަގުތު ކުރިއަށްދާ ކަމަށާއި އަދި 77 މަޝްރޫއެއްގެ ޕްލޭނިން މަސައްކަތްތައް ނިމިފައިވާ ކަމަށް އެ މިނިސްޓްރީން ވިދާޅުވެއެވެ.