ޔޫކްރެއިންގެ ދެކުނުގައިވާ ސިޓީއެއް ކަމުގައިވާ މަރިއުޕޯލްގައި ހަލުވިކަމާ އެކު ކޮލެރާއާއި ނުރައްކާތެރި އެހެން ބަލިތަކެއް ފެތުރެމުންދާ ކަމުގައި އެ ރަށުގެ މޭޔަރު ވިދާޅުވެއްޖެއެވެ. ވަޑީމް ބޮއިޝެންކޯ ވިދާޅުވީ، ރަޝިޔާގެ އުދުވާންތަކުގައި މަރުވެފައިވާ އެތައް ހާސް ބަޔެއްގެ ހަށިތައް އަދިވެސް ވަޅުނުލެވިވާ ކަމަށާއި، އެކަމުގެ ސަބަބުން ވަރަށް ގިނަ ސަރަޙައްދުތަކުގައި ކޮލެރާ ފަދަ ނުރައްކާތެރި ބަލިތައް ފެތުރެމުންދާ ކަމުގައެވެ. އެ ރަށް މިހާރު އެތީ ރަޝިޔާ ސިފައިންގެ އަތްދަށުގައެވެ.
މަރިއުޕޯލްގެ ގިނަ ސަރަޙައްދުތަކުގެ ފެންވަޅުތައް މިހާރު ވަނީ ތަޣައްޔަރުވެފައެވެ. އަދި، މަރުވެފައިވާ އެތައް ހާސް ބަޔެއްގެ ހަށިތައް ވަޅުލުމަށް ކުރަމުންދާ މަސައްކަތްތައް ކުރިއަށް ދަނީ ވަރަށް ލަސް ދުވެއްޔެއްގައެވެ. ބޮއިޝެންކޯ ވިދާޅުވީ، ހަނގުރާމައިގައި އެ ސިޓީން އެކަނި ވެސް މިހާތަނަށް 20,000 އަށްވުރެ ގިނަ މީހުން މަރުވެފައިވާ ކަމަށެވެ. އަދި، ކޮލެރާއާއި ނުރައްކާތެރި އެހެން ބައްޔެއް ކަމުގައިވާ ޑައިސެންޓެރީ ޖެހިގެން މަރުވާ މީހުންގެ އަދަދު ހާހުން މައްޗަށްދާނެ ކަމަށް އޭނާ އަންދާޒާ ކުރައްވައެވެ.
ކޮލެރާއާއި އެހެން ބަލިތައް ފެތުރެން ފެށުމާ ގުޅިގެން މަރިއުޕޯލް މިހާރު ވަނީ ކަރަންޓީން ކޮށްފައެވެ. މާނައަކީ، އެ ރަށް މި ވަގުތު އޮތީ އެއްކޮށް ބަންދުކޮށްފައެވެ. މި ހުސްވި މޭ މަހު ރަޝިޔާއިން އެ ރަށަށް އަމާޒުކޮށް ދިން ހަމަލާތަކުގައި އެ ރަށުގެ ފެނާއި ނަރުދަމާ ނިޒާމު ވަނީ ސުންނާފަތިވެފައެވެ. އަދި، އެ ރަށުގެ ރައްޔިތުން ބޯން މިހާރު ބޭނުން ކުރަނީ ވަޅުތަކުން ނަގާ ފެނެވެ.
ދުނިޔޭގެ ޞިއްޙަތު ޖަމުޢިއްޔާ (ޑަބްލިޔު.އެޗް.އޯ) އިން ވަނީ މި ކަމާ މެދު ކަންބޮޑުވުން ފާޅުކޮށްފައެވެ. އަދި ބޮއިޝެންކޯ ވަނީ, މަރިއުޕޯލްގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް އ.ދ.އާއި ރެޑް ކްރޮސް ޖަމުޢިއްޔާއަށް ގޮވައިލައްވާފައެވެ.