އިނގިލީގެ ނިޝާން ކަށަވަރުކުރެވޭނެ ނިޒާމެއް އަދިވެސް ނެތުމަކީ ނޭގި ޕާޓީތަކަށް މީހުން ވައްދާ މައްސަލަ ހައްލުކުރުމަށް އޮތް ބޮޑު ގޮންޖެހުމެއްކަމަށް އިލެކްޝަންސް ކޮމިޝަނުން ވިދާޅުވެއްޖެވެ.
ޕާޓީތަކަށް މެންބަރަކަށްވުމަށް އިލެކްޝަންސް ކޮމިޝަނަށް ހުށަހަޅާ ފޯމުގައި ޕާޓީތަކުން ސައްޙަ ނޫން އިނގިލީގެ ނިޝާން ހުށަހަޅާ މައްސަލައަކީ ބޮޑު މައްސަލައެކެވެ. މިކަމާ ގުޅިގެން އިލެކްޝަންސް ކޮމިޝަނުން ނޫސްވެރިންނާއެކު ބޭއްވި ނުރަސްމީ ބައްދަލުވުމުގައި، ފިންގާ ޕްރިންޓުގެ ސައްޙަކަން ބެލޭނެ ގޮތާމެދު ނޫސްވެރިއަކު ސުވާލުކުރުމުން އިލެކްޝަންސް ކޮމިޝަނުން ވިދާޅުވީ އިނގިލީގެ ނިޝާންގެ ސައްޙަކަން ކަށަވަރުކުރެވޭނެ އެއްވެސް ނިޒާމެއް އަދިވެސް ނެތްކަމަށެވެ.
އިލެކްޝަންސް ކޮމިޝަނުން ވިދާޅުވީ މިކަން ޙައްލުކުރަން މަދުވެގެން ހަތް މިލިއަން ރުފިޔާގެ ބަޖެޓެއް ބޭނުންވާކަމަށެވެ. އެހެންނަމަވެސް ސައްޙަ ނޫން ފޯމުތަކުގެ ޝަކުވާތަކާގުޅިގެން ފޮރެންސިކް އިންވެސްޓިގޭޝަން ކުރަންޖެހިއްޖެ ހާލަތުގައި ފުލުހުންނާ ގުޅިގެން އެކަން ކުރެވޭނެ އިންތިޒާމު ހަމަޖެހިފައިވާކަމަށް އެކޮމިޝަނުން ވިދާޅުވިއެވެ. .
ނޭގި ޕާޓީތަކަށް މީހުން ވެއްދުމުގެ މައްސަލައަކީ ހައްލުކުރަންޖެހޭ ބޮޑު މައްސަލައެކެވެ. މިކަމުގައި އެންމެބޮޑު ޒިންމާއެއް އޮތީ ސިޔާސީ ޕާޓީތަކުގައިކަމަށް އިލެކްޝަންސް ކޮމިޝަނުން ވިދާޅުވެއެވެ.