ކޮވިޑް-19 ހަލުވިކަމާ އެކު ފެތުރެމުން ދިޔުމާ ގުޅިގެން ޗައިނާގެ ވެރިރަށް ބެއިޖިންގގައި އަޅާފައިވާ ރައްކާތެރި ކަމުގެ ފިޔަވަޅުތަކަށް އިތުރު ލުއިތަކެއް ދީފިއެވެ.
ބެއިޖިންގގެ ރައްޔިތުންނަށް އެންމެ ފަހުން ދީފައިވާ ލުއިތަކުގެ ތެރޭގައި، ކަބޯތަކެތީގެ ޚިދުމަތް ދޭ ތަންތަނުގެ އެތެރޭގައި ކަސްޓަމަރުންނަށް ޚިދުމަތް ދިނުމުގެ ހުއްދަ އަލުން މި ވަނީ ދީފައެވެ.
ކޮވިޑްގެ ކޭސްތައް އިތުރުވުމާ ގުޅިގެން މިދިޔަ މޭ މަހު ކުރީކޮޅުން ފެށިގެން އެ ތަންތަން ވަނީ ބަންދުކޮށްފައެވެ. ނަމަވެސް، "ޓޭކްއަވޭ" ޚިދުމަތް ދިނުމަކަށް މީގެ ކުރިން ހުރަހެއް ނެތެވެ.
މީގެ އިތުރުން، ބެއިޖިންގގައި ޢާންމު ހާލަތަކަށް ރުޖޫޢަވުމުގެ ގޮތުން އޮފީސްތައް ހުޅުވައިގެން މަސައްކަތް ކުރުމާއި، ދުއްވާ އުޅަނދުފަހަރުތަކާއި މަގުތައް ބޭނުން ކުރުމަށް ވެސް މިހާރު ވަނީ ހުއްދަ ދީފައެވެ. ނަމަވެސް، އަމިއްލަ ފަރާތްތަކުން ހިންގާ ކުންފުނިތަކާއި އޮފީސްތަކުން، އެ އޮފީސްތަކުގެ މުވައްޒަފުންނަށް ގޭގައި މަސައްކަތް ކުރުމަށް ދަނީ ބާރު އަޅަމުންނެވެ.
ޢާންމު ތަންތަން ބޭނުން ކުރުމުގެ ހުއްދަ ބެއިޖިންގގައި ދީފައި ވީ ނަމަވެސް، އެ ފަދަ ތަންތަން ބޭނުން ކުރުމުގެ 72 ގަޑިއިރު ކުރިން ޕީ.ސީ.އާރް. ޓެސްޓެއް ހަދަން ޖެހެއެވެ. ބޭނުމަކީ، ބަލީގެ އެއްވެސް އަލާމާތެއް ފެނިއްޖެ ހާލަތެއްގައި ކޮވިޑް ޓެސްޓު ހެދުމަށް ރައްޔިތުންނަށް ބާރު އަޅައި، ޓެސްޓު ކުރުމަކީ ޢާންމު ކަމަކަށް ހެދުމެވެ.
ކޮވިޑާއި ގުޅިގެން ބެއިޖިންގގައި އަޅާފައިވާ ފިޔަވަޅުތަކަށް ލުއިތަކެއް ދީފައި ވީ ނަމަވެސް، ކޭސްތަކުގެ އަދަދު ވަނީ އިތުރުވެފައެވެ. މި ގޮތުން، ބެއިޖިންގ އިން ބަލީގެ އަލާމާތްތަކާ އެކު އިތުރު 16 ކޭސްއެއް ފެނިފައިވާއިރު، ބަލީގެ އަލާމާތެއް ނެތް ތިން މީހެއް ވެސް ވަނީ ޕޮޒިޓިވްވެފައެވެ.
ކޮވިޑްގެ ވޮމިކްރޯން ވޭރިއަންޓާ އެކު އެރި ރާޅުގައި ކޭސްތަކުގެ އަދަދުތައް އިތުރުވެ ފުރަބަންދު ކުރި އަނެއް ސިޓީއަކީ، ޝަންގްހާއީއެވެ. ނަމަވެސް، ދެ މަސް ދުވަހުގެ ދިގު ފުރަބަންދަކަށް ފަހު، އެ ސިޓީ ވެސް މިހާރު ދަނީ ޢާންމު ހާލަތަކަށް ރުޖޫޢަވަމުންނެވެ.
މުޅި ޗައިނާއަށް ބަލައިލާއިރު، ދުވާލެއްގެ މައްޗަށް ޖުމްލަ ގޮތެއްގައި ޕޮޒިޓިވްވާ ކޭސްތަކުގެ އަދަދު އުޅެނީ 150 އިން މަތީގައެވެ. މި ގޮތުން، އިއްޔެ 162 ޕޮޒިޓިވް ކޭސް ފެނިފައިވާ އިރު، ހޮނިހިރު ދުވަހު ވަނީ އިތުރު 171 ކޭސް ފެނިފައެވެ. މި ބަލީގައި ޗައިނާއިން މިހައިތަނަށް މަރުވި މީހުންގެ އަދަދު އުޅެނީ 5,226 ގައެވެ.