ތުރުކީވިލާތުގެ ޙަމަލާތަކުން ދިފާޢުވުމަށް ސޫރިޔާގެ އެހީތެރިކަމަށް ކުރުދީން އެދިއްޖެއެވެ.
ސޫރިޔާގެ އުތުރުގައި ޙަރަކާތްތެރިވާ ކުރުދީ ހަނގުރާމަވެރިންނާ ދެކޮޅަށް ތުރުކީވިލާތުން ވަރުގަދަ އަސްކަރީ ޙަރަކާތްތަކެއް ކުރިޔަށްގެންދިޔުމަށް ނިންމާފައިވާކަން އިޢުލާނުކޮށްފައިވަނިކޮށް ސީރިޔަން ޑިމޮކްރެޓިކް ފޯސަސް، އެސްޑީއެފުންވަނީ ސޫރިޔާގެ އަސްކަރިއްޔާއާ ގުޅިގެން މަސައްކަތްކުރުމަށް ބޭނުންވާކަމަށް ބުނެފައެވެ. އެސްޑީއެފުން ބުނެފައިވަނީ ތުރުކީވިލާތުގެ ޙަމަލާތަކުން ސޫރިޔާގެ އުތުރުގެ ސަރަޙައްދުތައް ދިފާޢުކުރުމަށް ސޫރިޔާގެ އަސްކަރިއްޔާގެ އެހީތެރިކަން ބޭނުންވާކަމަށެވެ. ނަމަވެސް ސޫރިޔާގެ އުތުރުގެ ސަރަޙައްދުތަކަށް އެ ޤައުމުގެ އަސްކަރިއްޔާއިން ސިފައިން ފޮނުވުމުގެ ބަދަލުގައި އެސްޑީއެފުން ބޭނުންވަނީ ވައިގެ މަގުން އެ ސަރަޙައްދުތައް ދިފާޢުކުރުމަށެވެ. އެ ގޮތުން އެސްޑީއެފުން އެދިފައިވަނީ ތުރުކީވިލާތުގެ ހަނގުރާމަމަތީ މަތިންދާބޯޓުތަކާ ދެކޮޅަށް ސޫރިޔާގެ އަސްކަރިއްޔާގެ ވައިގެ ދިފާޢީ ނިޒާމުން ޙަރަކާތްތެރިވުމަށެވެ.
އެމެރިކާގެ އެހީތެރިކަމާއި އެއްބާރުލުމާއެކު އުފައްދާފައިވާ އެސްޑީއެފުން ފާއިތުވި ދުވަސްތަކުގައި ޙަރަކާތްތެރިވަމުންދަނީ އައިއެސް ޖަމާޢަތާ ދެކޮޅަށެވެ. އެހެންކަމުން އައިއެސް ޖަމާޢަތާއި ތުރުކީވިލާތާ އެއްފަހަރާ ކުރިމަތިލުމަކީ އެސްޑީއެފަށް އުނދަގޫކަމަކަށްވާނެއެވެ. އެސްޑީއެފުގެ ފައުޖުތަކުގައި ގިނައިން ޙަރަކާތްތެރިވަނީ ކުރުދީ ހަނގުރާމަވެރިންނެވެ. ކުރުދީންނާ ދެކޮޅަށް ތުރުކީވިލާތުން ހަނގުރާމަކުރަމުންދާތާ 40އަށްވުރެ ގިނަ އަހަރުވަނީ ވެފައެވެ.
ސޫރިޔާގެ ދާޚިލީ ހަނގުރާމާގައި ތުރުކީވިލާތުންވަނީ މުޙިއްމު ދަޢުރެއް ޢަދާކޮށްފައެވެ. އެ ގޮތުން އެ ޤައުމުންވަނީ ސޫރިޔާގެ ރައީސް ބައްޝާރުލް އަސަދާ ދެކޮޅު ހަނގުރާމަވެރިންނަށް އެހީތެރިކަން ފޯރުކޮށްދީފައެވެ. ސޫރިޔާގެ ސަރުކާރުން ސިފަކުރައި ގޮތުގައި ތުރުކީވިލާތަކީ އިސްތިޢުމާރީ ބާރެކެވެ. މީގެ ކުރިންވެސް ސޫރިޔާއާއި ތުރުކީވިލާތުގެ ފައުޖުތަކާ ދެމެދު ހަނގުރާމައެއް ފެށުމުގެ ބިރުވެރިކަން އުފެދިފައިވެއެވެ.