"ޑްރެއިންޑް ކަނޑުމަސް ޗަންކްސް"ގެ ނަމުގައި މިފްކޯއިން މުޅިން އައު މަސްދަޅެއް ލޯންޗްކޮށްފިއެވެ. މިހާރު ކުރިއަށްދާ ފުޑް އެންޑް ބެވަރޭޖް ޝޯގައި މިފްކޯއިން ލޯންޗްކޮށްފައިވާ މި މަސްދަޅަކީ އުފެއްދުންތެރި ޓެކްނޮލޮޖީއެއްގެ އެހީގައި ކުޑަތެޔޮފޮދެއްގައި ތައްޔާރުކުރެވިފައިވާ މަސްދަޅެކެވެ.
މިއީ މިބާވަތުގެ މަސްދަޅު ރާއްޖޭގެ ބާޒާރަށް ނެރޭ ފުރަތަމަ ފަހަރެވެ. މިފްކޯއިން ވިދާޅުވީ ކުޑަ ތެޔޮފޮދެއްގެ ސަބަބުން ގިނަ ފަސޭހަތަކެއް މިމަސްދަޅު ބޭނުން ކުރާ މީހުންނަށް ލިބޭނެކަމަށެވެ. އެ ގޮތުން ދަޅުގައި އެކުލެވޭ ތެޔޮ އުކާލަން ނުޖެހުމުގެ ސަބަބުން ކެއްކުމުގައި މިމަސްދަޅު ބޭނުންކުރަން ފަސޭހަވެފައި، ކެއްކުމުގެ ތެރޭގައި ތެލުގެ ސަބަބުން ބަދިގެތެރެ ތަޣައްޔަރުވުން ކުޑަކޮށްދޭނެކަމަށް މިފްކޯއިން ދެކެއެވެ.
އަލަށް ތައާރަފްކުރި މަސްދަޅުގެ ރަހަބެލުން މިހާރު ކުރިއަށްދާ ފުޑް އެން ބެވަރޭޖަރސް ޝޯ ގައި ބަހައްޓާފައިވާ މިފްކޯގެ ސްޓޯލުގައި ހަމަޖެހިފައިވެއެވެ. މި މަސްދަޅު މި ހިނގާ ޖޫންމަސްތެރޭގައި މާރކެޓަށް ނެރުމަށް ވަނީ ޕްލޭންކޮށްފައެވ. މި އުފެއްދުން ސަންފްލާވަރ އޮއިލް، ސޯޔާ ބީން އޮއިލް އަދި އޮލިވް އޮއިލް ފަދަ ތަފާތު ރަހަތަކުގައި އުފައްދާނެކަމަށް މިފްކޯއިން ވިދާޅުވެއެވެ. މިއީ މިހާރު މިފްކޯއިން އުފައްދާ ޗަންކްސް އިން އޮއިލްއާ އަޅާބަލާއިރު ނިސްބަތުން އަގުހެޔޮ ޕްރޮޑަކްޓެކެވެ.
މިފްކޯއަކީ މީގެކުރިންވެސް ތަފާތު އީޖާދީ އުފެއްދުންތަކެއް ބާޒާރަށް ނެރެފައިވާ ކުންފުންޏެކެވެ. އެގޮތުން ނިމިދިޔަ ރޯދަމަހަށް ޚާއްސަކޮށްގެން މިފްކޯއިން ވަނީ އައު ދެ ވަތްތަރެއްގެ މަސްދަޅު ބާޒާރަށް ނެރެފައެވެ. އެގޮތުން ބަނޑައިދޫ މަސްދަޅާއި ކުޅި ލުނބޯ ފެނުގައި ބަންދުކޮށްފައިވާ މަސް ދަޅެއް މިފްކޯއިން ވަނީ ބާޒާރަށސް ނެރެފައެވެ.