ކުރިއަށް އޮތް ސީޒަންގައި ނިއުރޭޑިއަންޓްގެ ގޯލް ބަލަހައްޓާނީ ޤާނާގެ ކީޕަރެއްކަމަށް އެކުލަބުން ބުނެފިއެވެ. ކްލަބް ހިންގުމުގައި މިވަގުތު އިސްކޮށް ހަރަކާތްތެރިވާ އެކުލަބުގެ ކުރީގެ ކުޅުންތެރިޔާ އަހުމަދު ނިޔާޒް ބުނީ ކީޕަރުގެ ރިލީޒްވެސް މިހާރު ލިބިފައިވާކަމަށެވެ.ނިއުރޭޑިއަންޓަށް ގެންނަ ކީޕަރަކީ ޤާނާގެ ފުރަތަމަ ޑިވިޝަނަށް ކުރިން ކުޅެފައިވާ ކުޅުންތެރިއެކެވެ. މިރޭ ރިލީޒް ލިބުނު ނިއުއަށް ގެންނަ އަބޫ ސުލައިމާނާ އެންމެފަހުން މިދިޔަ އަހަރު ކުޅެފައިވަނީ އިތިއޯޕިޔާ ލީގުގައެވެ. އަންނަމަހު 31 އަހަރުފުރޭ ޤާނާގެ ކީޕަރަކީ ތަޖުރިބާކާރު ކީޕަރެއްކަމަށް ނިއުއިން ބުނެއެވެ.ފާއިތުވި ސީޒަންގައި ބިދޭސީ ދެކީޕަރުން ނިއުގެ ގޯލް ބެލެހެއްޓިއެވެ. އޭގެ ކުރީ ތިން ސީޒަންގައި ނިއުގެ ގޯލް ބެލެހެއްޓީ ރާއްޖޭގެ އެއްވަނަ ކީޕަރު އިމްރާން މުޙައްމަދެވެ. އިމްރާންގެ ކުރިންވެސް ނިއުގެ ގޯލް ބިދޭސީ ކީޕަރުން ބެލެހެއްޓިއެވެ. ސްޓޮއިކޯފްއާއެކު ނިއުރޭޑިއަންޓް އޭއެފްސީކަޕް ސެމީފައިނަލަށް ދިޔައީވެސް ބިދޭސީ ކީޕަރަކާއެކުގައެވެ. އެއީ ލަންކާގެ ސަދުމް ދެވިންދާއެވެ. މިއަހަރު އަނެއްކާވެސް ނިއު ނިކުންނަނީ ސްޓޮއިކޯފްގެ އިރުޝާދުގެ ދަށުންނެވެ.