ޞުމާލިޔާއަށް އެމެރިކާގެ 700 ސިފައިން ފޮނުވުމުގެ ޙުއްދަ އެ ޤައުމުގެ ރައީސް ޖޯ ބައިޑަން ދެއްވައިފިއެވެ.
ޞުމާލިޔާގައި ކުރިން ޙަރަކާތްތެރިވި އެމެރިކާ ސިފައިން އަނބުރައި ޤައުމަށް އައުމަށް ޢަމުރުކުރައްވާފައިވަނީ ކުރީގެ ރައީސް ޑޮނަލްޑު ޓުރަންޕެވެ. އެއާއެކު ސުމާލިޔާގައި ތިބި އެމެރިކާގެ 700 ސިފައިންވަނީ އެނބުރި ޤައުމަށް އައިސްފައެވެ. ޞުމާލިޔާގައި އެމެރިކާ ސިފައިން ކުރަމުންދިޔަ މައިގަނޑު މަސައްކަތަކީ އަލްޤައިދާ ޖަމާޢަތާ ހަނގުރާމަކުރުމެވެ.
މަޢުލޫމާތު ލިބިފައިވާ ގޮތުގައި އަލުން ސިފައިން ފޮނުއްވުމަށް ބައިޑަން ނިންމެވީ ޞުމާލިޔާގައި ޙަރަކާތްތެރިވާ ހަނގުރާމަވެރި ޖަމާޢަތެއްކަމަށްވާ އަލްޝަބާބާ ދެކޮޅަށް ޙަރަކާތްތެރިވުމަށެވެ. އަދި އަލްޝަބާބާ ދެކޮޅަށް ހަނގުރާމަކުރުމަށް ޞުމާލިޔާގައި އެމެރިކާގެ ސިފައިން ޤާއިމުވެ ތިބުން މުޙިއްމުކަމަށާއި އެ ޤައުމުން އެމެރިކާގެ ސިފައިން ފޭބުމުން އެ ޖަމާޢަތުގެ ނުރައްކާތެރިކަން ބޮޑުވެފައިވާކަމަށް ބައިޑަން ޤަބޫލުކުރައްވައެވެ.
އަލްޤައިދާއާ ގާތްގުޅުންތަކެއް އޮންނަ އަލްޝަބާބުން ބޭނުންވަނީ ޞުމާލިޔާގެ ވެރިކަން ބަދަލުކޮށް އެ ޤައުމުގައި އިސްލާމީ ޝަރީޢާ ޤާއިމުކުރުމަށްކަމަށް އެ ޖަމާޢަތުން ބުނެފައިވެއެވެ. 1991ވަނަ އަހަރުގެ ތެރޭގައި އެ ޤައުމުގައި އޮތް ހުދުމުހުތާރުވެރިކަން ބަދަލުވިފަހުން އެ ޤައުމުގައި ހަމަޖެހިގެން ވެރިކަންކުރެވޭ ސަރުކާރެއް ޤާއިމެއް ނުކުރެވެއެވެ. އެ ގޮތުން އަވަށްޓެރި ޤައުމުތަކުގެ އަސްކަރީ އެހީތެރިކަމާއެކު އެ ޤައުމުގެ ސަރުކާރުގެ ފުރިހަމަ ބާރު ހިނގަނީ ހަމައެކަނި ވެރިރަށް މަގަދިޝޫގައެވެ. 2020ވަނަ އަހަރުގެ ޑިސެންބަރު މަހުގެ ތެރޭގައި އެމެރިކާގެ ސިފައިން ޞުމާލިޔާއިން ފޭބި ނަމަވެސް އަވަށްޓެރި ޤައުމުތަކުގެ އެހީތެރިކަމާއެކު އަލްޤައިދާއާއި އަލްޝަބާބާ ދެކޮޅަށް ޙަމަލާދީފައިވެއެވެ.