ބަދަހި އާއިލާއެއް ބިނާކޮށް މުޖުތަމައުގައި ކުޑަކުދިންނަށް ދިމާވާ މައްސަލަތައް ހުއްޓުވުމުގައި ފިރިހެނުންގެ ހިއްސާ ބޮޑުކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް، ޢާއިޝަތު މުޙައްމަދުދީދީ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ "އާއިލީ ގުޅުން ބަދަހިކުރުމުގައި ފިރިހެނުންގެ ހިއްސާ" މިޕްރޮގްރާމް އިފްތިތާހްކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް، ޢާއިޝަތު މުޙައްމަދުދީދީ ވިދާޅުވީ ޖިންސީ އަނިޔާގެ ޝިކާރައަކަށްވެފައިވާ ކުޑަކުދިންނަށް ދޭންޖެހޭ އެހީތެރިކަން ފޯރުކޮށްނުދީ، ބޮޑެތިވުމާއިއެކު އުފާވެރި ޒަވާޖީ ހަޔާތެއް ހޯދުމަކީ އެހާ ފަސޭހަކަމެއް ނޫންކަމަށެވެ. މިކަންކަން ހައްލުވެގެންދާނީ ފިރިހެނުން މިކަމަށް ވިސްނާ އާއިލާގެ ރައްކާތެރިކަން ކުއްޖާއަށް ފުރިހަމައަށް ލިބިގެންކަމަށް މިނިސްޓަރ ވިދާޅުވިއެވެ. މިފަދަ އަމަލުތަކުގައި ފިރިހެނުންގެ ހިއްސާ ބޮޑުކަން ފާހަގަކުރައްވާ މިފަދަ އަމަލުތައް ހުއްޓުވުމަށް ފިރިހެނުން މަސައްކަތްކުރުމަކީ ވަރަށް މުހިންމު ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ.
"އަޅުގަނޑުމެން ނަފްރަތު ކުރަންފަށަމާތޯ މި އަމަލުތައް ހިނގަމުންދާއިރު އެނގިތިބެ މިކަމާ އަޅާނުލާ ބޮޑެތި މީހުންގެ އަޅާނުލުމަށް. އަޅުގަނޑުމެން މިކަން ހުއްޓުވުމަށް ތެދުވާކަމަށްވަންޏާ ހަމައެކަނި ޖެންޑަރ މިނިސްޓްރީން ހުއްޓުވުމަށް ތެދުވެގެން މިކަމެއް ނުވާނެ. މިކަން ހުއްޓުވޭނީ ފުލުހުންނާއި މިކަން ނުކުރާ ހުރިހާ ރައްޔިތުން ތެދުވެގެން" މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް، ޢާއިޝަތު މުޙައްމަދުދީދީ ވިދާޅުވިއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ ޑައިރެކްޓަރ އަބްދުﷲ އަޝްރަފް ވިދާޅުވީ އިފްތިތާހްކުރެވިގެންދިޔަ ޕްރޮގްރާމަކީ ސިލްސިލާކޮށް ކުރިއަށްގެންދިޔުމަށް ހަމަޖެހިފައިވާ ޕްރޮގްރާމެއް ކަމަށެވެ. އެގޮތުން މި ޕްރޮގްރާމްގެ އެންމެ ބޮޑު މަގްސަދަކީ އާއިލާތަކުގެ ގުޅުން ބަދަހިކުރުމަށްޓަކައި ފިރިހެނުންގެ ހިއްސާ އިތުރުކުރުން ކަމުގައި އޭނާ ވިދާޅުވިއެވެ.
"އަޅުގަނޑުމެން ދޭން ބޭނުންވާ މެސެޖްތަކަކީ ކޮބާތޯ އާއިލީ ގުޅުން ބަދަހިކުރުމަށްޓަކައި ކުރެވޭނެ ކަންކަމަކީ ކޮބައިކަމާއި، އާއިލީ ގުޅުން ހީނަރުވުމަށް ކޮބާތޯ ދިމާވާ މައްސަލަތަކަކީ. މިކަން ހައްލުކުރުމަށްޓަކައި ކޮބާތޯ ކުރެވޭނެ ކަންތައްތަކަކީ. އަޅުގަނޑުމެންގެ ބޭނުމަކީ ވީހާވެސް ގިނަބަޔަކާއި ހަމައަށް މި މައުލޫމާތުތައް ދެވި މި ޕްރޮގްރާމް ކާމިޔާބުކަމާއިއެކު ކުރިއަށްދިޔުން" މިނިސްޓްރީގެ ފަރާތުން ވިދާޅުވިއެވެ.
އާއިލީ ގުޅުން ބަދަހިކުރުމުގައި ފިރިހެނުންގެ ހިއްސާ މިޕްރޮގްރާމް އިފްތިތާހް ކުރުމަށްފަހު މިއަދުވަނީ ސަރުކާރުގެ ކުންފުނިތަކާއި އޮފީސްތަކުގެ ފިރިހެން މުވައްޒަފުންނަށް އަމާޒުކޮށްގެން މިޕްރޮގްރާމް ހިންގާފައެވެ. މީގެ އިތުރުން ކުރިއަށްއޮތްތަނުގައި އެކި ދާއިރާތަކުގައި މަސައްކަތްކުރާ އަމިއްލަ ފަރާތްތަކާއި އާންމުންނަށް އަމާޒްކޮށްގެންވެސް މިޕްރޮގްރާމް ކުރިއަށް ގެންދާނެ ކަމަށް ޖެންޑަރ މިނިސްޓްރީން މަޢުލޫމާތުދެއެވެ.