ހުޅަނގުގެ ބާރުތަކުން ފިއްތުންތައް ކުރިމަތިކުރި ނަމަވެސް ޢުމާނުން އިތުރަށް ތެޔޮ ނުވިއްކާނެކަމުގެ ޔަޤީންކަން ރަޝިޔާއަށް ދީފިއެވެ.
ޢުމާނުގެ ވެރިރަށް މަސްޤަޠުގައި އެ ޤައުމުގެ ސުލްޠާން ހައިޝަމު ބިން ޠާރިޤާއި ރަޝީޔާގެ ޚާރިޖީ ވަޒީރު ސަރްގައި ލަވުރޯފް ބައްދަލުކުރައްވައި ތެޔޮ ވިއްކާ ޤައުމުތަކުގެ ޖަމުޢިއްޔާ، އޯޕެކުގެ އެއްބަސްވުންތަކަށް ޢަމަލުކުރުމުގައި ދެމިތިބުމާ ގުޅޭގޮތުންވަނީ މަޝްވަރާކުރައްވައިފައެވެ. ދުނިޔޭގެ ބާޒާރަށް ތެޔޮ ނެރޭނެ ޢަދަދާއި ވިއްކާނެ އަގުތައް ކަނޑައަޅަނީ އޯޕެކުންނެވެ. އެހެންކަމުން އެ ދެ ޤައުމުންވެސްވަނީ އޯޕެކުގެ އެއްބަސްވުންތަކާ ޚިލާފަށް ތެޔޮ ވިއްކާ ޢަދަދު އިތުރުނުކުރުމަށް އެއްބަސްވެފައެވެ. ސަޢުދީ ޢަރަބިއްޔާއަށްފަހު ދުނިޔޭގެ ބާޒާރަށް ދެވަނައަށް އެންމެ ގިނައިން ތެޔޮ ނެރެނީ ރަޝިޔާއިންނެވެ. އަދި ޢުމާނަކީވެސް ދުވާލެއްގެ މައްޗަށް މިލިޔަނެއްހާ ފީފާގެ ތެޔޮ ވިއްކާ ޤައުމެކެވެ.
ފެބްރުއަރީ މަހުގެ 24ވަނަ ދުވަހު ޔޫކްރެއިނަށް ވަރުގަދަ ޙަމަލާތަކެއް ދޭން ފެށުމުން ރަޝިޔާއާ ދެކޮޅަށް ހުޅަނގުގެ ބާރުތަކުންވަނީ ހަރުކަށި އިޤްތިޞާދީ ދަތިކުރުމުގެ ފިޔަވަޅުތަކެއް އަޅައިފައެވެ. އަދި ރަޝީޔާގެ ތެޔޮ ގަތުން ހުއްޓާލުމަށް އެ ޤައުމުތަކުންވަނީ މަސައްކަތް ފަށައިފައެވެ. ނަމަވެސް އޭގެ ބަދަލުގައި ޢަރަބި ޤައުމުތަކުން ތެޔޮ ހޯދަން މިހާތަނަށް ކުރި ހުރިހާ މަސައްކަތްތަކެއްވަނީ ބޭކާރުވެފައެވެ. އެ ޤައުމުތަކުން ބުނެފައިވަނީ ހުޅަނގުގެ ބާޒާރަށް ބޭނުންވާ ޢަދަދަށް ތެޔޮ ވިއްކުމުގެ ޤާބިލުކަމެއް އެ ޤައުމުތަކަށް ނެތްކަމަށެވެ. ޔޫކްރެއިނުގެ ހަނގުރާމާގައި ވަކި ފަރާތެއް ޢަރަބި ޤައުމުތަކުން ނަގާފައެއް ނުވެއެވެ. އަދި ރަޝިޔާއާ ދެކޮޅަށް ހުޅަނގުގެ ބާރުތަކުން އަޅާފައިވާ އިޤްތިޞާދީ ދަތިކުރުމުގެ ފިޔަވަޅުތައް ޢަރަބި ޤައުމުތަކުން ތަންފީޒުކޮށްފައެއްވެސް ނުވެއެވެ.