ސައުތު އޭޝިއަން ޖޫނިއާ އެންޑް ކެޑޭޓް ޓޭބަލް ޓެނިސް ޗެމްޕިއަންޝިޕުގެ ކެޑޭޓް އަންހެން ސިންގަލްސްގެ ފައިނަލުގައި އިންޑިއާގެ ޖެނިފާ އަތުން ބަލިވެ ރާއްޖޭގެ އެއް ނަންބަރު ޓީޓީ ކުޅުންތެރިޔާ ފާތިމަތު ދީމާ އަލީ ރިހި މެޑެލް ލިބިއްޖެއެވެ.
ބުދަ ދުވަހުގެ ހަވީރު ކުޅުނު މެޗުގެ ފުރަތަމަ ސެޓު އިންޑިއާގެ ޖެނިފާ ގެންދިޔައީ 13-11 އިންނެވެ. އެކަމަކު ދީމާ ވަނީ ފަސޭހަކަމާއެކު 11-4 އިން ދެވަނަ ސެޓު ގެންގޮސްފައެވެ.
މެޗުގެ ތިންވަނަ ސެޓު 11-5 އިން ޖެނިފާ ގެންދިޔަ ނަމަވެސް، ވާދަވެރި ކުޅުމަކަށްފަހު ދީމާ ވަނީ 13-11 އިން ހަތަރުވަނަ ސެޓު ކާމިޔާބުކޮށްފައެވެ. މި މެޗުން ޖެނިފާ މޮޅުވީ ފަހު ސެޓު 6-11 އިން ކާމިޔާބުކޮށްގެންނެވެ.
މި ފަހަރުގެ މުބާރާތުގެ ކެޑޭޓް ބައިން ދީމާ ރިހި މެޑަލް ހޯދިއިރު، މީގެ ކުރިން 2019 ވަނަ އަހަރު ބޭއްވި މި މުބާރާތުގެ ކެޑޭޓް ބައިންވެސް ދީމާ ވަނީ ރިހި މެޑަލް ހޯދާފައެވެ.
މީގެ އިތުރުން މި މުބާރާތުގެ ކެޑޭޓް ފިރިހެން ސިންގަލްސް ފައިނަލް މެޗުގައި ބައްދަލުކޮށްފައިވަނީ އިންޑިއާގެ ދެ ކުޅުންތެރިންނެވެ. އެ މެޗު ބާލާމުރުގަން އާއި ވާދަކޮށް ސީދާ ތިން ސެޓުން ކާމިޔާބުކޮށްފައިވަނީ އަބިހަންދުއެވެ.
މުބާރާތުގެ ޖޫނިއާ އަންހެން ސިންގަލްސްގައިވެސް ވާދަކޮށްފައި ވަނީ އިންޑިއާގެ ދެ ކުޅުންތެރިންނެވެ. މި މެޗު ޔަޝަސްވީނީ އާއި ވާދަކޮށް ސުހާނީ ކާމިޔާބުކުރީ 3-1 ސެޓުންނެވެ. އަދި ޖޫނިއާ ފިރިހެން ސިންގަލްސްގެ ފައިނަލުގައި ޔަޝާނިސްއާ ވާދަކޮށް 3-1 ސެޓުން މޮޅުވީ ޕަޔާސްއެވެ.
މި ފަހަރުގެ މުބާރާތުގައި ރާއްޖޭން ވަނީ ޖުމްލަ ހަ މެޑެލް ހޯދާފައެވެ. އެއީ ދީމާ ހޯދި ރިހި މެޑަލްގެ އިތުރުން ފަސް ލޯ މެޑެއްޔެވެ. ރާއްޖޭން ލޯ މެޑެލް ހޯދީ ޖޫނިއާ އަންހެން ޓީމު އިވެންޓާއި، ކެޑޭޓް އަންހެން ޓީމު އިވެންޓާއި، ޖޫނިއާ އަންހެން ޑަބަލްސް އާއި ކެޑޭޓް އަންހެން ޑަބަލްސްގެ އިތުރުން ޖޫނިއާ އަންހެން ސިންގަލްއިންނެވެ.