ސުރީ ލަންކާއަށް ކުރިމަތިވެފައިވާ ނާޒުކު އިޤްތިޞާދީ ޙާލަތާމެދު ހިތްހަމަނުޖެހިފައިވާ ޢާއްމުން ކުރަމުންދާ ވަރުގަދަ މުޒާހަރާތައް ހުއްޓުވުމަށް ކުއްލި ނުރައްކަލުގެ ޙާލަތު އިޢުލާންކުރުމުން އެތައް ހަފުތާތަކަށްފަހު އެ ޤައުމުގައި ހަމަޖެހުމާއި އަމާންކަން ޤާއިމުކުރެވިއްޖެއެވެ.
ފަސް ހަފުތާގެ ތެރޭގައި ދެވަނަ ފަހަރަށް ސުރީ ލަންކާގައި އިޢުލާނުކުރި ކުއްލި ނުރައްކަލުގެ ޙާލަތާބެހޭ ގިނަ މަޢުލޫމާތުތަކެއް ޢާއްމުކޮށްފައެއް ނުވެއެވެ. ނަމަވެސް މީގެ ކުރިން އެފަދަ ޙާލަތެއް އިޢުލާނުކުރުމަށްފަހު އެ ޤައުމުގެ އަސްކަރިއްޔާ ބޭނުންކޮށްގެން މުޒާހަރާތައް ރޫޅާލާއި ކޯޓު ޢަމުރަކާ ނުލައި މީހުން ހައްޔަރުކޮށްފައިވެއެވެ. މިދިޔަ އޭޕުރިލް މަހުގެ 1ވަނަ ދުވަހުވެސް އެ ޤައުމުގައި ކުއްލި ނުރައްކަލުގެ ޙާލަތު އިޢުލާންކޮށް ކާފިޔުއެއް ތަންފީޒުކޮށްފައިވެއެވެ. ނަމަވެސް ސަރުކާރުގެ ޢަމުރަށް ކިޔަމަންނުވެ އެ ޤައުމުގެ ޢާއްމުންވަނީ މުޒާހަރާތައް ކުރިޔަށްގެންގޮސްފައެވެ. އެއާއެކު ދެ ހަފުތާފަހުން ކުއްލި ނުރައްކަލުގެ ޙާލަތު އުވާލަން ސަރުކާރަށް މަޖުބޫރުވިއެވެ.
ސުރީ ލަންކާގެ ރިޔާސީ ގަނޑުވަރުން ނެރުނު ބަޔާނެއްގައި ބުނެފައިވަނީ އަނެއްކާވެސް އެ ޤައުމުގައި ކުއްލި ނުރައްކަލުގެ ޙާލަތު އިޢުލާނުކުރަން ޖެހުނީ ޢާއްމުންގެ ރައްކާތެރިކަން ކަށަވަރުކޮށް ޢާއްމު ޚިދުމަތްތައް ހުއްޓުނަނުދިނުމަށްކަމަށެވެ. ކުރީ ފަހަރާ ޚިލާފަށް މި ފަހަރު ކުއްލި ނުރައްކަލުގެ ޙާލަތު އިޢުލާނުކުރުމުން އެ ޤައުމުގައި ހަމަނުޖެހުންތަކެއް ހިނގާފައެއް ނުވެއެވެ. އެ ގޮތުން ކުރިން ވަރުގަދަ މުޒާހަރާތައްކޮށްފައިވާ ސަރަޙައްދުތައް އޮތީ އަމާންކޮށް ޢާއްމު ޙާލަތެއްގައެވެ.
22 މިލިޔަން މީހުން ދިރިއުޅޭ ސުރީ ލަންކާގެ އިޤްތިޞާދީ ޙާލަތު ވަރަށް ބޮޑަށް ގޯސްވެ އެ ޤައުމުގައި ބޭނުންކުރެވޭ ބޭރު ފައިސާގެ ރިސާވުވަނީ 50 މިލިޔަން އެމެރިކާ ޑޮލަރަށް ދަށްވެފައެވެ. އެއާއެކު އެ ޤައުމަށް ބޭނުންވާ ކާބޯތަކެއްޗާއި ބޭހާއި ތެޔޮ ގަންނާނެ ގޮތެއް ނެތުމުން ބައިނަލްއަޤްވާމީ މާލީ އިދާރާއާއި ވޯލްޑު ބޭންކުގެ އެހީތެރިކަމަށްވަނީ އެދިފައެވެ. އެ ޤައުމުގެ މަރުކަޒީ ބޭންކުން ބުނެފައިވާ ގޮތުގައި ބޭރުގެ އެކި ފަރާތްތަކަށް ދައްކަންޖެހޭ ދަރަނީގެ ޢަދަދު 51 ބިލިޔަން އެމެރިކާ ޑޮލަރަށް އަރައެވެ.