މޯލްޑިވްސް ސްޓޭޓް ޝިޕިންއިން މުޅިން އަލަށް ގަތް ބޯޓު "އެމްއެސްއެސް ކްރޮމް"ގައި ދިވެހި ދިދަ ނަގައިފިއެވެ. މިއީ ރާއްޖެއަށް ކޮންސްޓްރަކްޝަން ސާމާނު އެތެރެކުރުމަށް އެމްއެސްއެސްއިން ގަނެފައިވާ ބަލްކް ކެރިއަރ ބޯޓެކެވެ. މިއީ މިހާތަނަށް ދިވެހި ދިދަ ނެގި ރާއްޖޭގެ އެންމެ ބޮޑު ބޯޓެވެ.
އެމްއެސްއެމް ކްރޮމްގައި ދިވެހި ދިދަ ނަގާ ވީޑިއޯއެއް ޢާންމުކުރަމުން އެ ކުންފުނިން ވިދާޅުވެފައިވަނީ މިއީ މިހާތަނަށް ދިވެހި ދިދަ ނަގާ ރާއްޖޭގެ އެންމެ ބޮޑު ބޯޓުކަމަށެވެ. މި ބޯޓު މިވަގުތު އޮތީ ރާއްޖެއިން ބޭރުގައެވެ. މުދަލާއިއެކު މި ބޯޓުން ރާއްޖެއަށްކުރާ ފުރަތަމަ ދަތުރުގައި މިމަހުގެ ފަހުކޮޅު ރާއްޖެއަށް އަންނާނެކަމަށް އެމްއެސްއެސްއިން މައުލޫމާތުދެއްވައެވެ.
އެމްއެސްއެސް ކްރޮމް ބޯޓު ހޭންޑު އޯވަރ ކުރުމުގެ މަސައްކަތާއި ރަޖިސްޓްރީގެ މަސައްކަތްތައްވެސް މިހާރު ނިމިފައިވާ ކަމަށާ، ބޯޓު ރާއްޖެއަށް ކުރާ ފުރަތަމަ ދަތުރުގައިވެސް ޢާއްމުންނާއި އެސްޓީއޯގެ ހިލައާއި ހިލަވެލި ގެނައުމަށް ހަމަޖެހިފައިވާކަމަށް އެ ކުންފުނިން ވިދާޅުވެއެވެ. މި ބޯޓު ގަތުމާއިއެކު އެމްއެސްއެމްގެ އަމިއްލަ ބޯޓުތަކުގެ ޢަދަދު 2އަކަށް އިތުރުވީއެވެ. އެއީ ކްރޮމްއާއި ގަލޭނާއެވެ.
The proud moment when our national flag was flown for the first time on the flag staff of MV. MSS CHROME, the largest vessel ever registered under Maldivian flag. pic.twitter.com/LQjVNWzMso
— Maldives State Shipping (MSS) (@stateshippingmv) May 5, 2022
ހިލައާއި ހިލަވެއްޔަކީ ރާއްޖެއަށް ގިނަ ޢަދަދަކަށް އެތެރެކުރާ ބާވަތްތައްކަމަށްވާއިރު، ކްރޮމްގެ ދަތުރުތައް ފެށުމުން ރާއްޖޭގެ ކޮންސްޓްރަކްޝަން ދާއިރާއަށް ގިނަ ކުރިއެރުންތައް ލިބިގެންދާނެކަމަށް އެ ކުންފުނިން ގަބޫލުކުރައްވައެވެ.
އެމްއެސްއެސްއިން ވަނީ މިދިޔަ އަހަރުގެ ފަހުކޮޅުން ފެށިގެން އެކުންފުނީގެ އަމިއްލަ ބޯޓެއްގައި މުދާ ރާއްޖެއަށް އުފުލަން ފަށާފައެވެ. "އެމްއެސްއެސް ގަލޭނާ" އަކީ 780 ކޮންޓެއިނާގެ ޖާގައާއި 60 ޓަނުގެ ކްރޭން އަދި 60 ފީފާ އުފުލޭވަރުގެ ބޮޑު ބޯޓެކެވެ. މި ބޯޓުގެ މައިގަނޑު ދަތުރުތައް ރޭވިފައި އޮތީ ރާއްޖެ އާއި ލަންކާއާ ދެމެދުއެވެ.
އެމްއެސްއެސްއަކީ ރާއްޖެއަށް އެތެރެކުރާ މުދާ ވީހާވެސް ހެޔޮ އަގެއްގައި ގެނެވޭނެ މަގު ފަހިކުރުމަށްޓަކައި ސަރުކާރުން އުފައްދާފައިވާ އެސްޓީއޯގެ ސަބްސިޑަރީ ކުންފުންޏެކެވެ. 2020ވަނަ އަހަރުގެ އޭޕްރީލް މަހުގެތެރޭ ޚިދުމަތްދޭން ފަށާފައިވާ މޯލްޑިވްސް ސްޓޭޓް ޝިޕިންގ ކޮމްޕެނީ ޕްރައިވެޓް ލިމިޓެޑަކީ އެސްޓީއޯގެ %99.99 އޮންނަ ކުންފުންޏެކެވެ. ބާކީ އޮތް %0.01އަކީ ފިއުލް ސަޕްލައިސް މޯލްޑިވްސް ޕްރައިވެޓް ލިމިޓެޑުގެ ހިއްސާއެވެ.