ދިވެހި ސަޕޯޓަރުން ބޭނުންވާކަހަލަ ނަތީޖާއެއް ހޯދައިނުދެވުމުން ކެޕްޓަން އައްސަދު އަލީ ސަޕޯޓަރުންގެ ކިބައިން މަޢާފަށް އެދިއްޖެއެވެ. ބަނގްލަދޭޝްގައި ކުރިއަށްދިޔަ ބަންގްބަންދު ގޯލްޑްކަޕްގެ ސެމީ ފައިނަލްގައި ބޮޑު ތަފާތަކުން ނޭޕާލް އަތުން ބަލިވެ، މުބާރާތުން ކެޓުމުން ކެޕްޓަން އަައްސަދު އަލީ ބުނީ މިމުބާރާތަކީ ރާއްޖެއަށް ތަށި ނުލިބެންވީ މުބާރާތެއް ނޫންކަމަށާއި، ނަމަވެސް ސަޕޯޓަރުން ކުރި އުއްމީދާ އެއްވަރުގެ ކާމިޔާބީއެއް ހޯދައި ނުދެވުމުން އެކަމާ ހިތާމަކުރާކަމަށެވެ. ނަމަވެސް މިމުބާރާތުގެ ސެމީ ފައިނަލް މެޗް ފިޔަވާ އެހެން ހުރިހާ މެޗުތަކެއްގައި ރާއްޖޭގެ ޓީމްގެ ފަރާތުން ފެނިފައިވަނީ މޮޅު ކުޅުމެއްކަމަށާ ޒުވާން ޓީމަކާ ބަލާއިރު، ކުޅުންތެރިން ދެއްކި ކުޅުމާމެދު ވަރަށް ހިތްހަމަޖެހޭކަމަށްވެސް އައްސަދު އަލީ ބުންޏެވެ."ހަމަގައިމުވެސް މިތައްޓަކީ ދިވެހިރައްޔިތުން ވަރަށް އުއްމީދުކުރި ތައްޓެއް. އަދި މިތަށި އަތުން ބީވެގެންދިޔައީމަ އަޅުގަނޑު ވަރަށް ހިތާމަކުރަން. ނަމަވެސް ތައްޓެއް ބޭނުންވާނަމަ އެކަމަށް ވަރަށް ކުރިން އެބަޖެހޭ މަސައްކަތްކުރަން. އަޅުގަނޑުމެންނަށް މިފެނިގެންދިޔައީ ސަރުކާރާ އެފްއޭމާ އޮތް ދެބަސްވުއްގެ ތެރެއިން އޭގެ ހުރިހާ ކަމެއް ކުޅުންތެރިނަށް ދިމާވިތަން. އެކަމުގެ ހުރިހާ އަަސަރެއް ކުރީ ދިވެހި ކުޅުންތެރިންނަށް. ކުރިއަށް އޮތްތާނގައިވެސް ތައްޓެއްް ބޭނުންވާނަމަ، ކުރިއްސުރެ އެންމެން ގުޅިގެން އެއް އަމާޒަކަށް މަސައްކަތް ކުރަން އެބަޖެހޭ." މުބާރާތުގައި ކެޕްޓަންކަން ކުރި އަސްއަދު ބުންޏެވެ.ސެމީފައިނަލްގެ ކުރިން ރާއްޖެ ވާދަކުރީ ރޭންކިންގައި ރާއްޖެއަށްވުރެ މާ ފަހަތުގައި އޮތް ކެމްބޯޑިޔާގެ ޒުވާން ޓީމާއި، ބަނގްލަދޭޝްގެ އޮލިމްޕިކް ޓީމާއި، ބަހުރެއިންގެ 23 އަހަރުން ދަށުގެ ޓީމާއެވެ.