މިޔަންމާގެ ކުރީގެ އިސްވެރިޔާ އާންގު ސަން ސޫ ކީ ފަސް އަހަރަށް ޖަލަށްލުމަށް ޙުކުމުކޮށްފިއެވެ.
2021ވަނަ އަހަރުގެ ފެބްރުއަރީ މަހުގެ ތެރޭގައި މިޔަންމާގެ އަސްކަރިއްޔާއިން ކުރި ބަޣާވާތަށްފަހު ސޫ ކީއާއި އޭނާގެ ސަރުކާރުގެ އިސްވެރިން ހައްޔަރުކޮށް އެ ބޭފުޅުންގެ މައްޗަށްވަނީ ބޮޑެތި އަދަބުތަކެއް ލިބޭ ދަޢުވާތަކެއްކޮށްފައިވެއެވެ. އެ ގޮތުން ސޫ ކީގެ މައްޗަށް ޚިޔާނާތުގެ 11 ދަޢުވާއެއް ކުރުމަށްފަހު އޭނާވަނީ ފަސް އަހަރަށް ޖަލަށްލުމަށް ޙުކުމުކޮށްފައެވެ. އޭނާގެ މައްޗަށް ޖުމުލަ 18 ދަޢުވާއެއް މިޔަންމާގެ އަސްކަރީވެރިކަމުން ކޮށްފައިވެއެވެ. އެ ހުރިހާ ދަޢުވާއެއް ސާބިތުވެއްޖެނަމަ އޭނާގެ މައްޗަށް 190 އަހަރުގެ ޖަލު ޙުކުމެއް އަންނާނެއެވެ. އަދި އޭނާގެ ސިޔާސީ މަސައްކަތްތައް އެ ހިސާބުން ހުއްޓުމަކަށް އަންނާނެއެވެ.
މަޢުލޫމާތު ލިބިފައިވާ ގޮތުގައި ސޫ ކީ ފަސް އަހަރަށް ޖަލަށްލުމަށް ޙުކުމުކޮށްފައިވަނީ އޭނާގެ މައްޗަށް ކޮށްފައިވާ ޚިޔާނާތުގެ 11 ދަޢުވާ ސާބިތުވިގޮތުގެ އެއްވެސް ތަފްޞީލެއް ނުދީއެވެ. އެހެންކަމުން އެ މައްސަލަ ސޫ ކީ އިސްތިޢުނާފުކުރެއްވުމަށްވަނީ ނިންމަވައިފައެވެ. މީގެ ކުރިންވެސް އޭނާގެ މައްޗަށް ދެ ފަހަރެއްގެމަތިން ހަތަރު އަހަރުގެ ޖަލު ޙުކުމުތަކެއް އިއްވާފައިވެއެވެ. ބައިނަލްއަޤްވާމީ އެކި ފަރާތްތަކުންވަނީ މީގެ ކުރިން ނޮބެލް ޞުލްޙައިގެ އިނާމުވެސް ހޯއްދަވާފައިވާ ސޫ ކީގެ މައްޗަށް ކުރި ބޭއިންޞާފު ޙުކުމު ކޮށްވެރިކޮށްފައެވެ.
ޢުމުރުފުޅުން 76 އަހަރުގެ ސޫ ކީވަނީ މިޔަންމާގެ އިސްވެރިޔާގެ މަޤާމު ފަސް އަހަރު ފުރުއްވައިފައެވެ. އަދި މިޔަންމާގެ އަސްކަރިއްޔާއިން ބަޣާވާތްކޮށްފައިވަނީ އޭނާގެ ޕާޓީން ޢާއްމު އިންތިޚާބު ކާމިޔާބުކޮށް ވެރިކަމުގެ އިތުރު ދަޢުރެއް އޭނާ ކަށަވަރުކުރައްވާފައިވަނިކޮށެވެ. މިޔަންމާގެ އަސްކަރިއްޔާއިން ބަޣާވާތާ ދެކޮޅަށް އެ ޤައުމުގެ ޢާއްމުންވަނީ ވަރުގަދަ މުޒާހަރާތަކެއްކޮށްފައެވެ. ނަމަވެސް މިޔަންމާގެ އަސްކަރިއްޔާއިންވަނީ ޢާއްމުންނާ އަނިޔާވެރިކަމާއެކު ކުރިމަތިލައި 10،000އަށްވުރެ ގިނަ މީހުން ހައްޔަރުކޮށްފައެވެ. އަދި ފާއިތުވި އަހަރެއްހާ ދުވަހުގެ ތެރޭގައި މިޔަންމާގެ އަސްކަރިއްޔާގެ އަނިޔާވެރި ޙަމަލާތަކުގައި 1،500އަށްވުރެ ގިނަ މީހުން މަރުވެފައިވާކަމަށް އދން ބުނެފައިވެއެވެ.