ހުޅުމާލޭގައި ހިންގާ ހާންޖީ ރެސްޓޯރެންޓްގެ ތެރޭގައި މަރާލި ބަންގްލަދޭޝް ވެއިޓަރުގެ ހަށިގަނޑު، އޭނާގެ ޤައުމަށް ފޮނުވައިފިއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ މަރާލި ބިދޭސީ މީހާ، އޭނާގެ ޤައުމަށް ފޮނުވާފައި ވަނީ ރޭގެ ވަގުތެއްގައި ކަމަށެވެ. އަދި ރެސްޓޯރެންޓްގައި ހިނގި މިހާދިސާ އިތުރަށް ތަހުގީގު ކުރަމުންދާ ކަމަށްވެސް ފުލުހުންގެ މީޑިއާ އޮފިޝަލް ވިދާޅުވިއެވެ.
މިމަހުގެ 16ވަނަ ދުވަހު ހުޅުމާލޭގައި ހާންޖީ ރެސްޓޯރެންޓުގައި މަރާލި މީހާއަށް ހަމަލާ ދީފައިވަނީ އެ ރެސްޓޯރެންޓްގައި ކައްކާއެއްގެ ގޮތުގައި މަސައްކަތްކުރާ، ޕާކިސްތާނު މީހެކެވެ. މި މީހާއަކީ އުމުރުން 26 އަހަރުގެ މުހައްމަދު އާބިދުއެވެ.
ހަމަލާ ދިނުމަށްފަހު ފިލައިގެން އުޅުނު މިމީހާ ހައްޔަރުކޮށްފައިވަނީ މިމަހުގެ 17ވަނަ ދުވަހުއެވެ.
ރެސްޓޯރަންޓް ތެރޭގައި ހިނގި ދެ ބަސްވުމެއްގެ ޕާކިސްތާނު ކައްކާ ބަންގްލަދޭޝް މީހާ ހަށިގަނޑުގެ ތިން ތަނަކަށް ވަޅިން ހަމަލާދީފައިވާކަމަށް މަންޒަރު ދުށް ބައެއް މީހުން ވަނީ ބުނެފައެވެ. އަދި މި ދެ މީހުންގެ މެދުގައި މީގެކުރިންވެސް ބައެއް ދެބަސްވުންތައް ހިނގާފައިވާކަމަށް އެތަނުގައި މަސައްކަތް ކުރާ ބައެއް މީހުން ވަނީ ބުނެފައެވެ.
ފިލައިގެން އުޅުނު ޕާކިސްތާނު މީހާ ހައްޔަރުކުރުމަށްފަހު ފުލުހުން ވިދާޅުވީ އޭނާގެ މައްސަލަ ސީރިއަށް މައްސަލައެއްގެ ގޮތުގައި ތަހުޤީޤްކުރަމުންދާކަމަށެވެ.